डडेल्धुरा उवासंघका अध्यक्षलाई पक्राउ गरी कारबाही गर्न माग

A+ A A-

डडेल्धुराको अमरगढी नगरपालिका क्षेत्रमा बजार अनुगमनका क्रममा डडेल्धुरा उद्योग वाणिज्य संघ (उवासंघ) ले अवरोध गरेको भन्दै उपभोक्ता हित संरक्षण मञ्च नेपाल सुदूरपश्चिम प्रदेश समितिले जिल्ला प्रशासन कार्यालय डडेल्धुरालाई ध्यानाकर्षण गराएको छ ।

अमरगढी नगरपालिका क्षेत्रमा नगरपालिकाको बजार अनुगमन समितिको तर्फबाट मंगलबार भएको बजार अनुगमनका क्रममा डडेल्धुरा उद्योग वाणिज्य संघका तर्फबाट अवरोध सिर्जना भएको भन्दै समितिले ध्यानाकर्षण गराएको हो ।

‘उपभोक्तालाई स्वच्छ उपभोग्य सामान उपलब्ध गराउन र कोरोना संक्रमणका कारण सामान आयात नहुने ठानेर वस्तुहरू लुकाएर बजारमा कृत्रिम अभाव सिर्जना गर्ने काम भइरहेको सूचनाका आधारमा नगरपालिकाले स्थानीय सरकार सञ्चालन ऐन २०७४ ले दिएको अधिकार प्रयोग गरी बजार अनुगमन गर्दा आफूलाई जानकारी नदिएरै बजार अनुगमन गरिएको भन्दै उद्योग वाणिज्य संघको तर्फबाट भएको अवरोध उपभोक्ता हितविरोधी गतिविधि भएको ठहर गर्दै उपभोक्ता हित संरक्षण मञ्च नेपाल सुदूरपश्चिम प्रदेश समिति सो घटनाप्रति घोर भत्र्सना गर्दछ’ उपभोक्ता हित संरक्षण मञ्च नेपाल सुदूरपश्चिममा प्रदेश सचिव भोजराज जोशीद्वारा हस्ताक्षरित विज्ञप्तिमा भनिएको छ ।

विज्ञप्तिमा अगाडि भनिएको छ, ‘बजार अनुगमन गर्दा अधिकार प्राप्त निकायले कसैलाई जानकारी नदिएर पनि गर्न सक्ने कुरा कानुनमै उल्लेख भएकाले बजार अनुगमन गर्न जाँदा कसैलाई पूर्वजानकारी दिनु आवश्यक होइन ।’

विज्ञप्तिमा उपप्रमुख संगीता भण्डारी र प्रमुख प्रशासकीय अधिकृत लक्ष्मीराज उपाध्यायसहितको टोलीमाथि गालीगलौज तथा दुव्र्यवहार गर्ने डडेल्धुरा उद्योग वाणिज्य संघका अध्यक्ष लोकराज भट्टलाई प्रक्राउ गरी तुरुन्त कारबाही गर्न मागसमेत गरिएको छ ।