७ वटै प्रदेशमा कोरोना परीक्षण ल्याब चाहियो : मुख्य मन्त्रीहरू

A+ A A-

संघीय सरकार र ५ वटा प्रदेशका मुख्यमन्त्रीले ७ वटै प्रदेशमा कोरोना भाइरस परीक्षण गर्न ल्याब स्थापना गर्नुपर्ने माग गरेका छन् ।

प्रदेश सरकारलाई कोरोना भाइरससँग लड्न बजेटको आवश्यकता भएको र उक्त बजेट संघीय सरकारले उपलब्ध गराइदिनुपर्ने बताएका छन् ।

प्रदेश सरकारले आफ्नातर्फबाट तयारी गरिरहेको भए पनि प्रदेश सरकारको बजेटले अपुग भएको खण्डमा बजेट उपलब्ध गराउनुपर्ने कुरा राखेको बागमती प्रदेशका सामाजिक विकासमन्त्री युवराज दुलालले बताए ।

कोरोना भाइरस नेपालमा आए कसरी रोकथाम गर्ने भन्ने विषयमा ५ वटा प्रदेशका मुख्यमन्त्री र संघीय सरकारबीच छलफल भएको हो । छलफलमा उपस्थित ५ वटै प्रदेशका मुख्यमन्त्रीहरूले ७ वटै प्रदेशमा कोरोना परीक्षण गर्न ल्याब स्थापना गर्नुपर्ने माग राखेको कर्णाली प्रदेशका मुख्यमन्त्री महेन्द्रबहादुर शाहीले बताए । बैठकमा गण्डकी र प्रदेश २ का मुख्यमन्त्री भने उपस्थित थिएनन् ।

आजको बैठकमा कोरोना प्रभावित देशबाट मात्र होइन, कुनै पनि देशबाट मानिस आउन नदिन माग राखेको शाहीको भनाइ छ ।

कोरोना रोग रोकथाम समन्वय समिति र मुख्यमन्त्रीहरूबीच भएको बैठकमा सीमा र एयरपोर्टमा जाँचमा कडाइ गर्ने, आइसोलेटेड अस्पताल बनाउनुपर्ने, क्वारेन्टाइन राख्न ठाउँ बनाउनु पर्ने र स्वास्थ्य सामग्रीहरूको अभाव हुन नदिने गरी तयारी गर्ने निर्णय गरिएको शाहीले जानकारी दिए ।

नेपालमा सार्वजनिक खरिद प्रक्रिया धेरै झन्झटिलो भएकाले यसलाई सहज बनाएर स्वास्थ्य सामग्री खरिद गर्न पहल गर्न केन्द्र सरकारसँग माग गरेको बागमती प्रदेशका सामाजिक विकासमन्त्री दुलाले बताए ।

उनले भने, ‘हाम्रोमा सार्वजनिक खरिद प्रक्रिया धेरै झन्झटिलो छ । यसलाई सहज बनाएर आवश्यक सामग्री छिटोभन्दा छिटो खरिद गर्नुपर्छ । सबै प्रदेशमा ल्याबहरूको स्थापना हुनुपर्छ ।’

कोरोनासँग लड्न संघीय, प्रदेश र स्थानीय सरकार मिलेर जाने तयारी गरेको दुलालले बताए ।

विश्वभर माहामारी बनिरहेको कोरोना भाइरसको उपचार गर्न सरकारले आवश्यक जनशक्तिको तयारी, उपकरण, ल्याब, उपचारका लागि अस्पतालको व्यवस्था गर्न तीनै तहबीच समन्वय गर्ने निर्णय पनि भएको छ ।

बैठकमा प्रदेशका मुख्यमन्त्रीहरूले आआफ्ना प्रदेशका प्रयासहरूबारे जानकारी गराएका थिए ।

प्रकाशित मिति: आइतबार, चैत २, २०७६ १७:३१