‘बैंकका शाखा मात्रै पुगे, पहुँच पुगेन’

A+ A A-

वाणिज्य बैंकहरू नेपालका ७ सय ४५ वटा स्थानीय तहमा पुगे पनि सर्वसाधारण अझै बैकिङ पहुँचमा पुग्न नसकेको सरोकारवालाहरूले बताएका छन् ।

आइतबार काठमाडौंमा सञ्चार केन्द्रले आयोजना गरेको ‘नेपालको बैंकिङ क्षेत्रको वर्तमान अवस्था र राष्ट्र बैंकको भावी नेतृत्व’ विषयक अन्तर्क्रियामा सहभागी सरोकारवालाहरूले सर्वसाधारणले महसुस गर्ने गरी अझै बैंक विस्तार नभएको त्यस्तो भनाइ राखेका हुन् ।

नेपाल राष्ट्र बैंक पछिल्लो समय समस्याले जकडिएको बताउँदै बैंक प्रभावकारिता नदेखिएको कृषि विकास बैंकका पूर्वकार्यकारी प्रमुख जनकराज साहले बताए ।

उनले भने, ‘अब आउने गभर्नरको पहिलो चुनौती नै बैंक र सर्वसाधारणबीच रहेको खाडल पुर्नु नै हुन्छ ।’

राष्ट्र बैंकको स्वायत्ततामाथि प्रश्न उठिरहेको बेला राजनीतिक हालीमुहालीबाट गभर्नर नियुक्ति गर्नु झन् खतरापूर्ण हुने पूर्वगभर्नर हिमालयशमशेर जबराको भनाइ छ । राष्ट्र बैंकमा अर्थ मन्त्रालय हावी हुने अवस्था सिर्जना हुँदा पनि गभर्नर नियुक्तिमा राजनीतिक चलखेल हुनुले बैंक थप कमजोर बन्ने उनले बताए ।

यता बैंकर्स एसाेसिएसन नेपालका अध्यक्ष भुवन दाहालले भने बैंकिङ पहुँच नपुगेको कुरालाई खण्डन गर्दै नेपालमा ३ करोड ११ लाख नेपालीको खाता बैंकमा रहेको बताए । ६१ प्रतिशत जनता बैंकिङ पहुँचमा पुगेको र पछिल्लो ७ महिनामा मात्र ४० लाखले नयाँ खाता खोलेको बताउँदै उनले बैंकिङ पहुँच विस्तार हुँदै गएको बताए ।

कार्यक्रममा कृषि विकास बैंकका अध्यक्ष लक्ष्मीप्रपन्न निरौलाले नेपालका बैंक उच्च घरानालाई मात्र कर्जा प्रवाह गर्न प्रतिस्पर्धा गरिरहेको भन्दै कर्जा प्रवाह गर्दा सर्वसाधारणलाई प्राथमिकतामा राख्नुपर्नेमा जोड दिए ।

ब्रिक बैंकिङबाट क्लिक बैंकिङमा नेपाली बैंक पुगिसकेको भन्दै भुक्तानी प्रणालीलाई थप मजबुत बनाउनुपर्नेमा बैंकरहरूले जोड दिएका छन् ।

प्रकाशित मिति: आइतबार, चैत २, २०७६ १९:४०