जहाँ मारिँदैनन् पशु-पन्छी, खाइँदैन मदिरा र सुर्ती

A+ A A-

पूर्व–पश्चिम राजमार्गबाट झन्डै ७ किलोमिटर दक्षिणतर्फको नहर छिचोलेपछि सफा र हराभरा रौतहटको नजरपुर गाउँ पुगिन्छ । चन्द्रपुर नगरपालिका– ९ मा रहे पनि यो गाउँ ग्रामीण क्षेत्र नै रहेको छ ।

यहाँका करिब ४ सय घरमध्ये कुनैमा पनि कुखुरा, हाँसलगायत पन्छी तथा खसी, बोका पालिएको छैन ।

एउटा व्यक्ति शाकाहारी हुन सक्छ, एउटा परिवार शाकाहारी पनि छ तर सिंगो गाउँ नै शाकाहारी भनेको सुन्दा धेरैलाई आश्चर्य लाग्न सक्छ । विविधताले भरिएको हाम्रो देशमा यस्तो पनि छ । नजरपुर पूरै ‘शाकाहारी वस्ती’ हो ।

चन्द्रपुर नगरपालिका– ९ स्थित सिंगो गाउँका बासिन्दा शाकाहारी छन् । वर्षौंदेखि गाउँलेले काटमार, मदिरा, सुर्तीजन्य पदार्थ सेवन र जुवातास निषेध नै गरेका छन् । प्रदेशकै नमुना धार्मिक गाउँ नजरपुर अहिले निजानन्दधामका नामले प्रसिद्ध छ ।

रौतहटमा नजरपुर ‘नमुना’ वस्तीका रूपमा चिनिन्छ । मदिरा तथा सुर्तीजन्य पदार्थ सेवन गरी आउने पाहुनालाई यहाँका स्थानीयले वाससमेत नदिने नेपाल पत्रकार महासंघ रौतहटका सचिव गौतम श्रेष्ठले बताए । झैझगडासमेत नहुने हुँदा यो गाउँबाट अहिलेसम्म अदालतमा एउटा पनि मुद्दा परेको छैन ।

३ वर्षअघि धार्मिक उत्सवका क्रममा यहाँ आएका पूर्वराष्ट्रपति डा. रामवरण यादवले नजरपुरलाई ‘स्वर्गको एउटा गाउँ’ भनेका थिए । उनले भनेका थिए, ‘हाम्रो देशमा यस्तो पनि गाउँ रहेछ । स्वर्गझैँ लाग्ने नजरपुर वस्ती रहेछ ।’

‘शाकाहारी नमुना गाउँ’का नामले समेत परिचित नजरपुर प्रदेश २ को धार्मिक पर्यटकीय गन्तव्यमा समेत सूचीकृत रहेको प्रदेश २ का भौतिक पूर्वाधार राज्यमन्त्री डा. डिम्पल झाले बताइन् ।

२०२० सालदेखि वस्ती बस्न थालेको यस गाउँका घरघरमा भगवान् श्रीकृष्णको पूजा गरिन्छ । गाउँका सबैले कृष्ण प्रणामी धर्म मान्दै आएका छन् । गाउँलेकै सक्रियतामा नजरपुरलाई २० वर्षअघि पूर्ण साक्षर बनाइएको शिक्षक उद्ववप्रसाद पौडेलले बताए ।

सो गाउँका करिब ४ सय घरधुरीका सबै मानिस कृष्ण प्रणामी धर्म मान्नेहरू छन् । गाउँको मध्यभागमा निर्माण गरिएको कलात्मक कृष्ण प्रणामी मन्दिरले पर्यटक तथा धेरैको ध्यान खिच्ने गरेको छ । मन्दिर परिसरमा रमणीय सुन्दर बगैँचा छन् ।

मन्दिरमा विद्यालय, पाकशाला, वृद्धाश्रम, धर्मशाला सञ्चालन हुँदै आएको मन्दिर समितिका अध्यक्ष दाताराम दाहालले बताए । मन्दिरको पूर्वाधार निर्माण गर्नकै लागि १ करोड ५० लाख रुपैयाँभन्दा बढी खर्च भइसकेको छ ।

२०२२ सालदेखि निरामिष भोजन प्रयोग गर्ने शुद्ध शाकाहारी श्री कृष्ण प्रणामी भक्तजनहरूको बसोवास रहेको इतिहास छ । उक्त क्षेत्रमा धार्मिक, पर्यटकीय एवम् सामाजिक सेवाको प्रेरक केन्द्रको रूपमा विकास गर्ने लक्ष्यअनुरूप नै कार्य भइरहेको छ ।

अध्यक्ष दाहालले भने, ‘यस क्षेत्रलाई हिंसारहित धार्मिक, सामाजिक, पर्यटकीय स्थलको रूपमा विकास गर्दै अध्यात्मिक मार्गबाट सामाजिक, सांस्कृतिक र पर्यटन विकासमा मद्दत पु¥याउन महोत्सवले ठूलो सहयोग गरेको छ ।’

गाउँमा ६ वटा किराना पसल सञ्चालनमा रहेको दाहालले बताए । ती पसलमा सुर्तीजन्य तथा मदिराजन्य पदार्थ बिक्री हुँदैन ।

लामो समयदेखि किराना पसल गर्दै आएका स्थानीय डिल्लीप्रसाद देवकोटाले पान पराग, खैनी, बिँडी, चुरोट र मदिरा केही पनि बिक्रीका लागि नराखेको सुनाए । स्थानीयलाई शारीरिक, मानसिक, सामाजिक तथा अध्यात्मिक रूपमा स्वस्थ राख्ने अभियान यहाँ चलाइएको छ ।

नजरपुरका अधिकांशको मुख्य पेसा कृषि हो । गहुँ, धान, दूध र मकैको बिउ उत्पादनका लागि गाउँ प्रख्यात छ । दुग्ध सहकारी र केही कृषि सहकारीसँगै बिउ उत्पादन कम्पनीसमेत गाउँमा छन ।

नमुना महिला कृषक सहकारी संस्थाले प्रदेशकै नमुना बिउबीजन उत्पादन गरी देशैभर बिक्री वितरण गर्दै आएको छ । पूर्ण रूपले जातीय, क्षेत्रीय तथा लैंगिक विभेदमुक्त गाउँका सबै घरमा व्यवस्थित शौचालय छ ।

४ दशकयता गाउँका कसैको पनि अदालतमा मुद्दा नपरेकामा आश्चर्य लाग्ने गरेको राष्ट्रिय जनता पार्टीका महासचिव राजिव झाले बताए । आफूले गाउँको महत्ता बुझेपछि केही दिनअघि त्यहाँ घुम्न गएको थिए उनले बताए । झैझगडा तथा अपराधका घटना नभएपछि अदालत धाउनु नपरेको स्थानीयको भनाइ छ ।

नमुना गाउँका रूपमा विकसित नजरपुरको आधुनिकीकरणका लागि ढल, सडक तथा कृषि प्रविधिका लागि बजेट आवश्यक रहेको चन्द्रपुरका मेयर रामचन्द्र चौधरीले बताए ।

प्रकाशित मिति: शनिबार, चैत १, २०७६ ०७:१३