वर्ड फ्लूकाे संक्रमण देखिएपछि ४१ हजार कुखुरा नष्ट गरिदै

A+ A A-

मकवानपुरको हेटौंडा ७ नागस्वतीमा पालिएका कुखुरामा बर्डफ्लु भएको पुष्टि भएपछि प्रभावित क्षेत्रका करीब ४१ हजार कुखुरा जिल्ला प्रशासन कार्यालयले नष्ट गर्न सुरु गरेको छ ।

मकवानपुरका प्रमुख जिल्ला अधिकारी आस्मान तामाङ्गको अध्यक्षतामा कुखुरा किसान, व्यवसायी, उपभोक्ता अधिकारकर्मी, सञ्चारकर्मी सहित हिजो बसेको बैठकले उचित क्षतिपुर्ति सहित संक्रमित क्षेत्रका कुखुरा नष्ट निर्णय गरेको थियो । सबै कुखुरा नष्ट गर्न ३ दिनसम्म लाग्ने प्राविधिक टोलीले बताएको छ ।

बैठकको निर्णयानुसार प्रतिगोटा जिउदो लेयर्स ९ सय रुपैयाँ, व्रोईलर ४ सय रुपैयाँ, दाना प्रति केजी ६५ रुपैयाँ र अण्डा प्रतिगोटा ११ रुपियाँ क्षतिपूर्ति उपलब्ध गराउन जिल्ला बर्डफ्लु रोग नियन्त्रण प्राविधिक समितिलाई सिफारिस गरेको थियो । आजदेखि संक्रमित क्षेत्रको कुखुरा नष्ट गर्ने कार्य शुरु गरिएको हो ।

बैठकको निर्णय अनुसार हेटौंडा ७ नागस्वतीको कमर्शियल लेयर्स फर्मलाई केन्द्र मानी पूर्वतर्फ वडा नम्बर ६ र ७ को सिमाना, पश्चिममा बनदेवी मन्दिर जानेबाटोको पूर्वी सिमाना, उत्तरमा वनदेवी दुग्ध सहकारीको सिमाना बाटो र दक्षिणमा अग्राठे मन्दिरको उत्तरी सिमानाको परिधि भित्र रहेका करीब ४१ हजार कुखुरा नष्ट गरिएको हो ।

सो क्षेत्रमा ५० किसानले ७ करोडको लागतमा करीब १ लाख कुखुरा पालन गरेका थिए । बैठकमा पशु सेवा बिभागका बरिष्ठ पशु चिकित्सक रामकुमार कार्की, पशु चिकित्सक बिकेश राउत र प्रबिधिक प्रकाश मगर, उपभोक्ता हित संरक्षण मञ्चका अध्यक्ष बासु खतिवडा, हेटौंडा उपमहानगरका उपमेयर मिना लामा, कुखुरा व्यवसायी संघका अध्यक्ष राजु अधिकारी, सञ्चारकर्मी, कुखुरा किसान, तीन वटै सुरक्षा निकाय, सरोकारवाला सहितको सहभागिता रहेको थियो ।

संक्रमित क्षेत्रका ५ वटा फर्मबाट १० वटा नमुना संकलन गरेपछि जाँचका लागि केन्दीय प्रयोगशाला पठाएको थियो रिपोेट २५ दिनपछि आउदा किसानको खोर रित्तीएको स्थानियको गुनासो छ ।

संक्रमित क्षेत्र बाहेकका उत्पादनको ओसार पसार खुल्ला

हेटौंडा उपमहानगरपालिका ७ नागश्वतीमा देखिएको बर्डफ्लुको संक्रमणपछि स्थानिय प्रशासनले पक्षि जन्यपद्धार्थमा लगाएको रोक खुल्ला गरेको छ ।

रोेगको संक्रमण फैलन सक्ने भन्दै प्रशासनले शुक्रबारबाट पक्षिजन्य उत्पादन ओसार पसारमा रोक लगाएको थियो । शनिबारबाट व्यवसायी संघसंगको बैठकपछि प्रशासनले शिल गरेका क्षेत्र बाहेक अन्यत्र ठाउँका उत्पादन बिक्री बितरण खुल्ला गरेको हो । प्रशासनले पक्षिजन्य उत्पादन बिक्रीका लागि पशु चिकित्सक भेटेनरी अस्पताल तथा पशुसेवा बिज्ञ केन्द्र का प्रमुख चेत नारायण खरेलको रिफारीस अनिवार्य हुनु पर्ने बताएको छ । मकवानपुरका प्रमुख जिल्ला अधिकारी आस्मान तामाङले पशु चिकित्सकको सिफारिसमा बिक्री बितरण खुल्ला गरेको बताए ।

प्रकाशित मिति: आइतबार, चैत ३, २०७५ ००:३५