पूरा भएन ‘जहाज’ चढ्ने सुदूर पहाडवासीको सपना

A+ A A-

सुदूर पहाडका स्थानीयहरू वर्षौंदेखि जहाजको पर्खाइमा बसेका छन् । सुदूरपश्चिममा रहेका मुख्य ४ विमानस्थलहरू सञ्चालनमा नआउँदा यहाँका स्थानीयहरूलाई समस्या परिरहेको छ ।

बैतडीको पाटन विमानस्थल, डोटीको दिपायल विमानस्थल, अछामको साँफेबगर विमानस्थल र बझाङ विमानस्थल सञ्चालनमा नआउँदा स्थानीयको सपना चक्नाचुर भएको छ ।

सुदूरपश्चिम प्रदेशको पहाडी जिल्लाको सबैभन्दा पुराना दिपायल विमानस्थल र पाटन विमानस्थल कालोपत्रको काम सम्पन्न भएको भए पनि निर्माण प्रक्रिया चलिरहेकाले अझै सञ्चालनमा आउने छाँटकाँट देखिएको छैन ।

तर, पनि यस क्षेत्रका मुख्य २ ठूला विमानस्थल कालोपत्रे भएसँगै जहाज चल्ने आसमा यहाँका स्थानीय छन् । यहााका स्थानीयको वर्षौंदेखि जहाज चढ्ने रहर भएकाले चाँडोभन्दा चाँडो विमानस्थल सञ्चालनमा ल्याउन स्थानीय दीपकबहादुर चन्दले सरकारसँग आग्रह गरे ।

२०७४ सालमा निर्माण कार्य सुरु गरिएको दिपायल विमानस्थलको कालोपत्रेको काम बल्ल अहिले आएर सकिएको छ । २०७५ असारमा सक्ने लक्ष्यसहित कालोपत्रे गर्ने कार्य सुरु भएको पाटन विमानस्थलको पनि कालोपत्रे सम्पन्न भएको छ । यस्तै, अछामको साँफेबगर विमानस्थलको काम सम्पन्न भएर गएको वर्षको जेठ महिनामै परीक्षण उडानसमेत भइसकेको छ ।

भौगलिक रूपमा विकट र यातायातको पहुँच नभएका कारण यस क्षेत्रका बासिन्दा पैदल हिँड्न बाध्य छन् । वर्षौंदेखि आँगनबाटै जहाज चढ्ने सपना बुनेका स्थानीय वासिन्दाको आकाङ्क्षा बुझेका उम्मेदवार र दललाई पटक पटक जिताए पनि जहाज चढ्ने सपना कसैल्यै पूरा गर्न नसकेको भन्दै अछाम साँफेबगरका स्थानीय रतन बोहराले दुखेसो पोखे ।

‘पहिला पनि जहाज ल्याउँछौँ भन्थे, आजसम्म चढ्न पाएनौँ’, उनले भने, ‘धेरै नेताले जितेर गए, आजसम्म गाउँमा जहाज आएन । गत जेठमा आएको थियो, त्यसपछि देखेनौँ । चुनावमा भोट माग्न मात्र जहाजको कुरा गर्छन्, जितेर गएपछि मतलब हुँदैन ।’

२०३२ सालमा विमानस्थल निर्माणको काम सुरु भएर २०३५ सालदेखि हवाई सेवा सुरु भएको पाटन विमानस्थल २०५२ सालदेखि बन्द छ । पहाडी जिल्लामा सडक सञ्जाल पुगेको र यात्रु कम भएको भन्दै त्यतिबेला विमानस्थल बन्द गरिएको थियो भने २०५८ सालमा तत्कालीन विद्रोही माओवादीले विमानस्थलको टावरमा आगो लगाएर ध्वस्त बनाएको थियो ।

पाटन र दिपायल विमानस्थल कालोपत्रे

बैतडीको पाटन विमानस्थल र डोटीको दिपायल विमानस्थल कालोपत्रे गर्ने कार्य सम्पन्न भएको छ । पाटन विमानस्थल २०७५ असारमा सक्ने लक्ष्यसहित कालोपत्रे गर्ने कार्य सुरु भएको भए पनि ढिलो गरी कालोपत्रे सम्पन्न भएको हो ।

यस्तै, गएको वर्षको असार महिनामा सक्ने लक्ष्यसहित २०७४ सालमा निर्माण कार्य सुरु गरिएको दिपायल विमानस्थलको कालोपत्रेको काम बल्ल अहिले आएर सकिएको छ ।

दुवै विमानस्थलको कालोपत्रेको काम सकिएर बाँकी अन्य धावनमार्गको पर्खाल, तारजाली लगाउने काम सुरु भएको निर्माण कम्पनीले जनाएका छन् । पाटन विमानस्थलको कालोपत्रे माघ दोस्रो हप्ता सम्पन्न भएको र अहिले किनारामा पेन्टिङको काम चलिरहेको निर्माण कम्पनीका इन्जिनियर पुरन रावलले जानकारी दिए ।

विमानस्थल कालोपत्रेको जिम्मा पाएका सप्नाग्याल्भा तथा जेभी कन्स्ट्रक्सनका साइट प्रमुख राजेन्द्र विष्टका अनुसार दिपायल विमानस्थलको पक्की गर्ने काम सकिएको छ भने धावनमार्गको काम चलिरहेको छ ।

पाटन विमानस्थल कालोपत्रे गर्ने कार्य लक्ष्यभन्दा १८ महिनापछि सम्पन्न भएको हो । ग्याल्वा च्यामलिंगा जगदम्बा जेभीले पाटन विमानस्थल कालोपत्रे गर्ने कार्य गरेको हो । पाटन विमानस्थलमा ५ सय ९० मिटर लम्बाइ र २० मिटर चौडाइको धावनमार्ग कालोपत्रे गरिएको हो भने ७० मिटर लम्बाइ र ३० मिटर चौडाइको एप्रोन कालोपत्रे गरिएको हो ।

विमानस्थल सञ्चालनमा आए विकासमा फड्को

डोटीको दिपायल र बैतडीको पाटनसहितका यहाँका अन्य विमानस्थल निर्माण सम्पन्न भई जहाज उडेमा यस क्षेत्रले विकासमा फड्को मार्न सक्ने कतिपयको बुझाइ छ ।

विमानस्थल सञ्चालन हुन नसक्दा जिल्लाका थुप्रै विकासका योजनामा असर पर्नुका साथै उपचारका लागि अन्यत्र पठाउनुपर्ने जटिल अवस्थाका बिरामीले समयमै उपचार नपाएर अकालमै ज्यान गुमाउनुपरेकोले त्यो समस्या सामाधान हुनेमा स्थानीयवासी विश्वस्त छन् ।

विमानस्थल सञ्चालमा आएसँगै यस क्षेत्रमा पर्यटकको संख्यामा पनि वृद्धि हुने र यस क्षेत्रका स्थानीयहरूले होटल तथा कलकारखाना खोलेर मनग्य आमदानी गर्ने वातावरणको सिर्जना हुने डडेल्धुराको अमरगढी– ८ का स्थानीय विस्ना गैरालले बताइन् ।

‘सुदूरपश्चिम भनेको धार्मिक तथा ऐतिहासिक पर्यटकीय स्थलहरूको प्रचुर सम्भावना बोकेको क्षेत्र हो । यस क्षेत्रमा पर्यटक भित्र्याउन सकिने र यहाँको आयस्रोत बढ्ने उच्च सम्भावना रहेको छ’, उनले भनिन्, ‘विमानस्थल सञ्चालनमा आए यस क्षेत्रमा रोजगारीका अवसर सिर्जना हुन्छन् र युवाहरूले आफ्नै ठाउँमा रोजगारी पाउँछन् ।’

विमानस्थलमा नियमित जहाज चलाउन सके यहाँको प्रमुख पर्यटकीय स्थल उदयदेव, सिगास धुरा, पाताल भुवनेश्वर, खप्तड, बडिमालिका, शैलेश्वरी, उग्रतारा, घटालथान, अमरगढी किल्लालगायतका क्षेत्रमा पर्यटक भित्र्याउन सकिने उनको भनाइ छ ।

प्रकाशित मिति: आइतबार, चैत २, २०७६ १३:०९