कोरोना संक्रमित सम्पूर्ण बिरामीको उपचार सरकारले गर्छ : स्वास्थ्यमन्त्री

A+ A A-

स्वास्थ्य तथा जनसंख्यामन्त्री भानुभक्त ढकालले कोरोनाको संक्रमण भएका सम्पूर्ण बिरामीको उपचारको जिम्मा सरकारले लिने बताएका छन् । नेपाल प्रेस काउन्सिल र स्वास्थ्य मन्त्रालयले कोरोना भाइरसका विषयमा आयोजना गरेको एक कार्यक्रममा मन्त्री ढकालले त्यस्ताे बताएका हुन् ।

मन्त्री ढकालले सबै प्रदेशमा भाइरस परीक्षणको व्यवस्था गरिने र कोरोना संक्रमण भएको पाइएमा बिरामीको उपचार गर्ने जिम्मा सरकारले लिने स्पस्ट पारे । उनले भने, ‘रगत परीक्षण गरेर कोरोना संक्रमित हो भन्ने भयो भने अनि बल्ल खकारहरू त्यहाँबाट ल्याएर टेस्ट गर्न सकिन्छ । अनि बिरामीलाई उपचारकाे व्यवस्था कि त्यहीँ गरिन्छ कि यहाँ ल्याएर सरकारले उपचार गर्छ ।

मन्त्री ढकालले निजीक्षेत्रका अस्पतालमा उपचारको व्यवस्था भए पनि पहिलो प्राथमिकता सरकारी अस्पताल नै रहेको बताए । निजी अस्पतालहरूको प्रयोग विदेशी नागरिक तथा कूटनीतिक नियोग र अन्य व्यक्तिहरूका लागि गरिने उनकाे भनाइ छ ।

प्रेस काउन्सिल नेपालका अध्यक्ष किशोर श्रेष्ठले सही सूचना प्रवाह गर्न आग्रह गरे । आचारसंहिता उल्लंघन गर्ने काम नगर्न आग्रह गर्दै अध्यक्ष श्रेष्ठले कोरोनाविरुद्धको लडाइँ आफ्नो जीवनसँग पनि जोडिएकाले गलत प्रचार नगर्न आग्रह गरे । उनले भने, ‘कोरोनाविरुद्धको युद्ध आफ्नै जीवनसँग जोडिएको युद्ध हो । त्यसैले गलत प्रचार गर्दा त्यो गलत हतियारको निशाना सोझिएर आफैँतिर पनि आउन सक्छ ।’

विश्वव्यापी रूपमा बढिरहेकाे कोरोनाको सन्त्रासका सन्दर्भमा स्वास्थ्य मन्त्रालय र प्रेस काउन्सिल नेपालले कोरोना भाइरस संक्रमण र मिडियाको भूमिका विषयमा सचेतामूलक कार्यक्रमको आयोजना गरेका हुन् ।