भारतसँग जोडिएका सबै नाका बन्द गर्न केन्द्रसँग प्रदेशको आग्रह

A+ A A-

प्रदेश-१ सरकारले छिमेकी मुलुक भारतसँग जोडिएका सबै नाका तत्काल बन्द गर्न केन्द्र सरकारसँग आग्रह गर्ने निर्णय गरेको छ । मुख्यमन्त्री शेरधन राईको संयोजकत्वमा शुक्रबार बसेको कोरोना रोकथाम तथा नियन्त्रण समितिको बैठकले भारतसँग जोडिएको नाका बन्द गर्न केन्द्र सरकारसँग आग्रह गर्ने निर्णय गरेको हो ।

बैठकमा सहभागी सामाजिक विकासमन्त्री जीवन घिमिरेले कोरोनाभाइरसको जोखिमलाई ध्यानमा राख्दै मानिसहरूको आवतजावत रोक्न नाका बन्द गर्न जरूरी रहेको बताए । प्रदेश-१ मा काँकडभिट्टा, पशुपतिनगर, भद्रपुर र विराटनगरसँग जोडिएको नाका सञ्चालनमा छन् । प्रदेश-१ का प्रवक्ता तथा आन्तरिक मामिला तथा कानुन मन्त्री हिक्मत कुमार कार्कीसहितको टोलीले विराटनगर रानी–जोगबनीमा रहेको हेल्थ डेस्क र नाकाको अनुगमनसमेत गरेको छ ।

मन्त्री कार्कीले प्रदेश-१ सँग जोडिएका सबै साना सीमा नाकालाई बन्द गर्न र जोगबनी र काकरभिट्टा नाकालाई व्यवस्थित ढंगबाट सञ्चालन गरिने गरी संघीय सरकारसँग आग्रह गर्ने बताएका छन् । उनले आजभोलि नै छलफल गरेर कार्यान्वयन गर्ने पनि बताए ।

यसैगरी, सामाजिक विकासमन्त्री घिमिरेले विराटनगरमा एक साताभित्र ५० शैयाको आपतकालीन अस्पताल पनि बनाउने निर्णय गरेको जानकारी दिए । विराटनगरस्थित नेशनल ट्रेडिङको भवनमा कोशी अस्पतालको संयोजनमा १० वटा भेन्टिलेटरसहितको अस्पताल स्थापना गरिने मन्त्री घिमिरेले बताए । उनले प्रदेशभरिका अस्पतालबाट रिफर भएर आएका बिरामीको मात्रै आपतकालीन अस्पतालमा उपचार हुनेसमेत बताए ।

कोरोना जोखिमलाई लिएर प्रदेशसभा बैठक पनि अनिश्चितकालको लागि स्थगित भएको छ । शुक्रबार सभामुख प्रदीपकुमार भण्डारीले अर्को सूचना जारी नभएसम्मको लागि बैठक स्थगित भएको जानकारी गराएका थिए ।