उपप्रमुख गुरुङ गरिन् भाडा छुटको घोषणा

A+ A A-

विश्वव्यापी रूपमा फैलिएको कोरोना भाइरस (कोभिड–१९) संक्रमणका कारण व्यवसाय धरापमा परेपछि पोखरामा रहेको व्यापारिक प्रतिष्ठान र व्यक्तिहरूले भाडामा छुट दिने घोषणा गरेका छन्।

कोरोना भाइरसको संक्रमणको त्रास बढेपछि ग्राहकको अभावमा व्यवसाय धरापमा परेको गुनासो बढेपछि पोखरा महानगरपालिकाका उपप्रमुख मञ्जुदेवी गुरुङले एक महिनाको भाडा नलिने घोषणा गरेकी छिन् ।

गुरुङल पोखरा महानगरपालिका-९ जरेबरमा रहेको आफ्नो नाममा रहेको जग्गाको चैत महिनाको भाडा नलिने घोषणा गरेकी हुन् । कोरोना भाइरसको संक्रमणको हल्लासँगै पोखरामा व्यापार व्यवसाय धरासायी बन्दै गएको भन्दै घर भाडामा छुट दिन माग गरिरहेका बेला उपपप्रमुख गुरुङले भाडा नलिने घोषणा गरेकी हुन् ।

कोरोना भाइरसका कारण आर्थिक क्षेत्र अस्तव्यस्त भएको भन्दै उनले व्यवसायीलाई राहतस्वरूप भाडा नलिने निर्णय गरेको बताइन् । उनले मासिक ६५ हजार रुपैयाँमा भाडा लिँदै आएकी थिइन् ।

चैत महिनाको भाडा आफुले नलिने घोषणा गरेको बताउँदै उनले भनिन, ‘व्यवसायीलाई एक महिनाको भाडा नलिँदा राहत हुने अपेक्षासहित भाडा मिनाहा गर्ने निर्णय गरेकी छु ।’

कोरोना भाइरस त्रासका कारण व्यवसाय धरापमा परेपछि पोखरामा रहेको व्यापारिक प्रतिष्ठान ‘पोखरा ट्रेड मल’ ले सटरको भाडामा ५० प्रतिशत छुट दिने भएको छ । कोरोना भाइरसको संक्रमणको त्रास बढेपछि व्यवसाय घटेपछि पोखरा मल व्यवस्थापनले चैत्र महिनाको सटर भाडामा पचास प्रतिशत छुट दिने निर्णय गरेको हो ।

कम्पनीले परिस्थितिलाई मध्यनजर गर्दै मलभित्र व्यवसायरत व्यवसायीलाई केही मात्रामा भए पनि राहात मिलोस् भन्ने उद्देश्यले चैत्र महिनाको सटर भाडामा ५० प्रतिशत छुट उपलब्ध गराउने निर्णय गरेको अध्यक्ष बिन्दु कुमार थापाले बताए । ‘थोरै भए पनि राहत मिलोस् भनेर प्रथम चरणमा चैत महिनाको भाडामा ५० प्रतिशत छुट प्रदान गरिएको हो,’ उनले भने ‘परिस्थित नसुध्रिएको अवस्थामा आगामी महिना पनि छुटलाई निरन्तरता दिइने छ।’

प्रकाशित मिति: शनिबार, चैत ८, २०७६ १९:४६