सदरमुकाममै बत्ती बलेन, १ वर्षमा सक्नुपर्ने काम ७ वर्षमा पनि सकिएन

A+ A A-

बाजुरा जिल्लाको सदरमुकामकै जनताले विद्युतको उज्यालो पाएका छैनन् । जिल्लाको सदरमुकाम बडिमालिका नगरपालिका– ८ मा विद्युतीकरणका लागि नेपाल विद्युत् प्राधिकरणले ठेक्का दिएको सात वर्ष बितिसक्दासमेत यहाँका जनताले विद्युतको उज्यालो पाउन नसकेका हुन् ।

विद्युत् लाइन विस्तारका लागि प्राधिकरणले २०७१ सालमा ठेका प्रक्रियाबाट अछामको कुवर बिल्डक्सलाई जिम्मा दिएको थियो ।

बिल्डक्सका सञ्चालक खम्ब कुँवरको लापरवाहीका कारण प्रसारण लाइन विस्तारको काममा ढिलाइ भएको प्राधिकरण अछामका प्रमुख बिजय रेग्मीले बताए ।

तत्कालीन समयमा बाजुरा जिल्लामा प्राधिकरणको कार्यालय नभएकाले अछामबाट काम गरेको र अहिले बाजुरामा कार्यालय हुँदासमेत उक्त कामको दायित्व हस्तान्तण हुन नसक्दा थप समस्या भएको कुरा बाजुरा शाखाका प्रमुख महेश चन्द्र भट्टले बताए ।

‘सदरमुकामभित्रकै भाग भए पनि उज्यालो बल्न पाइएको छैन । ठेकेदारले काम गरिदेला र उज्यालो बाल्न पाइएला भन्ने आशा थियो । तर, ७/७ वर्षसम्म काम नहुँदा जागेको आशा पनि मरेको छ,’ स्थानीय लालबहादुर रावलले बताए । विद्यालय जाने विद्यार्थीहरू र विद्युतबाट हुने कुनै पनि सेवा यहाँका स्थानीयले लिन नपाएको गुनासो छ ।

‘हाम्रो घरमा विद्युत् नहुँदा मोबाइल चार्ज गर्नसमेत बजार जानुपर्ने समस्या छ । पटक–पटक पहल गर्दा सरकारले योजना दियो, अब ठेकेदारले हामीलाई फसायो, केही काम गरी दिएन, काम अलपत्र छोडेको छ केही काम हुँनै सकेको छैन,’ स्थानीय वीरेन्द्र रावलले बताए । अहिलेको जमानामा हरेक खालका विकास भएको छ ।

‘प्राधिकरणले डुग्रीका लागि ल्याएका पोलहरू अहिले मार्तडीको सडकमा अलपत्र छन्, काम सुरू हुने टुङ्गो छैन, हामीले विद्युत् बाल्न पाएका छैनौँ, सरकारले विद्युत् खपत भएको छैन भनेको छ तर यहाँ हाम्रो घरमा विद्युतको लाइन नै जडान भएको छैन,’ भीमबहादुर रावलले बताए ।

‘सदरमुकामको वडाको ठूलो बस्ती अँध्यारोमा बस्नुपरेको छ । यस विषयमा नेपाल विद्युत् प्राधिकरणलाई पटक–पटक अनुरोध गरेका छौँ, त्यसको सुनुवाइ अहिलेसम्म भएको छैन । हामी जनप्रतिनिधले अनुरोध गर्ने हो । प्राधिकरणका कर्मचारीले कानमा तेल हालेर सुतेका छन्,’ बडिमालिका नगरपालिका– ८ का वडा अध्यक्ष प्रकाश रावलले बताए ।

नेपाल विद्युत् प्राधिकरणले उक्त प्रसारण लाइनको ठेक्का १ वर्षमा सक्ने गरी दिएको थियो । ‘ठेकेदारले थुप्रो पटक म्याद थप्दै आयो, अहिले कामै छोडेर मतलब नै गरेको छैन । भुक्तानी लिन आएको भए उसको रकमबाट पेनाल्टी काट्नु हुन्थ्यो, त्यसो पनि भएन । अहिले त्यो काम नै अलपत्र छ । अब नयाँ ठेक्का खोलेर काम गर्ने योजनामा छौँ,’ विद्युत् प्राधिकरण अछामका प्रमुख विजय रेग्मीले बताए ।

प्रकाशित मिति: सोमबार, चैत ३, २०७६ १५:३२