प्रदेश १ सरकारले गर्‍यो ८ महिनामा २८ प्रतिशत खर्च : कृषिको सबैभन्दा बढी, योजनाको कम

प्रदेश १ सरकारले गर्‍यो ८ महिनामा २८ प्रतिशत खर्च : कृषिको सबैभन्दा बढी, योजनाको कम

A+ A A-

प्रदेश १ सरकारले चालू आर्थिक वर्षको फागुन मसान्तसम्ममा करिब २८ प्रतिशत बजेट खर्च गरेको छ । प्रदेश लेखा नियन्त्रण कार्यालय विराटनगरको तथ्याङ्कअनुसार प्रदेश सरकारले फागुन मसान्तसम्ममा २७.९३ प्रतिशत बजेट खर्च गरेको हो ।

कुल ४२ अर्ब २० करोड रुपैयाँ बजेटमध्ये फागुन मसान्तसम्ममा ११ अर्ब ७८ करोड रुपैयाँ बजेट खर्च भएको हो । प्रदेश सरकारले साढे ३१ प्रतिशत पुँजीगत र २३ प्रतिशत चालू बजेट खर्च गरेको छ ।

प्रदेश सरकारले पुँजीगततर्फ २३ अर्ब ५७ करोड ३९ लाख ३४ हजार रुपैयाँ छुट्याएकामा फागुन मसान्तसम्म ७ अर्ब ४५ करोड ८९ लाख ३३ हजार रुपैयाँ खर्च भएको प्रदेश लेखा नियन्त्रण कार्यालयका सूचना अधिकारी अन्तिमकुमार आचार्यले जानकारी दिए ।

आचार्यले प्रदेश सरकारका मन्त्रालयमध्ये सबैभन्दा बढी पुँजीगत खर्च भूमि व्यवस्था, कृषि तथा सहकारी मन्त्रालयले गरेको छ । भूमि व्यवस्था कृषि तथा सहकारी मन्त्रालयले ४८.८३ प्रतिशत खर्च गरेको छ । यस्तै, सबैभन्दा कम आर्थिक मामिला तथा योजना मन्त्रालयले ४.२७ प्रतिशत पुँजीगत खर्च गरेको छ ।

आन्तरिक मामिला तथा कानुन मन्त्रालयले १४.६६ प्रतिशत, उद्योग, वन तथा वातावरण मन्त्रालयले ६.२९ प्रतिशत खर्च गरेको छ ।

यस्तै, भौतिक पूर्वाधार विकास मन्त्रालयले ३६.९० प्रतिशत, सामाजिक विकास मन्त्रालयले १०.१० प्रतिशत पुँजीगत खर्च गरेको छ ।

मुख्यमन्त्री तथा मन्त्रिपरिषद्को कार्यालयले ६.८१, मुख्य न्यायाधिवक्ताको कार्यालयले ८३.२३, प्रदेश योजना आयोगले ७ प्रतिशत र प्रदेश व्यवस्थापिका सचिवालयले ३२.३० प्रतिशत पुँजीगत खर्च गरेका छन् ।

यस्तै, चालू खर्चतर्फ प्रदेश सरकारले २३.२३ प्रतिशत खर्च गरेको छ । चालूतर्फ कुल १८ अर्ब ६२ करोड बजेट विनियोजन गरेकोमा ४ अर्ब ३२ करोड रुपैयाँ खर्च भएको छ । चालूतर्फ ७ वटा मन्त्रालयमध्ये उद्योग, वन तथा पर्यटन मन्त्रालयले सबैभन्दा बढी ३४.५८ प्रतिशत बजेट खर्च गरेको छ ।

प्रकाशित मिति: बुधबार, चैत ५, २०७६ १७:४७