कोरोना नियन्त्रणका लागि यस्तो छ प्रदेश २ को तयारी

A+ A A-

कोरोना भाइरसको संक्रमणबाट बच्न प्रदेश २ सरकारले पनि तीव्र रूपमा तयारी थालेको छ । प्रदेश सरकारले कोरोना रोकथामका लागि सचेतना कार्यक्रम, आशंकित संक्रमितको पहिचान र उनीहरूलाई राख्ने ठाउँको तयारीमा लाग्नुका साथै प्रदेशका आठै जिल्लासँग सीमा जोडिएका २२ स्थानमा हेल्थ डेस्क स्थापना गरिसकेको छ ।

प्रदेशका तीन विमानस्थल जनकपुरधाम, सिमरा र राजविराजमा पनि हेल्थ डेस्क स्थापना गरिसकिएको सामाजिक विकास मन्त्रालयका वरिष्ठ स्वास्थ्य प्रशासक नवल झाले बताए ।

प्रभावित देशबाट आएकाहरूको विवरण लिने र श्वासप्रश्वाससम्बन्धी समस्या भए नजिकको स्वास्थ्य केन्द्रमा जान स्वास्थ्यकर्मीले घरघर पुगेर सचेत गराउने अभियान सञ्चालन गरिसकिएको प्रदेश स्वास्थ्य निर्देशनालयका अधिकारी विजय झाले बताए ।

उनका अनुसार प्रदेशमा स्थापित हेल्थ डेस्कमा स्वास्थ्यकर्मी पर्याप्त भए पनि उपकरण अभाव छ । त्यहाँ पर्सनल प्रोटेक्टिभ इक्विपमेन्ट (पीपीई), पर्याप्त मात्रामा इन्फ्रारेड थर्मोमिटर (थर्मल गन), मास्कलगायत आवश्यक उपकरण छैनन् । कतिपय स्थानीय तहले केही उपकरण (थर्मल गनलगायत) खरिद गरेका त छन् तर त्यो पर्याप्त नभएको उनको भनाइ छ ।

३ ठाउँमा आइसोलेसन कक्ष, ८ ठाउँमा क्वारेन्टाइन

प्रदेशमा कतै कोरोना संक्रमणको आशंका लागेका व्यक्ति पहिचान भए तत्काल उपचारका लागि धनुषाको रमदैयास्थित जानकी मेडिकल कलेजमा ६० शय्या र जनकपुर उपमहानगरपालिकास्थित सिटी अस्पतालमा २० शय्यासहितको आइसोलेसन वार्ड तयारी अवस्थामा राखिएको निर्देशनालयका अधिकारी विजय झाले बताए ।

उनले भने, ‘वीरगन्जको नेसनल मेडिकल कलेजमा पनि ३५ शय्यासहितको आइसोलेसन वार्ड तयार हुँदै छ,’ उनले भने, ‘जनकपुरलाई केन्द्रमा राखेर ८ जिल्लाका तीन स्थानमा आइसोलेसन वार्ड स्थापना गर्ने योजना छ ।’ सप्तरीको गजेन्द्रनारायण सिंह सगरमाथा अञ्चल अस्पतालमा समेत आइसोलेसन वार्ड राख्ने तयारी भइरहेको छ ।

‘प्रदेशका मध्य, पूर्व र पश्चिम (जनकपुर, राजविराज, वीरगन्ज) गरी तीन स्थानमा आइसोलेसन वार्ड राख्ने तयारी छ । जनकपुरमा ८० वटा शय्यासहितको आइसोलेसन वार्डको तयारी भइसकेको छ,’ उनले भने, ‘वार्ड तयार भइसके पनि खटिने स्वास्थ्यकर्मीले प्रयोग गर्ने उपकरण भने छैन ।’

ग्लोब्स, मास्कलगायत उपकरणको अभाव खट्किएको उनको भनाइ छ । स्वास्थ्यकर्मी कोको खट्ने, शय्या कहाँ, कसरी राख्नेलगायत तयारी पूरा गरिसकेको उनले बताए । ‘जनकपुरका अन्य अस्पतालहरूमा समेत आइसोलेसन वार्डका लागि छलफल भइरहेको छ,’ उनले भने ।

यसैगरीm आठै जिल्लाको राजमार्ग क्षेत्रमा क्वारेन्टाइनको तयारी भइरहेको छ । ‘लहान, बर्दिबास, ढल्केवरलगायत पथलैयासम्मका आठ स्थानमा क्वारेन्टाइन राख्न गेस्ट हाउस, सिनेमा हल, खाली भवन तयार पारिरहेका छौं,’ झाले भने । क्वारेन्टाइनमा खटिने स्वास्थ्यकर्मीको छनोट तथा प्रशिक्षणका लागि पनि तयारी सुरु गरिएको छ ।

आशंकितको रगत र स्वाब संकलन गरिने

आशंकित व्यक्तिको रगत वा स्वाब संकलनका लागि जनकपुरस्थित प्रादेशिक अस्पतालको प्रयोगशालालाई तयारी अवस्थामा राखिएको निर्देशनालयका अधिकारी झाले जानकारी दिए । जानकी मेडिकल कलेजमा अर्को प्रयोगशालाको तयारी भइरहेको उनको भनाइ छ ।

प्रदेशको सामाजिक विकास मन्त्रालय र मुख्यमन्त्री तथा मन्त्रिपरिषद्को कार्यालयबाट सचेतना नियन्त्रण र उपचारजन्य व्यवस्थापनमा भरपूर सहयोग भइरहेको झाले बताए ।

‘कोरोना भाइरसको संक्रमण चीनहुँदै विश्वका विभिन्न देशमा फैलिएपछि मानिसमा त्रास फैलिएको छ । सचेतना अपनाए यसलाई अवश्य परास्त गर्न सकिन्छ भन्ने सूचनालाई आमजनतामाझ व्यापक रूपमा फैलाउनु आवश्यक छ,’ धनुषाका प्रमुख जिल्ला अधिकारी प्रदीपराज कणेलले बताए । उनका अनुसार सीमादेखि गाउँशहर सबै ठाउँमा सूक्ष्म निगरानी बढाइएको छ ।

चीनको वुहानमा पहिलोपटक देखिएको कोरोना भाइरस अहिले विश्वभर फैलिसकेको छ । यो भाइरसका कारण मृत्यु हुनेको संख्या ५ हजार पुगिसकेको छ ।

प्रकाशित मिति: शुक्रबार, फागुन ३०, २०७६ १९:३५