कोरोनाबाट बच्न सरकारको आह्‍वान : सचेत सर्वसाधारण, अटेर निजी क्षेत्र

A+ A A-

नेपालमा हालसम्म कोरोना भाइरको सङ्क्रमण एक जनालाई देखिए पनि उनलाई पूर्ण रूपमा ठीक भएको र अन्य कसैलाई नदेखिएको स्वास्थ्य सेवा विभागले जनाएको छ । तर, विश्‍वका १०१ वटा देशमा यो भाइरस फैलिइसकेको विश्‍व स्वास्थ्य सङ्गठनले जनाएको छ ।

विश्‍व स्वास्थ्य सङ्गठनले नेपाललाई उच्च जोखिममा राखेसँगै सरकारले सजगता अपनाएको छ । सरकारको तर्फबाट आयोजना गरिएका कार्यक्रमहरू स्थगित गरिएको छ । सर्वसाधारण पनि सचेत देखिएका पाइएको छ ।

केही वर्षअघिसम्म रङहरूको पर्व भनेर मनाइने होली पर्व विकृतिको रूपमा देखिएको थियो । सर्वसाधारणले २ हप्ताअघि नै सडकमा अपरिचित व्यक्तिलाई समेत रङ दलिदिने, फोहोर पानीले हान्नेजस्ता कार्य गर्ने गरेकामा पछिल्ला वर्षहरूमा क्रमश: नियन्त्रण भएको छ ।

होली पर्वको दिन पनि भेला हुने, अवीर खेल्ने गरिएकामा यस वर्ष अत्यन्तै कम देखिएको छ । यसलाई सर्वसाधारणमा आएको सचेतना देखिएको छ ।

कोरोना भाइरसको सङ्क्रमणबाट जोगिनका लागि संसदमा सार्वजनिक महत्त्वको सङ्कल्प प्रस्ताव पेस गरिएको छ । कतिपय सांसदहरूले त संसद बैठकसमेत स्थगित गर्नका लागि माग गरेका छन् ।

तर, सरकारपछिको ठूलो सङ्गठनको रूपमा रहेको नेपाल उद्योग वाणिज्य महासंघले भने यस समयमा सभा, सम्मेलन नगर्नका लागि सूचना जारी गरेको छ ।

२२ फागुनमा काठमाडौं जिल्ला प्रशासनले अर्को सूचना जारी नभएसम्म सभा, सम्मेलन नगर्न सार्वजनिक सूचना जारी गर्‍यो ।

ठीक विपरीत २३ फागुनमा भने नेपाल उद्योग वाणिज्य महासंघले आगामी २८-२९ चैतको निर्वाचन तथा साधारणसभाका लागि सार्वजनिक सूचना जारी गर्‍यो ।

२३ फागुनमा आफ्नो वेवसाइटमा हालेको सूचना २५ फागुनमा राष्ट्रिय पत्रिकामा निकालेको छ ।

कोरोना भाइरसको महामारी कति समय लामो हुने र सरकारले सार्वजनिक कार्यक्रम कहिलेसम्म नगर्ने भन्ने दिएको निर्देशनको औपचारिक मिति तय नभएका बेला महासंघले अबको १ महिनापछि हुने निर्वाचनसहितको साधारणसभाको प्रक्रिया थालेको हो ।

महासंघको साधारणसभा तथा निर्वाचनमा ७७ जिल्लाबाट नै हजारौँ प्रतिनिधिको जमघट हुने गर्छ ।

प्रदेशबाट निर्वाचन गर्न नसक्ने पत्र

नेपाल उद्योग वाणिज्य महासंघको प्रदेश समितिले प्रदेश निर्वाचन गर्न नसक्ने पत्र पठाएको महासंघ सचिवालयले जनाएको छ । कोरोना भाइरसका कारण प्रदेशको निर्वाचन गर्न नसक्ने पत्र वागमती प्रदेशबाहेक सबै प्रदेशबाट आइसकेको महासंघले जनाएको छ ।

तर, प्रदेशहरूले निर्वाचन गर्न नसक्ने भन्ने विषयमा जानकारी गराए पनि महासंघले भने केन्द्रमा निर्वाचन गर्ने गरी प्रचारमा लागेको छ । नेतृत्वका आकाङ्क्षीहरू देश दौडाहामा छन् ।

तत्कालका कार्यक्रम स्थगित गर्न सरकारको आग्रह

महासंघभित्र अहिले अहिले एकथरी जस्तोसुकै परिस्थितिमा पनि चुनाव गराउने पक्षमा उभिएका छन् भने अर्काथरी भने सरकारको अपिललाई र रोगको सङ्क्रमणलाई हेरेर अघि बढ्नुपर्ने माग गरिरहेका छन् ।

सूचना जारी गरेको विषयमा महासंघ अध्यक्ष भवानी राणा भन्छिन्, ‘यस्तो अवस्था आउनुपूर्व नै हामीले साधारणसभाको कार्यतालिका बनाएकाले सूचना जारी गरिएको हो ।’

उनले अहिलेलाई कार्यक्रम स्थगित गर्नका लागि सरकार र उद्योगी व्यवसायीबाट दबाब आए पनि आफ्नो एकल निर्णयले केही नगर्ने बताइन् ।

‘सरकारी अधिकारीले समेत मलाई फोन गरेर सरकारको अपिल हेर्नका लागि आग्रह गर्नुभएको छ । कतिपय उद्योगी व्यवसायीले पनि साधरणसभा स्थगितको माग गर्नुभएको छ तर मैले एकल निर्णय लिने कुरा होइन’, अध्यक्ष राणाले शिलापत्रसँग भनिन् ।

साधरणसभा रोक्नका लागि दाबाब आएपछि महासंघले कार्यकारिणी समितिको बैठक भने बोलाइएको छ । आगामी शुक्रबार बोलाइएको कार्यकारिणी समितिको बैठकबाट तोकिएको समयमा गर्ने वा सरकारको अर्को सूचना पर्खने भन्ने विषयमा निर्णय लिने बताइएको छ ।

प्रकाशित मिति: सोमबार, फागुन २६, २०७६ १२:००