गृहमन्त्री बादलमाथि मडारिँदै कालो बादल’

A+ A A-

वर्तमान सरकारका शक्तिशाली मन्त्री हुन् रामबहादुर थापा बादल । अघिल्लो वर्षको फागुन १४ गते सरकारी सपथसँगै उनी चर्चा र विवादमा रहे । सिण्डिकेट र ठेकेदारलाई तह लगाउने बताएर प्रशंसा बटुल्न थालेका उनै बादल सुन काण्ड र निर्मला हत्या घटनामा आलोचित हुँदै गए ।

मन्त्रालय पसेको एक वर्ष पुग्दै गर्दा उनको पदमाथि अहिले भने ‘बादल’मडारिन थालेको छ । बादलको पदमाथि अहिले तीन जनाको नजर लागेको छ । पूर्व माओवादीको भागमा परेको गृहमन्त्रालयमा मन्त्रीपरषदकै अर्का सदस्य वर्षमान पुनको पनि नजर परेको थियो । गृहमन्त्री हुन हर प्रयास गरेपछि पुन उर्जामा चित्त बुझाउन बाध्य भए ।

थापा मोहन वैद्यलाई छोडेर पुनः प्रचण्डसँग मिसिन आएपछि गृहमन्त्रालयबाट पुरस्कृत भएका हुन् । तर उनले पाएको जिम्मेवारीलाई सामान्यरुपमा पनि पूरा गर्न नसकेको सिंगो नेकपाको मूल्याकंन छ ।

सरकारको कामकारवाही बारे आलोचना बढिरहेका बेला पार्टी र प्रधानमन्त्रीले केही मन्त्री फेर्ने तयारी गरेका छन् । यो हेरफेरमा सबैभन्दा डेन्जर जोनमा बादल परेका छन् । सुरुमै प्रधानमन्त्रीले उनलाई गृहको जिम्मेवारी दिन चाहेका थिएनन् ।

तर प्रचण्डले एकताको सन्देश दिन र आफूपछिको नेताको रुपमा पनि बादललाई प्रस्तुत गरेका कारण प्रधानमन्त्री ओली पछि हटेका थिए ।

बादललाई ६ महिना पहिले नै हटाउन खोजे पनि प्रचण्डकै कारण उनको पद जोगिएको एक पूर्वमाओवादी नेताले शिलापत्रलाई जानकारी दिए । प्रचण्डको कारण पद जोगिए पनि यसको क्रेडिट भने प्रधानमन्त्री ओलीले लिए ।

पद जाने तनावमा रहेका थापालाई बरु उल्टै ओलीले ढुक्क भएर काम गर्न संकेत गरे । त्यसपछि नेकपा भित्र ओली बादलको नयाँ समिकरण सुरु भएको मानिन्छ ।

तर अहिले बादललाई हटाएर प्रधानमन्त्री ओली ईश्वर पोखरेललाई गृहमन्त्री बनाउन चाहन्छन् । पोखरेल सुरुमा अर्थमन्त्री हुन चाहन्थे त्यो नपाएपछि गृह मन्त्री ताकेको थिए तर उनले रक्षामा चित्त बझाउनु परेको थियो । रक्षामा त्यति जम्न नसकेका पोखरेल गृह पाउन धौडधुप गरिरहेका नेकपा स्रोतले बताउछ ।

प्रधानमन्त्रीबाट समेत ग्रिन सिग्नल पाएका पोखरेल गृह ताकेर बसेका छन् । यता नेकपाका अर्का अध्यक्ष प्रचण्ड पनि पछिल्लो ६ महिना देखि बादलसँग सन्तुष्ट छैनन । गृहमा पठाउन अडान लिएका विरुद्ध बादल लागेपछि प्रचण्ड झस्किएका हुन् । बिगतमा प्रचण्डबाट पटक पटक धोका पाएकाले यसपाली अध्यक्षलाई सबक सिकाउने लाइनमा बादल लागेको उनी निकट नेताहरु बताउछन् ।

बादलले आफूनिकट एक कार्यकर्तालाई ललितपुरको एक होटलमा बोलाएर प्रचण्डले आफूलाई सँधैभरी सिध्याउन खोजेकोले यो मौका प्रचण्डलाई साइजमा ल्याउन प्रयोग गर्ने मुडमा बादल रहेको पूर्व माओवादी नेताहरुको बुझाई छ । बादल प्रचण्डको लडाई भुसको आगो झै सल्किरहेको बादल निकट एक नेताले स्वीकार गर्छन् । यो कुरा राम्रोसँग बुझेका प्रचण्ड सचेत हुँदै बादललाई फालेर वर्षमान पुनलाई गृहमा पठाउने कसरमा छन् ।

प्रधानमन्त्री आफै पुनसँग त्यति सकारात्मक नभएका कारण जनार्दन शर्माले यो जिम्मा पाउने पनि चर्चा चल्न थालेको छ । तर बादल ओलीको आश्वसनका कारण ढुक्क भएर बसेका छन् । नेकपा भित्रका पछिल्ला राजनीतिक घटनाक्रम हेर्ने हो भने बादल र प्रचण्ड दुरी घट्नुको साटो बढेको देखिन्छ ।

बादल ओली मिलेर एकीकरणका लागि बनाइएको कार्यदल समेत कामै नगरी विघटन भयो । कार्यदल थप्ने पक्षमा प्रचण्ड लगायत माधव नेपाल,झलनाथ खनाल,बामदेव गौतम र नारायणकाजी श्रेष्ठले भैंसेपाटीमा सहमती गरेका थिए । सिके राउतसँग सरकारले ११ बुँदे सम्झौता गर्दा पनि ओली,उनको टिम र बादलबीच भएको थियो । जब कि सभागृह भन्दा अघिल्लो दिन नै बालुवाटारमा सम्झौता भएको थियो । यो प्रकरणमा पनि ओलीको सिग्नलमा बादलले प्रचण्डलाई थाहै दिएनन् ।

अर्को प्रकरण हो विप्लवका गतिविधिमाथि प्रतिबन्ध लगाउने निर्णय । यो निर्णय पनि बादलको ठाडो प्रस्तावमा मन्त्रीपरिषदले पास गरेको बुझिएको छ । विप्लव प्रतिबन्धमा प्रचण्डसँग कुनै सल्लाह नै नगरी गरिएको थियो । प्रचण्डले सरकारको निर्णयको रक्षा गरे पनि ओली बादल रणनीतिमा उनी बाध्य भएको नेकपा नेताहरुको तर्क छ ।

प्रकाशित मिति: शनिबार, चैत २, २०७५ २३:२९