ज्वरो आएपछि कुवेतबाट लखेटिएका बिरामी पाटन अस्पतालको आइसोलेसनमा

A+ A A-

वैदेशिक रोजगारीका क्रममा कुवेतमा कार्यरत एक नेपाली श्रमिकलाई ज्वरो आएपछि साहुले नेपाल लखेटेको छ ।

ती श्रमिकलाई ज्वरो आएपछि कुवेतबाट साहुले कोरोना भाइरसको आशंकामा नेपाल पठाएको थियो । उनको हाल पाटन अस्पतालमा उपचार भइरहेको छ । उनलाई हिजो बेलुकाबाट अस्पतालको आइसोलेसन वार्डमा राखेर उपचार गरिरहेको अस्पतालले जनाएको छ ।

अस्पतालका अनुसार ती श्रमिकलाई कोरोना भाइरस भए नभएको रिपोर्ट आउन बाँकी छ । कुवेतबाट फर्किएका नेपाली श्रमिकलाई कोरोना भाइरस लागेको हालसम्म पुष्टि भइनसकेको अस्पतालले जानकारी दिएको छ ।

विदेशबाट फर्काइएपछि अस्पतालमा उपचारका लागि आएका बिरामी हुन्, स्वास्थ्य परीक्षणको रिपोर्ट नआएसम्म उहाँलाई ज्वरो आएका बिरामी मात्र भन्नुपर्छ,’ उनको उपचारमा संलग्न एक चिकित्सकले शिलापत्रसँग भने ।

उनका अनुसार कोरोना आशंकामा पाटन अस्पतालमा भर्ना भएका अर्का एक जना विदेशबाट फर्किएका बिरामी भने निको भएर घर फर्किइसकेका छन् । उनमा कोरोना भाइरसको संक्रमण नभेटिएको अस्पतालले जनाएको छ ।

घर फर्किइसकेका ती नेपाली दुई साताअघि कोरियाबाट फर्किएका थिए । उनलाई कोरोना भाइरसको आशंकामा पाटन अस्पतालमा राखिएको थियो ।

यसैबीच, रोजगारी र अध्ययनका लागि विदेश गएका ३ जना नेपालीमा कोरोना भाइरसको संक्रमण देखिएको छ । उनीहरूको हाल सम्बन्धित देशकै अस्पतालमा उपचार भइरहेको कूटनीतिक नियोगहरूले जानकारी दिएका छन् ।

विदेशबाट नेपाल आएका एक नेपालीमा कोरोना भएको स्वास्थ्य मन्त्रालयले पुष्टि गरेको थियो । उनी उपचार भएर घर फर्किएका छन् ।

यूएईमा दुई नेपालीमा कोरोना भाइरसको संक्रमण देखा परेको छ । यूएईको स्वास्थ्य मन्त्रालयले एक विज्ञप्ति जारी गरी दुई नेपालीसहित १४ जनामा कोरोना संक्रमण फेला परेको जनाएको छ ।

मन्त्रालयका अनुसार कोरोना भाइरसको संक्रमण देखिएकाहरूमा चार जना यूएईका नागरिक, तीन जना इटालीका नागरिक, २/२ जना नेपाली र बंगलादेशी तथा १/१ जना रसियाली, भारतीय तथा सिरियाली नागरिक छन् ।

अस्ट्रेलियाको तास्मानिया राज्यस्थित होबार्टमा एक नेपाली विद्यार्थीलाई कोरोना भाइरसको संक्रमण भएको छ । १४ फागुनमा नेपालबाट सिंगापुर र सिड्नी हुँदै होबार्ट आएका एक नेपाली विद्यार्थीलाई कोरोना भाइरसको संक्रमण देखिएको पुष्टि दूतावासले गरेको थियो । ती बिरामीलाई अस्पताल भर्ना गरिएको छ भने उनीसँग नजिकको सम्पर्कमा रहेका चार जनालाई पनि क्वारेन्टाइनमा राखिएको छ ।

प्रकाशित मिति: मंगलबार, फागुन २७, २०७६ १२:१२