कांग्रेसले प्रमुख प्रतिपक्षको भूमिका निर्वाह गर्न सकेन : शेखर कोइराला

A+ A A-

नेपाली कांग्रेसका नेता डा. शेखर कोइरालाले कांग्रेसले प्रमुख प्रतिपक्षको भूमिका निर्वाह गर्न नसकेको बताएका छन् । बुधबार विराटनगरस्थित कोइराला निवासमा प्राध्यापक र बुद्धिजीवीहरूसँगको छलफलमा कोइरालाले सरकारका गलत क्रियाकलापको विरोध गर्नसमेत कांग्रेसले नसकेको दाबी गरे ।

उनले संसदमा समेत कांग्रेसको उपस्थिति कमजोर भएको उल्लेख गरे । ‘नेकपाका साथीहरू नै प्रमुख प्रतिपक्ष अलिक कडा रूपमा उत्रिनुपर्‍यो भन्नुहुन्छ’, उनले भने, ‘नेकपा नेताहरू नै सरकारको कामबाट सन्तुष्ट हुनुहुन्न । सरकारका गलत कामको प्रतिपक्षले आवाज उठाइदिए हुन्थ्यो भन्ने उहाँहरूको चाहना छ । जुन रूपमा कांग्रेसले आवाज उठाउनुपर्ने हो, त्यसअनुसार उठाउन सकेको छैन ।’

कांग्रेसप्रति जनताको ठूलो आशा र भरोसा रहेको कोइरालाले भनाइ थियो । आफ्नै सरकार भएकाले नेकपाका नेताले विरोध गर्ने आँट गर्न नसकेको उनले बताए । नेकपाका नेताहरू नै सरकारको कामबाट वाक्क भइसकेको कोइरालाको टिप्पणी थियो ।

कांग्रेसले संसदमा आफूलाई खरो रूपमा प्रस्तुत गर्न नसकेको कोइरालाले बताए । राष्ट्रिय राजनीति, सरकारका गलत क्रियाकलाप, जनताका समस्यालाई कांग्रेसले संसदमा सशक्त रूपमा उठाउनुपर्नेमा उनले जोड दिए ।

कांग्रेस नेतृत्व काठमाडौंमा मात्र सीमित भएको उनको दाबी थियो । नेतृत्वले आफू निकटका व्यक्तिलाई पद बाँडेर आफू बलियो भएको महसुस गरिरहेको कोइरालाले बताए । नेता कोइरालाले शेरबहादुर देउवा समग्र पार्टीको सभापति हुन नसकेको उल्लेख गरे ।

भागबण्डाको राजनीतिले कांग्रेसलाई कमजोर बनाएको कोइरालाले दाबी गरे । कोइरालाले शेरबहादुर देउवा सभापति भएपछि भागबण्डाको राजनीति झनै झ्याँगिएको दाबी गरे ।

कोइरालाले सरकारकै कारण लोकतन्त्र खतरामा पर्दै गएको दाबी गरे । गलत काम गर्ने व्यक्तिलाई कारबाही नगर्दा सरकारप्रति जनताको वितृष्णा बढ्दै गएको उनले आरोप पनि लगाए ।

प्रकाशित मिति: बुधबार, फागुन २८, २०७६ १९:३२