प्रदेशवासीलाई स्वस्थ्य बनाउन मन्त्रालयकाे योग शिविर

A+ A A-

आफ्ना प्रदेशका नागरिकहरुलाई स्वस्थ्य बनाउन प्रदेश १ को सामाजिक विकास मन्त्रालयले बृहत योग शिविर शुरु गरेको छ ।
मन्त्रालयको आयोनजना तथा मन्त्री जीवन घिमिरेको विशेष सक्रियतामा विराटनगरमा सप्ताहव्यापी योग शिविर शुरु भएको हो ।

‘शान्ति र समृद्धिका लागि योग’ भन्ने नाराका साथ सुरु भएको योग शिविरको १ नम्बर प्रदेशका प्रदेश प्रमुख गोबिन्द बहादुर तुम्बाहाङले उद्घघाटन गरे । विराट नर्सिङ होमको पूर्व पट्टिको खाली मैदानमा सुरु भएको योग शिविरको उद्घाटन पछि बोल्दै प्रदेश प्रमुख तुम्बाहाङले दिमागलाई पनि स्वस्थ्य बनाउने वैज्ञानिक विधि योग रहेको बताए ।

प्रदेशका नागरिकहरुको जीवन स्वस्थ्य रहोस् भन्ने उद्देश्यले सामाजिक विकास मन्त्रालयले सुरुवात गरेको बृहत योग शिविर अति उत्तम भएको उनको भनाइ छ ।

सामाजिक विकास मन्त्री जीवन घिमिरेले व्यायमलाई अभिन्न अंग बनाउने, हरेक बालबच्चाहरुलाई दिनमा आधा घण्टा योगमा सरिक गराउने अभियान सञ्चालन गर्न आफूहरु लागेको बताए । योगको महत्व दर्शाउँदै उनले योगलाई अभियानको रुपमा प्रदेशका टोल– टोल, बस्ती– बस्तीमा पुर्याउने बताए । उनले शिविरमा सहभागी हुन कक्षा ९ सम्म अध्ययनरत तीन हजार विद्यार्थीहरुले नाम दर्ता गराएको पनि जानकारी दिए ।

कलाकार सीताराम कट्टेल (धुर्मुस) ले योगामा सहभागीहरुलाई हँसाएका थिए । उनले स्वस्थ्य रहन हरेक दिन योगा गर्न आग्रह गरे । योग शिविरमा ख्यातीप्राप्त योग प्रशिक्षकहरुले योगा गराएका थिए । शिविरमा मन्त्री घिमिरे, धुर्मुस, विराटनगर महानगरपालिकाका मेयर भीम पराजुली, मोरङमा प्रमुख जिल्ला अधिकारी रमेशकुमार केसी तथा हजारौँको संख्यामा उपस्थितहरुले योगा गरेका छन् ।

आज दिउँसो सवा १ बजे हुने योग शिविरको भने प्रदेशका मुख्य मन्त्री शेरधन राईले उद्घाटन गर्ने कार्यक्रम रहेको छ । बिहान साढे ५ बजेदेखि ७ बजेसम्म आम नागरिकका लागि र दिउँसो साढे १ बजेदेखि साढे २ बजेसम्म विद्यार्थीहरुका लागि शिविर संचालन मन्त्रालयले जनाएको छ ।

शिविरमा सहभागी हुनेहरुका लागि विराटनगरका विभिन्न ८ स्थानमा बस सेवा पनि संचालन गरिएको छ । योग शिविर माघ १९ गतेसम्म चल्ने छ ।

धुर्मस सुन्तली स्वास्थ्य सद्भावना दुत

एक नम्बर प्रदेश सरकारले हास्य कलाकारहरु सीताराम कट्टेल (धुर्मस) र कुन्जना घिमिरे (सुन्तली) लाई सद्भावना दुत नियुक्त गर्ने भएको छ ।

स्वास्थ्य जीवन कार्यक्रम अन्तरगत स्वास्थ्य प्रवद्र्धन सचेतना सद्भावना दुतका रुपमा धुर्मुस सुन्तलीलाई नियुक्त गर्न लागेको हो । आज सामाजिक विकास मन्त्रालयले धुर्मुस र सुन्तलीसँग सम्झौता गर्न लागेको हो ।

आज मुख्यमन्त्री तथा मन्त्री परिषद कार्यालयमा यस बारेमा सम्झौता हुने कार्यक्रम तय भएको सामाजिक विकास मन्त्रालयले जनाएको छ । मुख्य मन्त्री तथा मन्त्री परिषद्को कार्यलयको सभाहलमा सामाजिक विकास मन्त्रालय र धुर्मुस सुन्तलीविच िद्वपक्षीय सम्झौता हुन लागेको सामाजिक विकास मन्त्री जीवन घिमिरेका स्वकीय सचिव शुसान्त बन्जाराले जानकारी दिए ।

प्रकाशित मिति: आइतबार, माघ १३, २०७५ ११:०६