तानसेन–बुटवल सडक खण्डमा घुम्ती काट्न सुरु, ३ सिफ्ट सडक बन्द

A+ A A-

सिद्धार्थ राजमार्गको तानसेन–बुटवल खण्डका घुम्ती कटान गरेर सडक स्तरोन्नति गर्ने काम सुरु भएको छ । १२ चैतसम्म दैनिक ८ घण्टा सडक बन्द गरेर घुम्ती कटान गरिने डिभिजन सडक कार्यालयले जनाएको छ ।

बिहान ७ देखि ९ बजेसम्म, दिउँसो १२ देखि ३ बजेसम्म र राति ८ देखि ११ बजेसम्म ३ सिफ्ट सडक बन्द गरेर घुम्ती कटानको काम सुरु भएको डिभिजन सडक कार्यालय पाल्पाले बताएको छ । सडक स्तरोन्नति गर्दा सडक अवरुद्ध हुने भएकाले वैकल्पिक सडक मार्ग प्रयोग गर्न जिल्ला ट्राफिक प्रहरी कार्यालय पाल्पाले अनुरोधसमेत गरेको छ ।

पत्रे चट्टान रहेको उक्त सडक खण्डमा धेरै घुम्ती रहेका छन् । २०२१ सालमा बनेको सिद्धार्थ राजमार्ग कडा चट्टानकै कारण विस्तार हुन सकेको थिएन । साँघुरो र घुमाउँरो सडक भएपछि घुम्ती कटान गर्न पाल्पामा सर्वदलीय बैठक बसेर सडक बन्द गर्ने निर्णय गरिएको हो ।

यात्रुलाई समस्या नपर्ने गरी काम गर्ने र सडक खुल्ने समय तोकेको डिभिजन सडक कार्यालयका प्रमुख मुकुन्दराज अधिकारीले जानकारी दिए । सडक सुधारको कामका बेला आमसर्वसाधारणलाई असहज नहोस् भनी तालिकाअनुसार सूचना सार्वजनिक गरी निर्माण कार्य थालेको उनले बताए । सडक बन्द हुँदा सर्वसाधारणले चरङगे–झुम्साको सडक प्रयोग गरिरहेका छन् ।

जोरधारा, कालिमाटीबाट डुम्रेसम्म जोखिमपूर्ण क्षेत्रमा अत्यधिक दुर्घटना हुने घुम्ती मोड भएकाले सडक डिभिजन कार्यालयले १ करोड २० लाख रुपैयाँको बजेटमा घुम्ती कटान गर्न थालेको हो ।

घुम्ती मात्र होइन, यो सडकमा खाल्डाखुल्डी भएकाले पनि दुर्घटनाको जोखिम धेरै छ । ‘खाल्डा पुर्ने र मर्मतको काम भइरहेको छ । त्योबाहेक अहिले सडक नै बन्द गरेर हामीले घुम्ती कटान गरेर फराकिलो बनाउने गरी काम सुरु गरेका हौँ,’ प्रमुख अधिकारीले भने ।

यो सडकहुँदै पाल्पा, गुल्मी, स्याङ्जा, बाग्लुङ, अर्घाखाँचीलगायतका पहाडी जिल्लामा दैनिक २ हजारदेखि ३ हजारसम्म सानाठूला सवारी गुड्ने गर्दछन् । घुम्ती कटान गरेपछि सिद्धबाबा खण्डको सडक स्तरोन्नति गरिने बताइएको छ । कार्यालय प्रमुख अधिकारीका अनुसार तल्लो सिद्धबाबादेखि दोभानसम्म बिग्रिएको सडक मर्मतका लागि ५ करोड रुपैयाँ बजेट छुट्टिएको र चालू आर्थिक वर्षमै मर्मतको काम सुरु हुनेछ ।

मृत्युमार्गका रूपमा चिनिने सिद्धबाबा खण्डमा संघीय सरकारले सुरुङ मार्ग बनाउने योजना समावेश गरेको छ । सिद्धबाबाको मन्दिर क्षेत्रमा २ किलोमिटर सुरुङ निर्माण गर्न विस्तृत परियोजना प्रतिवेदन (डीपीआर) तयार भइसकेको छ । स्विस सरकारको सहयोगमा सुरूङमार्ग बनाउने गरी अध्ययन गरिएको छ । सुरुङ मार्ग निर्माण गर्न सरकारले १० अर्ब रुपैयाँ बजेट विनियोजनसमेत गरेको छ ।

प्रकाशित मिति: आइतबार, चैत २, २०७६ १९:१८