कोरोना संक्रमित भेटिएपछि रणनीति परिवर्तन गर्दै सरकार

A+ A A-

नेपालमा पनि विश्वभर महामारीको रूपमा फैलिएको कोरोना भाइरस (कोभिड-१९) का संक्रमित भेटिएपछि सरकारले रोकथाम तथा नियन्त्रणको रणनीति बदलेको छ ।

कोरोना भाइरसको संक्रमण फैलिन नदिनका लागि सरकारले रणनीति परिवर्तन गर्दै सर्विलियन्सको दायरा बढाउन लागेको हो ।

फ्रान्सबाट कतार हुँदै नेपाल आएकी एक नेपाली युवतीमा कोरोना भाइरस पोजिटिभ देखिएपछि र नेपाल-भारत सीमा बन्द हुने हल्लाले नेपाल भित्रिनेको संख्या बढेपछि स्वास्थ्य तथा जनसंख्या मन्त्रालयले निगरानीको दायरालाई फराकिलो बनाउने रणनीति अख्तियार गरेको हो ।

सोमबार मन्त्रालयले गरेको पत्रकार सम्मेलनमा स्वास्थ्यमन्त्री भानुभक्त ढकालले नेपालमा कोरोना भाइरस नियन्त्रण गर्न सर्विलियन्स बढाउने तयार गरिएको बताए ।

उनले विदेशबाट फर्किएका मानिसहरूलाई सम्भावित लक्षण देखिएमा नमुना परीक्षण गर्ने र ६० वर्षभन्दा बढीका वृद्धवृद्धा र गम्भीर प्रकारका बिरामीहरूको पनि नमुना परीक्षण गरिने रणनीति लिएको बताए ।

एक व्यक्तिबाट अर्को व्यक्तिलाई नसरोस् भनेर सरकारले यस्तो गरेको छ । सावधानीले परिवारका सदस्यसहित अरूलाई फैलाट हुनबाट जोगाउँछ, उनले भने ।

चैत ४ गते फ्रान्सबाट कतार हुँदै आएकी १९ वर्षीया युवतीमा कोरोना भाइरस पोजेटिभ भेटिएको हो । नेपाल फर्किएपछि उनी होम क्वारेन्टाइनमा रहेको र आइतबारको परीक्षणका क्रममा नमुना पोजेटिभ देखिएको मन्त्री ढकालले जानकारी दिए ।

स्वास्थ्य मन्त्रालयले उनीसँग सम्पर्कमा रहेकालाई समेत आइसोलेसनमा राखेर निगरानी सुरु गरिएको जानकारी दिएको छ । उनको आइतबार साँझ मात्रै संक्रमण पुष्टि भएको हो ।

‘उनको परिवारलाई क्वारेन्टाइनमा राखेका छौँ र उनीसँगै जहाजमा आएका अन्य मानिस कहाँ–कहाँ छन् भनेर खोजी गर्दै छौँ’, पत्रकार सम्मेलनमा मन्त्री ढकालले भने ।

नेपालमा कोरोना भाइरसको पुष्टि भएको यो दोस्रो घटना हो । १ महिनाअघि चीनको वुहानबाट फर्किएका एक नेपालीमा कोरोना भाइरस देखिएको थियो । उनी उपचारपछि निको भएर घर फर्किएका छन् ।

साथै सरकारले ५० शय्याभन्दा माथिका अस्पतालमा फिबर क्लिनिक संचालन गर्ने भएको छ । ज्वरो देखिएका बिरामीलाई उपचार गर्न सहज होस् र अन्य व्यक्तिलाई पनि नसरोस् भन्ने उद्देश्यले फिबर क्लिनिक सञ्चालनमा ल्याउन थालिएको मन्त्रालयले जनाएको छ ।

सरकारले कोरोना भाइरसको उपचारका लागि काठमाडौं उपत्यकामा १००० शय्याको अस्पताल वृद्धि गर्ने, नेपालभरिमा २३५ वटा आईसीयू थप गर्ने भएको छ । त्यसका लागि सरकारले काम सुरु गरिसकेको स्वास्थ्य समन्वय महाशाखा प्रमुख एवं प्रवक्ता डा. विकास देवकोटाले बताए ।

उनका अनुसार टेकु अस्पतालमा थप १० शय्याको निर्माण कार्य सुरु भएको छ । टेण्डर खुलिसकेको छ, जति सामान पाइन्छ, त्यतिले काम सुरु गरिन्छ, उनले भने ।

सरकारले अस्पतालहरूको ओपीडी सेवासमेत बन्द गरेको छ । अन्य रोग लागेका बिरामीलाई कोभिड-१९ को संक्रमणको जोखिम न्यूनीकरण गर्नका लागि ओपीडीलाई बन्द गरिएको उनले बताए । अरू व्यक्तिलाई नसरोस् भनेर पेइङ क्लिनिक २ हप्ताका लागि बन्द गर्ने निर्णय भएको छ, उनले भने ।

नियमित फलोअपका बिरामीलाई पनि २ हप्ता अस्पताल नआउन मन्त्रालयले अनुरोध गरेको पनि उनले बताए । आपत्कालीनबाहेक शल्यक्रिया पनि नगराउने भएको छ ।

प्रकाशित मिति: सोमबार, चैत १०, २०७६ १३:४५