विद्यार्थी बोक्ने बसको गुणस्तर र समय अध्ययन गर्न कार्यदल

A+ A A-

टाढा–टाढादेखि घन्टौँसम्म विद्यार्थी ओसारेर ट्राफिक व्यवस्थापन नै अस्तव्यस्त पार्ने उपत्यकाका स्कुल बसलाई टाइम कार्ड लागू हुने भएको छ । ट्राफिक प्रहरीले बिहान ९ बजेभित्र विद्यालय प्रवेश गरिसक्नुपर्ने र अपराह्न ३ बजे छुट्नुपर्ने टाइम कार्ड लागू गर्न लागेको हो ।

ट्राफिक प्रहरी महाशाखा प्रमुख एसएसपी भीमप्रसाद ढकालले आगामी वैशाखदेखि टाइम कार्ड लागू हुने बताए । ‘विद्यार्थी बोकेको बस बिहान ९ बजेभित्र विद्यालय प्रवेश गरिसक्नुपर्ने र अपराह्न ३ बजे छुट्नुपर्ने टाइम कार्ड वैशाखदेखि लागू गर्न लागिएको छ,’ एसएसपी ढकालले भने, ‘सरोकारवालासँग छलफल गरेरै निर्णय भएको हो ।’

यो निर्णय कार्यान्वयन तथा विद्यार्थी बोक्न कस्तो बस प्रयोग गर्नेलगायत अन्य सुधारका लागि कार्यदल पनि बनेको उनले बताए ।

प्रधानमन्त्री कार्यालयबाट जारी भएको ‘काठमाडौं उपत्यकाको ट्राफिक व्यवस्थापनसम्बन्धी अल्पकालीन योजना, २०७६’ ले विद्यालय बस बिहान ९ बजेसम्म प्रवेश गरिसक्नुपर्ने र ३ बजेसम्म सञ्चालन हुने उल्लेख भएपछि कसरी कार्यान्वयन गर्ने भन्ने विषयमा कार्यदल बनेको हो ।

आइतबार बनेको कार्यदलमा शिक्षा मन्त्रालयका विद्यालय महाशाखा प्रमुख, ट्राफिक प्रहरी, प्याब्सन, एनप्याब्सन, अभिभावकलगायत सरोकारवाला छन् । विद्यालय बसको व्यवस्थापनलगायत विषयमा सोमबार प्रधानमन्त्री कार्यालयमा समेत छलफल भएको थियो ।

‘विद्यार्थी बोक्न प्रयोग भएका बसलगायत विकृतिका विषयमा समेत निचोडमा पुग्न कार्यदल बनेको छ,’ एसएसपी ढकालले भने । विद्यार्थी बोक्न पहेँले रङको बस प्रयोग गर्नुपर्ने भए पनि ठूला भनिएकै निजी विद्यालयले भाडा (कालो प्लेट) का थोत्रा गाडीमा ओसार्दै आएका छन् ।

शिक्षा मन्त्रालयका विद्यालय महाशाखा प्रमुख कृष्णप्रसाद कार्कीले बस सञ्चालनको समयका विषयमा ट्राफिक व्यवस्थापनसम्बन्धी अल्पकालीन योजनामा उल्लेख भएको र कार्यान्वयन कसरी गर्ने भन्ने विषयमा अध्ययन गरेर प्रतिवेदन दिइने बताए ।

प्रकाशित मिति: बुधबार, चैत ५, २०७६ ०६:१५