कस्तो छ प्रधानमन्त्री ओलीको स्वास्थ्य अवस्था ?

A+ A A-

मिर्गौलाको प्रत्यारोपणपछि अस्पतालमा आराम गरिरहेका प्रधानमन्त्री केपी शर्मा ओलीको स्वास्थ्यमा सुधार हुँदै गएको चिकित्सकहरूले बताइरहेका छन् ।

प्रधानमन्त्रीको मिर्गौला २१ फागुनमा प्रत्यारोपण भएको थियो । मिर्गौलादाता प्रधानमन्त्रीकी भान्जी समीक्षा संग्रौला अस्पतालबाट डिस्चार्ज भइसकेकी छन् । तर प्रधानमन्त्रीका केही स्वास्थ्य परीक्षणका रिपोर्ट आउन बाँकी रहेको भन्दै उनलाई डिस्चार्ज गरिएको छैन ।

अपरेसनलगत्तै चिकित्सकहरूले पाँच दिनमा डिस्चार्ज गर्ने भनेका थिए भने प्रधानमन्त्री स्वयमले एक सातापछि मन्त्रीपरिषद बैठक डाक्ने भनेका थिए ।

प्रधानमन्त्रीको मिर्गौला प्रत्यारोपण भएको आज १०औँ दिन भइसकेको छ । हिजो बिहीबारसम्म अस्पतालले निकालेका प्रेस विज्ञप्तिमा भनिएको छ– प्रधानमन्त्रीको स्वास्थ्यमा सुधार भइरहेको छ ।

प्रधानमन्त्रीको स्वास्थ्यमा सुधार भएर सामान्य हिँडडुल गर्न थालेको र स्वयमले दारी काटेको बताइए पनि पत्नी राधिकाबाहेक कसैले उनलाई भेट्न पाएका छैनन् ।

चिकित्सकहरूले प्रधानमन्त्रीको पिसावसम्बन्धी परीक्षणका केही रिपोर्ट आज बेलुकीसम्ममा आइसक्ने र खराब नदेखिए डिस्चार्ज गर्ने बताएका छन् । हिजो र अस्ति पनि चिकित्सकले यही भनाइ दोहोर्‍याएका थिए ।

प्रधानमन्त्रीले अस्पताल भर्ना हुनुअघि १९ फागुनमा भिडियो सन्देशमार्फत एक सातामा काममा फर्कने भनेका थिए ।

पहिलो दिन प्रत्यारोपण सफल भएको विज्ञप्ति जारी गरेको अस्पतालले त्यसयता दैनिक स्वास्थ्यमा सुधार भन्दै आएको छ । तर के–के मा कस्तो सुधार भइरहेको छ भन्ने जानकारी नदिँदा प्रधानमन्त्रीको स्वास्थ्यलाई लिएर विभिन्न अड्कलबाजीहरू भइरहेका छन् ।

२२ फागुनमा प्रधानमन्त्री ओलीको स्वास्थ्यमा अपेक्षाकृत सुधार र मिर्गौलाले काम गर्न थालेको जानकारी अस्पतालले दियो । भाइटल्स र ल्याव सूचक सामान्य रहेको र तरल र नरम आहारा खान दिएको जानकारी दिएको थियो ।

२३ गतेको विज्ञप्तिमा प्रधानमन्त्रीलाई हिँडडुल गराउन थालिएको जानकारी दिएइको थियो । ठोस आहार पनि खुवाएको भनिएको थियो । भाइटल्स र ल्याव सूचकहरू सामान्य रहेको भनिएको थियो ।

२४ गते जारी विज्ञप्तिमा नर्मल खाना खान थालेको र फिजियोथेरापि गराएको जानकारी दिइएको थियो ।

त्यसपछिका दैनिक विज्ञप्तिमा प्रधानमन्त्रीको स्वास्थ्यमा क्रमिक सुधार भएको जानकारी छ । ल्याव सूचकांकहरू सधैं सही हुँदा पनि किन अहिलेसम्म डिस्चार्ज गरिएन भन्ने विषयमा भने अस्पताल मौन छ ।

प्रकाशित मिति: शुक्रबार, फागुन ३०, २०७६ १३:०२