राजदूतावास भन्छन्: विदेशमा रहेका नेपाली श्रमिक कोरोनाबाट सुरक्षित छन्

A+ A A-

कोरोना भाइरस गत डिसेम्बरमा चीनको हुवेई प्रान्तको वुहान शहरमा देखापरेको थियो । यो भाइरस हाल चीनसहित ६७ वटा देशमा फैलिइसकेको छ । यसको सबैभन्दा ठूलो सङ्क्रमण युरोपेली, एसियाली र मध्यपूर्वी देशहरूमा फैलिइरहेको छ ।

यी देशमा नेपाली रोजगारी, अध्ययन र अन्य पेसा व्यवसायका लागि बसोवास गर्दै आएका छन् । युरोपेली देश, एसियाली मुलुक र मध्यपूर्वीका देशमा ३५ लाख नेपाली रोजगारी अध्ययन र अन्य पेसाका गर्दै आएको सरकारी अनुमान छ ।

विदेशमा रहेका नेपालीहरूलाई कोरोना भाइरसबाट बच्नका लागि दूतावासहरूले सूचनामार्फत् सचेत गराइरहेका छन् ।

कोरोना भाइरसको सबैभन्दा ठूलो सङ्क्रमण कोरियामा फैलिएको छ । यो देशमा रहेका नेपालीमा कोरोनाको त्रासमा छन् । कोरियामा रहेका नेपालीहरूमा हालसम्म कोरोना लागेको पुष्टि नभएको कोरियास्थित नेपाली दूतावासले जानकारी दिएको छ ।

यहाँ रोजगारीमा कार्यरत नेपाली श्रमिकहरूको रोजगारदाता कम्पनीले नै कोरोना भाइरसको परीक्षण गराइरहेको दूतावासले जनाएको छ ।

दक्षिण कोरियामा रोजगारीमा कार्यरत श्रमिक र अन्य नेपालीहरूमा अहिलेसम्म कोरोना भाइरसको सङ्क्रमण नभेटिएको कोरियास्थित नेपाली दूतावासका लेवर कन्सुलर डिल्लीप्रसाद बाँस्तोलाले बताए । कोरोना भाइरसका कारण नेपाल फर्किन दूतावासमा नेपालीहरूले सहयोग नमागेको कन्सुलर बाँस्तोलाले बताए ।

‘कोरियामा रहेका नेपालीमा कोरोना भाइरसको त्रास होला । कोरोना भाइरसको सङ्क्रमण नेपालीमा देखा परे दूतावासले उपाचारका लागि यहाँको सरकारसँग पहल गर्नेछ’, उनले भने, ‘नेपालीमा कोरोना सङ्क्रमण देखिए उपचारका लागि पहल गर्न दूतावास तयारी अवस्थामा छ । समस्या आए समाधानका लागि दूतावासले सम्बन्धित ठाउँमा पहल गर्छ । ढुक्क भएर बस्न आग्रह गर्छु ।’

कोरियामा करिब ५० हजार नेपाली रहेको अनुमान छ, जसमा ४२ हजार रोजगारीमा कार्यरत छन् । उनीहरू कोरोनाबाट सुरक्षित रहेको दूतावासले जनाएको छ । कोरोना भाइरसको समस्या भएर कोही नेपाली स्वदेश फर्कन नखोजेको दूतावासले जानकारी दिएको छ ।

कोरोना भाइरसको सङ्क्रमण मलेसियामा पनि फैलिएको छ । मलेसियामा रहेका नेपालीहरू पनि कोरोना भाइरसको त्रासमा छन् । मलेसियास्थित नेपाली दूतावासले यहाँ रोजगारी र बसोवास गर्दै आएका नेपालीहरूलाई कोरोना भाइरसबाट बच्न सूचनामार्फत् अपिल गरिरहेको छ ।

कोरोना भाइरसका कारण मलेसियामा रहेका नेपालीहरूमा त्रास भएको तर सङ्क्रमण भने अहिलेसम्म नदेखिएको मलेसियास्थित नेपाली राजदूत डा. उदयराज पाण्डेले जानकारी दिए । कोरोना भाइरसका विषयमा बरम्बार मलेसियाको स्वास्थ्य विभाग र अस्पतालहरूमा नेपालीमा देखापरेको छ कि छैन भन्ने जानकारी लिइरहेको राजदूत डा. पाण्डेले बताए ।

‘मलेसियामा कोरोना भाइरसको सङ्क्रमण नेपालीमा देखिएको जानकारी आएको छैन । मलेसियाका रोजगारदाता र अस्पतालले पनि नेपालीमा कोरोना देखा नपरेको बताइरहेका छन्’, उनले भने, ‘मलेसियाबाट कोरोना भाइरसको समस्या देखाएर कोही नेपाली फर्कन्छु भनेर दूतावास आवेदन दिन आएका छैन । सङ्क्रमण फैलिए पनि मलेसिया नेपाली सुरक्षित नै छन् ।’

कोरोना भाइरस नेपालीमा देखिए त्यहीँ उपचारका लागि पहल गरिने उनको भनाइ छ ।

हाल मलेसियामा ५ लाख नेपाली रोजगारीमा कार्यरत छन्, जसमा १ लाखभन्दा अवैध रूपमा बसेर काम गरिरहेको दूतावासको अनुमान छ ।

कतारस्थित नेपाली दूतवासले कतारमा रहेका नेपालीलाई कोरोना भाइरसको सङ्क्रमण नदेखिएको जनाएको छ । दूतावासले कतारमा रहेका नेपालीहरूलाई कोरोना भाइरसबाट बच्नका लागि सूचनामार्फत् जानकारी गराइरहेको छ ।

कतारमा रहेका नेपालीमा कोरोना भाइरस सङ्क्रमण भएको हालसम्म पुष्टि नभएको कतारका लागि नेपाली राजदूत नारद भारद्वाज वाग्लले जानकारी दिए । कोरोना भाइरस सङ्क्रमणका विषयमा कतारका नेपाली श्रमिक कार्यरत रोजगारदाता कम्पनी र अस्पतालहरूसँग बारम्बार जानकारी लिएको राजदूत वाग्लले बताए ।

‘कतारदेखि कोरोना भाइरसको समस्या देखाएर कोही स्वदेश फर्कन नचाहेको दूतावासमा आवेदन आएका छन् । कोरोना भाइरस लागे कहाँ जाने र कसरी उपचार गर्ने भनेर दूतावासले जानकारी गराइरहेको छ । कतारमा रहेका नेपालीहरू कोरोनाबाट सूरक्षित छन्’, उनले भने ।

कतारम ४ लाख नेपाली श्रमिक रोजगारीमा कार्यरत छन् ।

यूएईमा कोरोना भाइरसको सङ्क्रमण देखा परे पनि नेपालीहरूमा यसको असर नपरेको यूएईस्थित नेपाली राजदूतावासले जानकारी दिएको छ । दूतावासले कोरोनाको सङ्क्रमण देखापर्न थालेपछि नेपाली रोजगारीमा कार्यरत क्षेत्रका स्वास्थ्यसँग सम्बन्धित निकायसँग जानकारी लिइरहेको जनाएको छ ।

हालसम्म यूएईमा रहेका नेपालीहरूमा कोरोना भाइरस लागेको सूचना दूतावासमा नआएको यूएईस्थित नेपाली राजदूत कृष्णप्रसाद ढकालले जानकारी दिए ।

‘कोरोना भाइरसको सङ्क्रमणको त्रासमा रहेका नेपालीलाई दूतावासले परामर्श र उनीहरू रोजगारीमा कार्यरत क्षेत्रका अस्पतालमा परीक्षण गराउन सल्लाह दिने गरेका छौँ । कोरोना भाइरसको त्रास त होला तर यही समस्याका कारण फर्कन खोजेका भने छैनन् ।’

हाल यूएईमा करिब ३ लाख नेपाली रोजगारीमा कार्यरत छन् ।

नेपालीहरूमा कोरोना भाइरसको सङ्क्रमणका बारेमा सम्बन्धित देशसँग उपचार गर्ने विषयमा छलफल भइरहेको कूटनीतिक नियोगको भनाइ छ ।

यसैगरी खाडीका देश, मलेसिया, युरोप र अफ्रिकी देशमा रहेका नेपालीमा हालसम्म कोरोना भाइरसको सङ्क्रमण नदेखिएको कूटनीतिक नियोगहरूले जानकारी दिएको परराष्ट्र मन्त्रालयले जनाएको छ ।

वैदेशिक रोजगार विभागले कोरोना प्रभावित देशहरूमा श्रम स्वीकृति दिन बन्द गरेको छ । विभागकाअनुसार ८ भन्दा बढी देशहरूमा श्रम स्वीकृति बन्द गरेको हो ।

सोमबार सर्वोच्च अदालतले सोमबार संयुक्त अरब इमिरेट्स, कुवेत, जापान, दक्षिण कोरिया, इटाली, चीनमा जान रोक लगाउन आदेश दिएसँगै ती देश जाने श्रमिकलाई श्रम स्वीकृति दिन स्वतः रोकिएको विभागले जनाएको छ । यस्तै, सरकारले दक्षिण कोरिया, चीन, जापान, इरान र इटालीका नागरिकका हकमा अनअराइभल भिसामा रोक पनि लगाएको छ ।

प्रकाशित मिति: मंगलबार, फागुन २०, २०७६ १२:५५