नेपाली कामदार कार्यरत देशमा यस्ताे छ अवस्था

A+ A A-

नेपाली श्रमिक रोजगारीको खोजीमा प्रायः विश्वभर नै पुगेको सरकारी तथ्यांक छ । नेपाली श्रमिकको रोजगार गन्तव्य देश मलेसिया, खाडीका देश, मध्यपूर्वका देश, युरोपियन देश र अफ्रिकी मुलुक नै हुन् । वैदेशिक रोजगार विभागले पनि नेपाली श्रमिक प्रायः यिनै देश जाने गरेको जनाएको छ ।

चीनको वुहानबाट सुरू भएको कारोना भाइरस (कोभिड–१९) को संक्रमण पछिल्लो समय विश्वव्यापी रूपमा फैलिएको छ । विश्व स्वास्थ्य संगठन (डब्लूएचओ) ले यसलाई महामारी घोषणा गरिसकेको छ । अहिले दक्षिण कोरिया, इटाली, इरान, स्पेन, फ्रान्स, अस्ट्रेलिया, जापान, यूएई, कतार, साउदी अरब, कुवेतलगायत देशले कोरोनाको मार खेपिरहेका छन् ।

कोरोनाको प्रकोप खेपिरहेका यी देशमा अध्ययन र कामका सिलसिलामा थुप्रै नेपाली बसिरहेका छन् । उनीहरू हाल कस्तो अवस्थामा छन् भन्ने परिवारलाई चासो छ ।

विश्वका १ सय ८० देशका २ लाख ४५ हजार ६ सय ७१ मा कोरोनाको संक्रमण फैलिइसकेको छ । १० हजार ४९ जनाको ज्यान गएको छ भने ८८ हजार ४ सय ४१ जनाको उपचारसमेत भएको छ ।

यूएईमा २ जना र पोल्याण्डमा २ जना नेपालीमा कोरोनाको संक्रमण देखिए पनि खाडीका बाँकी देश र मलेसियामा अहिलेसम्म नेपालीमा कोरोनाको संक्रमण भएको पुष्टि भएको छैन । जसका कारण विदेशीमा रहेका नेपालीमा कोरोना भाइरसबाट आत्तिनुपर्ने अवस्था नभएको कूटनीतिक नियोगहरूले बताइरहेका छन् ।

याे पनी : राजदूतावास भन्छन्: विदेशमा रहेका नेपाली श्रमिक कोरोनाबाट सुरक्षित छन्

मलेसिया

मलेसियामा कोरोना भाइरसबाट २ जनाले ज्यान गुमाएका छन् । संक्रमित संख्या ९ सय रहेकोमा ७५ जना निको भएर घर फर्किसकेका छन् । अस्पतालमा उपचाररत ८ सय २३ जना छन् । मलेसियामा रोजगारी र अन्य पेसा गरेर बसेका नेपालीमा कोरोना संक्रमण देखिएको पुष्टि भएको छैन ।

कतार

कतारमा कोरोना भाइरसका कारण कुनै नागरिकले ज्यान गुमाएका छैन । कतारमा कोरोना संक्रमित संख्या ४ सय ६० छ भने ४ सय ५० जना अस्पतालमा उपचाररत छन् । १० जना उपचारपश्चात घर फर्किएका छन् ।

कतार सरकारले कोरोना भाइरसको संक्रमण फैलिएसँगै सावजनिक यातायात बन्द गरेको छ भने विदेशी नागरिक आवतजावतमा समेत बन्द गरेको छ । कोरोना भाइरसका कारण जथाभावी हिँडेको भनेर २ सय नेपाली श्रमिकलाई स्वदेश डिपोर्ट गरेको छ । कतारमा रहेका नेपालीमा कोरोनाको संक्रमण देखिएको छैन ।

यूएई

यूएईमा कोरोनाको संक्रमण १ सय ४० जनामा देखिएको छ । अस्पतालमा उपचाररत दुई जना नेपालीसहित १ सय ९ जना छन् । ३१ जना निको भएका छन् । यूएईमा २ जना नेपालीमा कोरोना संक्रमण देखिएको छ । मंगलबारदेखि यूएई भ्रमणमा आउनेहरूलाई सरकारले भिसासमेत नदिने निर्णय कार्यान्वयन गरेको छ ।

यूएईका पर्यटकीय स्थलहरू, विद्यालय, सिनेमा हल, रेस्टुरेन्ट, बार, नाइट क्लब तथा धेरै मानिसको जमघट हुने क्षेत्रहरू बन्द भइसकेका छन् ।

साउदी अरेबिया

साउदी अरबमा २ सय ७४ जना कोरोना संक्रमित छन् । उपचारत २ सय ६६ जना र निको भएर ८ जना घर फर्किएका छन् । साउदीमा रहेका नेपालीमा कोरोना भाइरस देखिएको छैन ।

बहराइन

बहराइनमा २ सय ७८ जना कोरोना भाइरस संक्रमित भेटिएका छन् । बहराइनमा यो भाइरसबाट १ जनाको मृत्यु भएको छ । १ सय १० जना निको भएर घर फर्किएका छन् । हाल १ सय ६७ जना अस्पतालमै उपचारत छन् ।

बहराइनमा अवतरण गर्ने उडानहरू १८ मार्चदेखि अनिश्चितकालका लागि बन्द गरिएका छन् । बहराइनले सबै लेबर क्याम्प सरसफाइ गर्ने र प्रत्येक क्याम्पमा क्वारेन्टाइनको व्यवस्था गरेको छ ।

कुवेत

कुवेतमा १ सय ४८ जनामा कोरोना भाइरस भेटिएको छ । जसमा १८ जना निको भइसकेका छन् । १ सय ३० जना उपचारत छन् ।

कुवेत सरकारले सार्वजनिक क्षेत्रका श्रमिकलाई दुई हप्ताको बिदा दिएको छ । रेस्टुरेन्टदेखि शिक्षण संस्थासमेत बन्द गरिएका छन् । गएको शुक्रबार रातिदेखि कुवेतले सबै व्यावसायिक उडान पनि बन्द गरेको छ ।

ओमान

ओमानमा कोरोना भाइरसको संक्रमण ४८ जनामा देखिएको छ । अस्पतालमा उपचाररत ३५ जना छन् भने १३ जना निको भएर घर फर्किएका छन् । ओमानले सबै विदेशी श्रमिक र नागरिकसँग अन्तर्राष्ट्रिय उडान बन्द गरेको छ ।

जापान

जापानमा ९ सय ६३ जनामा कोरोना संक्रमण देखिएको छ भने ३३ जनाको मृत्यु भएको छ । २ सय १५ जना निको भएका छन् । जापानमा रहेका नेपालीमा कोरोना भाइरसको प्रभाव देखिएको छैन । जापान सरकारले गत महिनादेखि सबै बन्द गरेको छ ।

दक्षिण कोरिया

दक्षिण कोरियामा ८ हजार ६ सय ५२ जनामा कोरोना भाइरसको संक्रमण देखिएको छ । जसमा ९४ जनाको मुत्यु भएको छ भने २ हजार २ सय ३३ जना संक्रमित निको भएर स्वदेश फर्किएका छन् । कोरियामा नेपालीमा कोरोना भाइरसको संक्रमण देखिएको छैन ।

प्रकाशित मिति: शुक्रबार, चैत ७, २०७६ १३:२७