महोत्तरीमा शिक्षामन्त्री: भाषण गरे, उद्घाटन गरेनन्

A+ A A-

उद्घाटनका लागि शनिबार एउटा कलेजको भवन सजाइएको थियो । ठूलो संख्यामा मानिसहरू जम्मा पनि भइसकेका थिए । निर्धारित समयमा प्रमुख अतिथि पनि पुगे तर उद्घाटन हुँदैन भन्ने घोषणा गरियो ।

उद्घाटनका लागि शिक्षा, विज्ञान तथा प्रविधिमन्त्री गिरिराजमणि पोखरेल उपस्थित थिए । तर, उनी महोत्तरीको एक कार्यक्रमको उदघाटन नगरी फर्किएका छन् ।

उनले मटिहानी नगरपालिकामा अवस्थित याज्ञवल्क्य लक्ष्मीनारायण विद्यापीठको नवनिर्मित दुईतले भवनको उद्घाटन गर्ने कार्यक्रम थियो । कोरोना भाइरस संक्रमणको जोखिमका कारण सभा तथा सम्मेलन आयोजना नगर्ने सरकारको नीति रहेको हुँदा मन्त्री पोखरेलले सार्वजनिक कार्यक्रममा भवनको उद्घाटन नगरेको जनाइएको छ ।

उनले मञ्चभन्दा तल बसी कोरोना भाइरससम्बन्धी सचेतना भाषण मात्रै गरेका थिए । सो अवसरमा उनले सरकारले ४१ सीमा नाकामा हेल्थ डेस्क स्थापना गरिसकेको र थप नाकामा समेत गर्ने तयारीमा रहेको जानकारी दिए ।

उनले केही दिनका लागि कुनै पनि सभा, सम्मेलन, भोजभतेर र धेरै मानिस जम्मा हुने कार्यक्रम नगर्न आग्रह गरे ।

विद्यार्थीहरूमा कोरोना भाइरस नलागोस् र पढाइ पनि नबिग्रियोस् भन्ने आफूले चाहेको समेत बताए । उनले सञ्चारकर्मीहरूलाई अतिरञ्जित समाचार नलेख्न आग्रह गरेका छन् ।

समारोहमा नेपाल संस्कृत विश्वविद्यालयका उपकुलपति, रजिष्ट्रारको उपस्थिति रहेको थियो । मन्त्रीले उद्घाटन नगरेपछि विश्वविद्यालयका पदधिकारीहरू विद्यापीठमा छलफल गरेर फर्किएका छन् ।

विक्रम संवत् १८०१ मा मकवानपुरका राजा लक्ष्मीनारायण मठको स्थापना गरेपछि महोत्तरीको मटियानीमा पढाइको वातावरण बनेको थियो । सन् १९६८ देखि त्यहाँ वेद व्याकरण न्यायलगायतको पढाइ भइरहेको छ ।