कुखुरा तस्करी बढ्दो : ८ महिनामा ३ हजार किलो कुखुरा नष्ट

A+ A A-

नेपाली बजारमा कुखुराको मासुको मूल्य बढेपछि भारतबाट अवैध रूपमा कुखुरा तस्करी बढेको छ । रोग परीक्षणबिना भारतबाट दिनहुँ ब्रोइलर कुखुरा भित्रिँदा मानव स्वास्थ्यमा असर पर्ने सम्भावना उच्च छ ।

चालू आर्थिक वर्षको हालसम्म मात्रै सशस्त्र प्रहरीले ६ लाख १७ हजार २ सय ५० मूल्यबराबरका ३ हजार किलोभन्दा बढी अवैध ब्रोइलर कुखुरा बरामद गरी नष्ट गरेको छ ।

पछिल्लो समय भारतका विभिन्न शहरबाट चोर नाका हुँदै अवैध कुखुरा र अण्डा नेपाल भित्रिँदै आएको छ । चालू आर्थिक वर्षको हालसम्म मात्रै सशस्त्र प्रहरी बल ३४ नम्बर गण कैलालीले ६ लाख १७ हजार २ सय ५० मूल्यबराबरको ३ हजार किलोभन्दा बढी अवैध ब्रोइलर कुखुरा बरामद गरी नष्ट गरेको सशस्त्र प्रहरी बल ३४ नम्बर गण कैलालीका गणपति, सशस्त्र प्रहरी उपरीक्षक कमल तिमिल्सिनाले बताए ।

नेपाली बजारमा कुखुराको मूल्य बढेको मौका छोपेर बिचौलियाहरूले भारतबाट अवैध रूपमा कुखुरा भित्र्याउने गरेका छन् । तस्करहरूले नेपालकै कुखुरा भएको दाबी गर्ने गरे पनि आवश्यक अनुसन्धान कारबाही अगाडि बढाइसकिएको तिमिल्सिनाको भनाइ छ ।

नेपाली बजारमा कुखुराको मूल्य बढेको मौका छोपेर बिचौलियाहरूले भारतबाट अवैध रूपमा कुखुरा भित्र्याउने गरेका छन् । छोटो दुरीको सिमाना रहेकाले तस्करहरूले भारतबाट आयात गरेर ल्याएका कुखुरा पनि नेपालकै कुखुरा भएको दाबी गर्ने गरेका छन् । यसरी अवैध रूपमा कुखुरा आयात हुँदा नेपाली कुखुरा व्यवसायी मर्कामा पर्ने कुरा त छँदै छ मानव स्वास्थ्यमा समेत असर परिरहेको छ ।

महँगो दरमा दाना तथा चल्ला खरिद गरेका व्यवसायीहरूले मूल्य बढाएर बिक्री गर्न खोज्दा भारतबाट अवैध रूपमा कुखुरा भित्र्याउने तस्करहरूले सस्तो मूल्यमा बिक्री गरिदिँदा व्यवसायी मर्कामा परेको कुखुरा तथा अण्डा उत्पादक संघ कैलालीका अध्यक्ष भुवन पाण्डेयले बताए ।

भारतबाट अवैध रूपमा आयात हुने कुखुरामा बर्डफ्लूको सम्भावना बढी हुने भएकाले नेपाली कुखुराको मासु नै सेवन गर्न चिकित्सकले सल्लाह दिएका छन् । बिनापरीक्षण आयात गरिने भएकाले भारतबाट ल्याइएका कुखुराको मासु नखान धनगढी उपमहानगरपालिका पशु सेवा शाखाका पशु चिकित्सक समीर ठाकुर सल्लाह दिन्छन् ।

कुन महिनामा कति कुखुरा बरामद ?

सशस्त्र प्रहरी बल ३४ नम्बर गण कैलालीका अनुसार चालू आवको साउनमा ९७ हजार ६ सय, भदौमा ९३ हजार ७ सय ५०, असोजमा २४ हजार, कात्तिकमा ३६ हजार ५ सय, मङ्सिरमा ९ हजार ६ सय रुपैयाँ मूल्यबराबरका अवैध कुखुरा बरामद गरी नष्ट गरिएको छ ।

त्यस्तै, पुसमा कुखुरा नभित्रिए पनि माघमा ५८ हजार ५ सय र फागुनमा २ लाख ९७ हजार ३ सय रुपैया मूल्यबराबरका कुखुरा बरामद गरी नष्ट गरिएको छ । यसरी चालू आर्थिक वर्षको ८ महिनामा ६ लाख १७ हजार २ सय ५० रुपैयाँ मूल्यबराबरका अवैध कुखुरा बरामद गरी नष्ट गरिएको सशस्त्र प्रहरीले जनाएको छ ।

प्रकाशित मिति: बुधबार, चैत ५, २०७६ १७:३७