बैतडीका सम्पूर्ण कार्यालयका सेवा बन्द

A+ A A-

डडेल्धुरा : बैतडीका सम्पूर्ण कार्यालयका सेवा २१ गतेसम्म बन्द भएका छन् । कोरोना भाइरस (कोभिड १९) लाई मध्यनजर गर्दै जिल्लास्थित कार्यालयका अत्यावश्यकबाहेकका सेवा बन्द गरिएको हो ।

सरकारले कोरोना भाइरसको सम्भावित संक्रमण रोक्न मुलुकभर अत्यावश्यक बाहेकका सबै सेवा चैत ९ देखि २१ गतेसम्म बन्द गर्न निर्देशन दिएसँगै बैतडीमा पनि बन्द गरिएको प्रमुख जिल्ला अधिकारी आनन्द पौडेलले जानकारी दिए ।

सेवा बन्द भए पनि कार्यालय भने खुलै रहने प्रजिअ पौडेलले बताए । ‘सरकारी कर्मचारी र अत्यावश्यक सेवामा कार्यरत निजी क्षेत्रका समेत कर्मचारीले आफ्नो काम गर्ने छन्’ उनले भने, ‘जिल्लास्थित टेलिकम, विद्युत, अस्पताल, हुलाकलगायतका सेवा यथावत रहने छन् ।’

दशरथचन्द नगरपालिका लकडाउन

विश्वव्यापीरूपमा फैलिरहेको कोरोना भाईरसको जोखिम न्यूनीकरणका लागि बैतडीको दशरथचन्द नगरपालिकाले नगर क्षेत्रभित्र लक डाउन गर्ने निर्णय गरेको छ । नगरस्तरीय विपद् व्यवस्थापन समितिको सोमबार बसेको बैठकले नगरपालिका क्षेत्रभित्र सवारी साधन सञ्चालनमा समेत रोक लगाउने निर्णय गरेको छ ।

यस्तै, नगरपालिकाका ११ वटै वडामा क्वारेन्टाइन निर्माण गर्ने निर्णय भएको नगरपालिकाका प्रमुख नरेन्द्रसिंह थापाले जानकारी दिए । एक वडाका दुई विद्यालय गरेर नगरपालिकाभरी कम्तीमा ३०४ बेडका क्वारेन्टाइन निर्माण गर्ने निर्णय भएको उनले बताए ।

भारत तथा अन्य देशबाट नगरक्षेत्रभित्र प्रवेश गरेका नागरिकलाई अनिवार्य १४ दिन सम्म क्वारेन्टाइनमा बस्न लगाउने निर्णय भएको नगरप्रमुख थापाले जानकारी दिए ।

भारतबाट फर्केका तीनजनामा ज्वरो

बैतडीको पञ्चेश्वरमा ज्वरो भएका तीन जना शंकास्पद बिरामीलाई एउटा विद्यालयको कोठामा राखिएको छ । भारतका विभिन्न शहरबाट काम गरेर फर्केका तीनज नामा एक सय डिग्री फरेनहाइट भन्दा बढी ज्वरो मापन गरिएकाले उनीहरूलाई कैलपाल आधारभूत विद्यालयको एक कोठामा राखिएको पञ्चेश्वर गाउँपालिकाका अध्यक्ष गोरखबहादुर चन्दले जानकारी दिए ।

आइतबार रोलघाटबाट नेपाल आएका उनीहरूको चेकजाँच गर्दा ज्वरो आएको भेटिएकाले अलग कोठामा राखिएको चन्दले जानकारी दिए। पञ्चेश्वर गाउँपालिका–४ का तीनै जनालाई उच्च ज्वरो भेटिएकाले अलगै राखिएको चन्दले बताए।

उनीहरू तीनैजना भारतबाट फर्केका हुन् । तीनैजनालाई ज्वरो देखिएकालाई १४ दिनसम्म अलगै राख्नुपर्ने स्वास्थ्य कार्यालयका प्रमुख योगेशप्रसाद भट्टले बताए ।

प्रकाशित मिति: सोमबार, चैत १०, २०७६ १८:००