प्रभावकारी बन्दै जोगबनी नाकाको ‘हेल्थ डेस्क’, ७७ हजारकाे परीक्षण

A+ A A-

कोरोना भाइरसको सङ्क्रमण भवावह बन्न थालेपछि नेपालमा समेत यसको सङ्क्रमण रोक्न उच्च सावधानी अपनाउन थालिएको छ ।

कोरोनाको सङ्क्रमणबाट जोगिनका लागि विराटनगर महानरपालिकाले जोगबनी सीमा नाकामा हेल्थ डेस्क राखेर हजारौंँ मानिसले स्वास्थ जाँच गराउँदै भारतबाट नेपाल फर्केका छन् । भारतमा आइतबार गरिएको जनता कफ्र्यूका कारण आवतजावत बन्द भए पनि अन्य बेला भारतका विभिन्न ठाउँहरूबाट नेपाल फर्किनेको संख्या बढ्दो छ ।

जोगबनी नाकामा सञ्चालन गरिएको हेल्थ डेस्क बिहान ७ बजेदेखि बेलुका ७ बजेसम्म सञ्चालन हुन्छ । २८ फागुनदेखि हेल्थ डेस्क विराटनगर महानगरापालिकाले सञ्चालन गरेको छ । कोरोनाको त्रासले भारतका विभिन्न ठाउँबाट नेपाल आउने नागरिकहरूले हेल्थ डेस्कमा स्वास्थ जाँच गराएर घर फर्किंदा स्वस्थ रहेको महसुस गर्छन् ।

नियमित रूपमा स्वास्थ परीक्षण गर्न हेल्थ डेस्क राखेर राम्रो गरेको भारतबाट नेपाल फर्किएका मो. ओसिम आलमले बताए । ‘अहिले भारतमा कोरोना भाइरस फैलिइसकेको छ । नेपालमा यो भाइरसको सङ्क्रमण हुन दिनुहुँदैन’, उनले भने, ‘यसरी बोर्डरमै स्वास्थ्य परिक्षण गर्ने व्यवस्था हुनु एकदमै राम्रो हो ।’

उनले स्वास्थ परीक्षण गराएर आफू स्वस्थ रहेको अनुभव महसुस गरेको बताए । चीनको वुहान प्रान्तबाट फैलिएको कोरोना भाइरस सङ्क्रमण सर्वसाधारणमा हुन नदिन दैनिक जोगबनी नाकामा रहेको हेल्थ डेस्कमा १६ हजारभन्दा बढी मानिसहरूले स्वास्थ जाँच गराउँदै आइरहेका छन् ।

बिरामी उपचार गराउन भारतको दिल्लीतर्फ जान लागेको भए पनि कोरोना भाइरसको त्रासका कारण घर फर्किएको सरिता चौधरीले बताइन् । ‘म दिल्ली उपचारका लागि जाँदै थिएँ । भारतको एम्स अस्पतालमा डाक्टर नरहेको जानकारी पाएपछि फर्कंदै गरेकी हुँ’, उनले भनिन्, ‘मैले हेल्थ डेस्कमा स्वास्थ्य परीक्षण गराएर अब घर फर्कंदै छु ।’

साढे ७७ हजारको स्वास्थ्य परीक्षण

हेल्थ डेस्कमा गत मगंलबार ९ हजार ५ सय ४७ जना, बुधबार १६ हजार १ सय २४ जना, बिहबार २४ हजार १ सय ६३ जना, शुक्रबार १६ हजार ७ सय ५० जना, हिजो शनिबार मात्र १० हजार ८ सय ४८ जना गरी ७७ हजार ४ सय ३२ जनाले स्वास्थ परीक्षण गराएको हेल्थ डेस्कका स्वास्थकर्मी संजिवकुमार सिंहले जानकारी दिए ।

उनले हालसम्म हेल्थ डेस्कमा कोरोना भाइरस सङ्क्रमण भएका व्यक्ति नभेटिएको बताए ।

उनले समान्य ज्वरो आएका व्यक्तिलाई तत्काल थप उपचारका लागि कोसी अस्पताल पठाउने गरेको जानकारी पनि दिए । यतिखेर सर्वसाधारणहरूका लागि हेल्थ डेक्स अतिप्रभावकारी रहेको उनीहरूको भनाइ छ । भारतबाट आउनेको संख्यामा वृद्धि भइरहेका बेला हेल्थ डेस्कका लागि अझ थप स्वास्थ्यकर्मीहरू परिचालन गरेमा सहज हुने सरोकारवालाहरूले बताएका छन् ।

प्रकाशित मिति: आइतबार, चैत ९, २०७६ १८:४७