चौराहादेखि गोलपार्कसम्म सडक विस्तार, १५६ घर भत्किने

A+ A A-

बुटवलको राजमार्ग चौराहदेखि गोलपार्कसम्मको सडक विस्तार कार्य पुनः हुने भएको छ ।

बुटवलको मुख्य बजार क्षेत्र राजमार्ग चौराहादेखि गोलपार्कसम्म ३.७ किलोमिटर सडक विस्तार कार्य पुन हुने भएको हो ।

बुटवल–बेलहिया सडकखण्ड अन्तर्गत चौराहदेखि बेलहियासम्म सडक विस्तारको काम सम्पन्न हुनै लाग्दा चौराहदेखि गोलपार्कसम्मको सडक विस्तार घरधनीका कारण विस्तार हुन सकेको छैन् ।

२०७४ साल चैत महिनामा सडक निर्माणको लागि ठेक्का सम्झौता भए पनि घरधनीले मुद्दा हाल्ने र मुद्दा अदालतमै अल्झिदा सडक विस्तार हुन सकेको थिएन ।

तुलसीपुर उच्च अदालतको बुटवल इजलासले गरेको आदेश बमोजिम मुआब्जा प्रक्रिया थालेको जिल्ला प्रशासन कार्यालय रुपन्देहीको प्रक्रियाविरुद्ध घरधनीहरुले गृह मन्त्रालयमा पुनरावेदन गरेका थिए ।

तर गृह मन्त्रालयले पुनरावेदनको निर्णय दिदै निवदेनहरु खारेज हुने निर्णय गरेसँगै सडक विस्तारको बाटो खुलेको छ ।

गृह मन्त्रालयले जिल्ला प्रशासन कार्यालयले गरेको मुआब्जा प्रक्रिया सदर समेत गरेको छ ।

अदालतले पछिल्लो पटक जग्गाधनीहरुलाई जिल्ला प्रशासन कार्यालय मार्फत कानुनी प्रक्रिया पु¥याएर मुआब्जा दिएपछि मात्र सडक विस्तार कार्य गर्नु भन्ने आदेशसँगै बुटवलको राजमार्ग चौराहदेखि गोलपार्कसम्मको सडक विस्तार अवरुद्ध भएको थियो । चौराह देखि गोलपार्क सम्म ८२ फुट सडक कायम गर्न बाँकी छ ।

केही समयअघि बुटवल बेलहिया आयोजनाले अदालतको आदेशअनुसार निवेदकहरुका कागजात अध्ययन गर्दा १ सय ५६ जना निवेदक मध्ये १ सय ५० जनाको मुआब्जाका लागि प्रमाण नपुगेको र ६ जनाको हकमा थप कागजात हेर्नुपर्ने भएकोले १५ दिनभित्र आयोजनामा सम्पर्क राख्न सूचना जारी गरेको थियो ।

जिल्ला प्रशासन कार्यालयले जारी गरेको सूचनाविरुद्ध घरधनीहरुले गृह मन्त्रालयमा पुनरावेदन गरेका थिए । तर गृहले समेत घरधनीहरुको याचना स्वीकार गरेन ।

रुपन्देहीका निमित्त प्रमुख जिल्ला अधिकारी भरतराज शर्माले गृह मन्त्रालयले सडक विस्तार कार्यमा जिल्ला प्रशासन कार्यालय रुपन्देहीले गरेको निर्णय प्रक्रिया कानून सम्वत् भएकोले थप प्रकृया अगाडि बढाउन भन्दै पत्राचार गरेको जानकारी दिए ।

प्रशासनले घर धनीहरुलाई सडक सीमाभित्र मिचेर बनाएका आफ्ना घर टहरा लगायतका संरचना भत्काउन सार्वजनिक सूचना जारी गर्ने तयारी भएको छ ।

सो सडकखण्डमा ३ सय १० घर र बाँकी ४७ खाली जग्गा गरी ३ सय ५७ जनाले सडक सीमा मिचेकोमा १ सय जनाभन्दा बढीले यसअघि नै घर भत्काई सडक खाली गरी दिएका छन् ।

सडक विस्तारको जिम्मा ‘द’ कञ्चनजंगा बिरूवा जेभी कन्ट्रक्सन प्रा.लि, काठमाडौंले लिएको छ ।

प्रकाशित मिति: शनिबार, चैत १, २०७६ १४:५०