क्रिकेट मैदान स्तरोन्नतिमा पदाधिकारी विश्वस्त, उपलब्धि भने शून्य

A+ A A-

विराटनगर महानगरपालिका– १९, वैजनाथपुरस्थित स्पोर्ट्स कम्प्लेक्समा रहेको क्रिकेट मैदान स्तरोन्नतिका लागि प्रदेश १ सरकारले २ करोड रुपैयाँ उपलब्ध गराउने भएको छ ।

प्रदेश १ का सामाजिक विकासमन्त्री जीवन घिमिरेले पहिलो चरणमा १ करोड रुपैयाँ मैदानको स्तरोन्नतिका लागि र थप १ करोड रुपैयाँ पवेलियन निर्माणका लागि उपलब्ध गराउने जानकारी दिए । मन्त्री घिमिरेका अनुसार पहिलो चरणको रकम विराटनगर महानगरपालिकाअन्तर्गत खर्च गरिने बताए ।

महानगरबाट करिब ३ किलोमिटरको दूरीमा रहेको कम्प्लेक्समा रहेको क्रिकेट मैदानमा ६ वटा टर्फ पिच, मैदानमा माटो भर्ने, साइड स्क्रिन, ३ स्थान पानीको बोरिङ, पानी ट्याङ्कीका लागि १ करोड रुपैयाँ बजेट खर्च हुनेछ ।

पहिलो चरणमा प्रदेश १ सामाजिक मन्त्रालयले विराटनगर महानगरपालिकामातहतमा १ करोड रुपैयाँ उपलब्ध गराएको छ । यसका लागि क्रिकेटका अम्पायर एवम् क्युरेटर शिरिष उपाध्यायको संयोजकत्वमा वैजनाथपुर क्रिकेट रङ्गशाला निर्माण तथा मर्मत उपभोक्ता समिति गठन भएको छ । संयोजक उपाध्यायका अनुसार असार मसान्तभित्र उल्लेखित कार्य सम्पन्न गर्ने गरी केही दिनबाटै फिल्ड वर्क सुरु हुनेछ ।

मैदानमा निर्माण हुने पिचका लागि उदयपुरबाट रातो माटो, सुनसरीको बर्जुतालबाट कालो माटो र सेतो माटो ल्याइने क्युरेटर उपाध्यायले बताए । उनका अनुसार १ करोड रुपैयाँमा विभिन्न कर कटाएर ८५ लाख रुपैयाँ हुने र बाँकी १५ प्रतिशत रकम समितिले ब्यहोर्नेछ ।

विराटनगर महानगरपालिकाका मेयर भीम पराजुलीले मैदानको स्तरोन्नतिका लागि सामाजिक विकास मन्त्रालयबाट १ करोड रुपैयाँ उपलब्ध भएको जानकारी दिए ।

मेयर पराजुलीले भने, ‘मैदान स्तरोन्नतिका लागि क्रिकेटमा लागेका व्यक्तिहरूकै समूहले उपभोक्ता समिति बनाएका छन् । सोही उपभोक्ता समितिले काम गर्नेछन् ।’ मैदान महानगरपालिकाभित्र भएको हुनाले यसको स्तरोन्नतिमा महानगरले विशेष चासोका साथ हेर्ने मेयर पराजुलीको भनाइ छ ।

त्यसैगरी, क्यानका एक पदाधिकारीले विगतमा भएका घटनाबाट पाठ सिक्दै अब नयाँ शिराबाट काम गर्ने उनले बताए । उनले भने, ‘हिजो के भयो, त्यसमा नगईकन हामी मैदानको स्तरोन्नतिका लागि खटिनेछौँ ।’

जिल्ला खेलकुद विकास समितिमातहत रहेको मैदान निर्माणका लागि सातौँ राष्ट्रिय खेलकुदका क्रममा ६४ लाख रुपैयाँ, त्यसपछि सामाजिक विकास मन्त्रालयबाट दुई पटक २०७४/७५ मा १ करोड ७० लाख रुपैयाँ र २०७५/०७६ मा १ करोड रुपैयाँ खर्च भइसकेको छ ।

२०७४/७५ मा क्षेत्रीय खेलकुद विकास समितिले १ करोड ७० लाखमा मैदानको वरिपरि ड्रेन, साइडस्क्रिन, पिच र मैदानमा माटो भर्नका लागि शाह गरिमा जेभी कन्स्ट्रक्सनले जिम्मा लिएको थियो । सो समय गुणस्तरहीन काम भएको जनाउँदै जिल्ला क्रिकेट संघ मोरङको तदर्थ समितिका अध्यक्ष सुनिल पौडेलसहितको टोलीले आपत्ति जनाएको थियो ।

त्यसैगरी, २०७६ सालको स्तरोन्नतिको काममा समेत विवाद आएपछि तत्कालीन वैजनाथपुर क्रिकेट मैदान तथा स्तरोन्नति व्यवस्थापन समितिले १ करोड रुपैयाँमा २६ लाख ५७ हजार रुपैयाँ खर्च गरेको थियो । यस मैदानमा सातौँ राष्ट्रिय खेलकुदका क्रममा क्रिकेट प्रतियोगिता, एक पटक ए डिभिजन क्रिकेट प्रतियोगिता आयोजना भएको जिल्ला क्रिकेट संघ मोरङले जनाएको छ । यद्यपि, यसबीचमा विद्यालयस्तरीय प्रतियोगिता पनि हुँदै आएको छ ।

मैदानका लागि सामाजिक विकास मन्त्रालय, राष्ट्रिय खेलकुद परिषद्ले रकम खर्च गरे पनि त्यसको मर्मत र उचित रेखदेख हुन नसकेको क्रिकेटका पदाधिकारीहरूको गुनासो छ । उनीहरू भन्छन्, ‘न खर्च गर्ने निकायले त्यसको रेखदेख गर्छन्, न त परिषद्ले नै । त्यसैले पनि यसमा पटक–पटक रकम खर्च हुँदासमेत उपलब्धि भने अपेक्षाकृत रूपमा आउन सकेको छैन ।’

प्रकाशित मिति: आइतबार, चैत ९, २०७६ १८:२०