स्वास्थ्य संस्थामा दलीय भागबण्डा नगर्न डा. केसीको माग

डा. गोविन्द केसी

A+ A A-

मेडिकल शिक्षा र स्वास्थ्य सुधारका लागि निरन्तर संघर्ष गर्दा आएका डा. गोविन्द केसीले स्वास्थ्य क्षेत्रमा हुने नियुक्ति दलीय भागबण्डामा नभई योग्यता, क्षमता र अनुभवका आधारमा गर्न सरकारको ध्यानाकर्षण गराएका छन् ।

शनिवार एक विज्ञप्ति निकाल्दै केसीले सरकारसँगको मिलेमतोमा स्वास्थ्य संस्थामा नियुक्त हुने पदाधिकारीहरुले मेडिकल माफियाको स्वार्थमा काम गर्ने गरेको आरोप लगाए । सरकारले शुक्रबार न्याम्स दलीय आधारमा पदाधिकारी नियुक्त गरेको थियो ।

‘दलीय भागवण्डामा नियुक्त हुने पदाधिकारीका कारण विश्वविद्यालय धरासायी भइरहेको छन्, जबकि यसअगाडि त्यस्ता पदाधिकारीहरुलाई सिफारिस अनुसार कारबाही गर्ने भनेर हामीसँग सरकारले सम्झौता नै गरेको छ , विज्ञप्तिमा भनिएको छ, ‘मेडिकल शिक्षालगायत देशका सबै क्षेत्रमा भ्रष्ट र अपराधीहरुलाई संरक्षण र प्रोत्साहन गर्ने, दोषी प्रमाणित भएको अवस्थामा समेत उनीहरुलाई बचाउने अहिलेको सरकारको रवैयाले देशमा दण्डहीनतालाई चरम सीमामा पुर्‍याएको छ।’

सरकारले बिपी कोइराला स्वास्थ्य विज्ञान प्रतिष्ठानका उपकुलपतिलाई पदमुक्त गरेको बारे केसीले भनेका छन्, ‘कुनै पदाधिकारीले अनियमितता गरेको आरोप भएमा छानबिन गरी कानुन बमोजिम कारबाही गर्नुपर्छ ।’ सरकारले धरानस्थित बिपी कोइराला स्वास्थ्य विज्ञान प्रतिष्ठानका उपकुलपति डा राजकुमार रौनियारलाई पदबाट हटाएको छ।

डा केसीले सरकारले न्यायिक जाँचबुझ आयोगले दोषी किटान गरेर बर्खास्तीको सिफारिस गरेका पदाधिकारीहरुलाई कारबाहीको कुनै प्रक्रिया अगाडि नबढाएको भन्दै असन्तुष्टि पोखेका छन्।