डडेल्धुराका कर्मचारी भन्छन् : ‘प्रजिअबाटै असुरक्षित महसुस भएको छ’

A+ A A-

अमरगढी नगरपालिकाका कर्मचारीले प्रमुख जिल्ला अधिकारी जगन्नाथ पन्तबाटै असुरक्षित रहेको बताएका छन् । मंगलबार पत्रकार सम्मेलन गर्दै उनीहरूले यस्तो बताएका हुन् ।

आइतबार बजार अनुगमनका क्रममा नगरपालिकाका प्रमुख प्रशासकीय अधिकृत लक्ष्मीप्रसाद उपाध्यायलाई गरिएकोे दुव्र्यवहारप्रति कर्मचारीहरूले आपत्ति प्रकट गरेका छन् ।

आइतबार बजार अनुगमनका क्रममा डडेल्धुरा उद्योग वाणिज्य संघका अध्यक्ष लोकराज भट्टलगायतबाट नगरपालिकाका प्रमुख प्रशासकीय अधिकृत उपाध्यायमाथि भएको गालीगलोज, बेइज्जती र हातपात प्रयासप्रति कार्मचारीहरूले गम्भीर आपत्ति प्रकट गरेका हुन् ।

प्रमुख प्रशासकीय अधिकृत उपाध्यायमाथि दुव्र्यवहार हुँदा प्रत्यक्षदर्शी एवम् प्रमुख जिल्ला अधिकारी जगन्नाथ पन्त मुकदर्शक बनेको आरोप कर्मचारीहरूले लगाएका छन् ।

‘प्रमुख प्रशासकीय अधिकृतमाथि दुव्र्यवहार हुँदा प्रत्यक्षदर्शी एवम् कर्मचारीका अभिभावक प्रमुख जिल्ला अधिकारीज्यू घटनाका बखत मुकदर्शक रहनु र सञ्चार माध्यमबाट अनुगमनका बारेमा आफू जानकार नरहेको अभिव्यक्ति दिनुले हामी कर्मचारीहरूलाई दुःखी बनाउनुका साथै असुरक्षित महसुस गराएको छ’, अमगढी नगरपालिकाका कार्मचारीहरूद्वारा जारी विज्ञप्तिमा भनिएको छ ।

दुव्र्यवहार गर्ने व्यक्तिलाई कानुनबमोजिम २ दिनभित्र कारबाहीका लागि सम्बद्ध पक्षको ध्यानाकर्षणसमेत कर्मचारीहरूले गराएका छन् । कर्मचारीहरूले गिरेको मनोबल र असुरक्षा साथमा राखी लामो समय सेवा प्रवाह गर्न नसकिने र आगामी दिनमा थप सङ्घर्षका कार्यक्रमहरू अगाडि बढाउन बाध्य हुने चेतावनी दिएका छन् ।

के हो घटना ?

विश्वव्यापी रूपमा फैलिँदै गएको कोरोना भाइरस (कोभिड– १९)को माहामारी फैलिँदा बजारमा कालोबजारी बढेको गुनासो बढेपछि डडेल्धुराको बागबजारमा अनुगमन गरिएको थियो । आइतबार जिल्ला सदरमुकामका बजार क्षेत्रमा अनुगमन गरिरहँदा उद्योग वाणिज्य संघ डडेल्धुरासँग विवाद उत्पन्न भएपछि अनुगमन स्थगित गरिएको थियो ।

त्यसपछि डडेल्धुरा उद्योग वाणिज्य संघले पत्रकार सम्मेलनको आयोजना गरी अमरगढी नगरपालिकाले व्यापारीहरूलाई दुःख दिने ढंगले बजार अनुगमन गरेको भन्दै आपत्ति जनाएको थियो ।

बजार अनुगमनका क्रममा उद्योग वाणिज्य संघ डडेल्धुराका अध्यक्ष लोकराज भट्ट र अमरगढी नगरपालिकाका प्रमुख प्रशासकीय अधिकृत लक्ष्मीप्रसाद उपाध्यायबीच ‘भनाभन’समेत भएको थियो ।

व्यवसायीहरूलाई दुःख दिन बजार अनुगमन : उद्योग वाणिज्य संघ

नगरपालिकाले व्यवसायीहरूलाई दुःख दिने, धम्क्याउने, तर्साउने कार्य गरेको भन्दै उक्त घटनाको उद्योग वाणिज्य संघले घोर भत्र्सना गरेको छ । उद्योग वाणिज्य संघलाई जानकारी नदिई एकलौटी रूपमा बजार अनुगमन गरेको र व्यापारीलाई दुःख दिने तरिकाले बजार अनुगमन गरिएको भन्दै संघले भत्र्सना गरेको हो ।

‘कोरोना भाइरसको सङ्क्रमण रोक्ने सरकारी अभियानमा हाम्रो पूर्ण साथ र समर्थन रहेको समयमा यस जिल्लाका उद्योगी, व्यवसायीहरूले अतिआवश्यक दैनिक उपभोग्य वस्तुहरूको मूल्य वृद्धि नगरी अतिआवश्यक परिणाम सहज रूपमा उपलब्ध गराइरहेको अवस्थामा अमरगढी नगरपालिकाका प्रमुख प्रसासकीय अधिकृत लक्ष्मीप्रसाद उपाध्यायले अनुगमनको नाममा गलत नियत राखी अमरगढी नगरपालिका– ५ बागबजार क्षेत्रका व्यवसायीहरूलाई दुःख दिने, धम्क्याउने, तर्साउने कार्य गरेकाले उक्त कार्यको डडेल्धुरा उद्योग वाणिज्य संघ घोर भत्र्सना गर्दछ’, डडेल्धुरा वाणिज्य संघले जारी गरेको विज्ञप्तिमा उल्लेख छ ।

साथै, छिमेकी राष्ट्र भारत र चीनका नाकाहरू बन्द भइरहेको विद्यमान परिस्थितिमासंघले सम्पूर्ण उद्योगी व्यवसायीहरूसँग पटक–पटक छलफल गरी कृत्रिम अभाव, कालोबजारी, मूल्य वृद्धि हुन नदिन र सामाजिक उत्तरदायित्व निभाई आमनागरिकलाई आपतकालीन अवस्थामा पूर्ण सहयोग गर्न प्रतिबद्धता व्यक्त गरेको छ ।

यस्तो असहज परिस्थितिमा कतै कसैबाट पनि मौकाको फाइदा नउठाउन पनि विज्ञप्तिमार्फत् संघले व्यवसायीहरूमा आग्रह गरेको छ ।

सरकारले कुनै पनि खालका सभा, सम्मेलन, भोज, भतेर गर्न रोक लगाएका बेला नगरपालिकाले दर्जनौँ कर्मचारी र सुरक्षाकर्मी खटाई खाद्य प्रविधि गुण, म्याद नाघेका माल समान, कालोबजारी भन्दा पनि दुःख दिने नियतले अण्डा, गुड, मिठाईमा उत्पादन मिति, बजारमा डोजर चलाउने, गत भदौ महिनाको बिक्री मिति देखाउन भन्दै व्यापारीलाई डर र त्रास देखाउने निन्दनीय काम भएको उद्योग वाणिज्य संघका अध्यक्ष लोकराज भट्टले बताए ।

अनुगमनका विषयमा उपप्रमुखसँग बुझ्दा कुनै जानकारी नभएको प्रतिक्रिया दिएको उनले बताए । नगर प्रमुख बजार अनुगमनमा थिएनन् भने उपप्रमुख अनुगमनमै भए पनि प्रमुख प्रशासकीय अधिकृतलाई बुझेर खबर गर्ने बताएको उनको भनाइ थियो ।

प्रमुख प्रशासकीय अधिकृतसँग बुझ्दा प्रमुख जिल्ला अधिकारीसँग कुरा गर्न भनेको र प्रमुख जिल्ला अधिकारीसँग कस्तो खालको बजार अनुगमन हो ? भनी बुझ्दा आफूलाई पनि कुनै जानकारी नरहेको र अनुगमनका क्रममा बाटो परेर सहभागी भएको प्रतिक्रिया दिएको अध्यक्ष भट्टले पत्रकार सम्मेलनमा जानकारी गराए ।

प्रमुख जिल्ला अधिकारीको निर्देशनमा बजार अनुगमन

बजार अनुगमनामा अमरगढी नगरपालिकाका उपप्रमुख सङ्गीता भण्डारी, प्रमुख प्रशासकीय अधिकृत लक्ष्मीप्रसाद उपाध्याय, अमगढी नगरपालिका स्वास्थ्य शाखाका प्रतिनिधि, जिल्ला प्रशासनका प्रतिनिधि, करदाता सेवा कार्यालय डडेल्धुराका प्रमुखलगायतको सहभागितामा बजार अनुगमन गरिँदै थियो ।

यस विषयमा बुझ्न खोज्दा डडेल्धुराका प्रमुख जिल्ला अधिकारी जगन्नाथ पन्तले अमरगढी नगरपालिकाले गरेको अनुमगनमा गए पनि आफूलाई यसबारेमा पूर्ण जानकारी नभएको प्रतिक्रिया दिए ।

‘यस विषयमा मलाई त्यति थाहा छैन । हामीले कार्यालयबाट एक जना प्रतिनिधि पठाएका थियौँ । बजारमा अनुगमन गरिरहेको देखेपछि म पनि एकछिन सहभागी भएको हुँ’, उनले भने ।

तर, अमरगढी नगरपालिकाका प्रमुख प्रशासकीय अधिकृत उपाध्ययले भने प्रमुख जिल्ला अधिकारीको निर्देशनमा बजार अनुगमन गरिएको बताएका छन् । प्रमुख जिल्ला अधिकारी पन्तकै निर्देशनमा बजार अनुगमन गरिएको पत्रकार सम्मेलनमा प्रमुख प्रशासकीय अधिकृत उपाध्यायले जानकारी दिए ।

उनले बजार अनुगमनका बारेमा नगर प्रमुख विश्वेश्वरप्रसाद ओझालाई समेत आफूले जानकारी गराएको दाबी गरेका छन् । बजारमा गएर व्यापारीहरूलाई दुःख दिने, धम्क्याउने, तर्साउने काम आफूले नगरेको समेत उनले जिकिर गरेका छन् ।

अमरगढी नगरपालिकाले भने उद्योग वाणिज्य संघले भनेजस्तो गतिविधि र व्यापारीहरूसँग नराम्रो व्यवहार नगरेको जनाएको छ । अमरगढी नगर प्रमुख ओझाले पनि यहाँका व्यापारीहरूका पीरमर्काहरू आफूहरूले बुझेको तर व्यवसायीहरूलाई दुःख दिने, धम्क्याउने, तर्साउने कार्य नगरेको बताए ।

बजारमा कालोबजारी भएको जनगुनासो आएपछि बजार अनुगमन गरिएको उनको भनाइ छ । ‘बजारमा कालोबजारी भइरहेको छ भन्ने गुनासो आएको थियो । त्यही भएर नगरपालिकाको टोलीले अनुगमन गरेको हो’, उनले भने ।

प्रमुख जिल्ला अधिकारी पन्तकै निर्देशनमा अमरगढी नगरपालिकाले कार्यविधिअनुरूप बजार अनुगमन गरिएको जनाएको छ । प्रमुख जिल्ला अधिकारीको समन्वयमा अमरगढी नगरपालिकाले अनुगमनको व्यवस्थापन गरेको प्रमुख प्रशासकीय अधिकृत उपाध्यायले जानकारी दिए ।

गैरजिम्मेवार प्रमुख जिल्ला अधिकारी !

डडेल्धुरा बजार अनुगमनमा प्रायः सहायक प्रमुख जिल्ला अधिकारी संलग्न रहने गरेको विगतको इतिहास छ । स्थानीय तहमा अधिकार प्रत्यायोजन हुनुपूर्व सहायक प्रमुख जिल्ला अधिकारीको नेतृत्वमा बजार अनुगमन समिति रहने प्रावधान थियो ।

तर, स्थानीय तहमा अधिकार प्रत्यायोजन भइसकेपछि अहिले कुनै पनि स्थानीय तहका उपप्रमुख÷उपाध्यक्षको संयोजकत्वमा बजार अनुगमन समिति रहने व्यवस्था छ ।

प्रमुख जिल्ला अधिकारी पन्तले आफैँले बजार अनुगमन गर्ने निर्देशन दिए पनि उनीसँग कुरा गर्दा उनले आफूलाई यसबारेमा जानकारी नभएको बताए । बजार अनुगमनका बारेमा जानकारी नभए पनि प्रमुख जिल्ला अधिकारी स्वयम् बजारमा आएपछि ‘गैरजिम्मेवार प्रमुख जिल्ला अधिकारी’ भन्दै चर्को आलोचना भएको छ ।

विश्वव्यापी रूपमा सङ्क्रमण फैलिएको कोरोना भाइरसका कारण उत्पन्न परिस्थितिमा बजारको अवस्थाका विषयमा स्वयम् उपस्थित भई जानकारी लिनु गलत पनि थिएन । तर, उनले बजार अनुगमनको पाटोलाई मात्र नभई केही व्यापारीहरूले गरेका व्यवस्थापकीय पक्षमा समेत मुख खोलेपछि व्यापारीहरूमा उनको शब्दले नाकारात्मक प्रभाव प¥यो, जुन बजार व्यवस्थापनको मुख्य विषयवस्तुप्रति लक्षित थियो ।

बजारमा रहेको अव्यवस्थित पार्किङ, पसलबाहिर सडक छेउसम्म राखिएको सामग्री तथा खोकाछाप्रा निर्माण र घरको माथिल्लो तल्लामा उक्लिन बनाइएको सिँढीका विषयले केही व्यक्तिहरूमा तनाव भइरहेको थियो । केहीलाई त प्रमुख जिल्ला अधिकारीको अगाडि पछाडिका सुरक्षाकर्मीहरूको उपस्थितिले पनि असहजता भइरहेको थियो ।

यसै क्रममा उद्योग वाणिज्य संघका अध्यक्ष लोकराज भट्टको नेतृत्वमा केही पदाधिकारीहरूले प्रमुख प्रशासकीय अधिकृत उपाध्यायलाई अभद्र व्यवहार गरे । उनीमाथि बजार अनुगमनको क्रममा व्यापारीहरूलाई आतङ्कित पारेको भन्दै हातपातको प्रयाससमेत भयो ।

केही समय सँगसँगै अनुगमनमा रहेको उद्योग वाणिज्य संघको उक्त टोलीले व्यक्तिगत रूपमा प्रमुख प्रशासकीय अधिकृतलाई ‘बाहिरको मान्छे दादागिरी गर्ने ?’ भन्दै हप्काए ।

प्रमुख प्रशासकीय अधिकृत उपाध्याय भने आफू कार्यविधिभन्दा बाहिर नगएको स्पष्टीकरण दिइरहेका थिए । तर, उद्योग वाणिज्य संघको उक्त टोलीले प्रमुख प्रशासकीय अधिकृतलाई इङ्गित गर्दै बजार अनुगमन स्थगित गर्न दबाब दियो ।

सँगै रहेका प्रमुख जिल्ला अधिकारीले भने विवादको विषयलाई सामाधान गर्न नसकेको र जिम्मेवार हुनुपर्ने स्थानमा एक सरकारी कर्मचारीमाथि गरिएको व्यवहार प्रमुख जिल्ला अधिकारीको सामुन्ने रमिता बनेको एक कर्मचारीको गुनासो छ ।

‘यसरी एकाएक अनुगमन स्थगन गर्नु र त्यसका विषयमा कुनै चासो नदेखाउनु प्रमुख जिल्ला अधिकारीको गैरजिम्मेवारी भएको प्रष्ट भएको छ’, ती कर्मचारीको भनाइ छ ।

प्रकाशित मिति: मंगलबार, चैत ४, २०७६ १७:४८