नेपालको आन्तरिक उडानमा ४ अर्ब बढी नोक्सानी

A+ A A-

निजी वायु-यानहरूको संस्था नेपाल वायु सेवा संचालक संघले कोरोना भाइरसको प्रभावले नेपालको आन्तरिक उडानमा ४ अर्ब भन्दा बढीको आम्दानी घट्ने आंकलन गरेको छ । विश्‍व उडान क्षेत्रमा २९ विलियन डलर (तीन खर्ब ३३ अर्ब रुपैयाँ) भन्दा बढीको नोक्सानी बेहोर्नु परेको तथ्यांक सार्वजनिक गरेको अवस्थामा नेपालको आन्तरिक उडान प्रभावको पनि प्रक्षेपण गरिएको हो ।

संघका प्रवक्ता योगराज कँडेलले जनावरी र फेव्रुअरी महिनामा विदेशी पर्यटकको संख्या ४० प्रतिशतले घटेको र अहिलेको स्थिती रहेमा यो सिजनमा ८० प्रतिशतभन्दा कम हुने अवस्था रहेको बताए । उनले विदेशी उडान स्थगित भएको प्रभाव आन्तरिक उडान प्रत्यक्ष देखिन लागेको बताए । ‘यही अवस्था रह्यो भने यो सिजनमा हाम्रो उडान ८० प्रतिशतसम्म घट्न सक्ने देखिएको छ’ प्रवक्ता कँडेलले शिलापत्रसँग भने ‘व्यवसाय मात्रैलाई बचाइराख्नको लागि पनि सरकारले निकै सुझबुझपूर्ण निर्णय लिनु पर्छ’

अन्तर्राष्ट्रिय उडानहरू नेपाल प्रवेशमा प्रयोग हुने चीन, हङकङ, कोरिया थाइल्याण्ड, भारतलगायतका राष्ट्रमा प्रकोप देखिएकोले आउने दिनका लागि भएका बुकिङ पनि रद्द हुने अनुमान गरिएको कँडेलले बताए । व्यवसाय बचाउनको लागि संघले यसअघि गरेका माग पूरा गर्न अत्यावश्‍यक रहेको उनी बताउछन् ।

संघले अमेरिकी डलरमा लिएको ऋण रकमको सावा र व्याजलाई नेपाली रुपयाँमा समेत भुक्तानी व्यवस्था गर्न, हवाइ इन्धनमा ३० प्रतिशत मूल्य घटाउन, एक महिनाको क्रेडिट समय पछि भुक्तानी लिने व्यवस्था गर्न माग गरेको छ । नगद धरौटीको सट्टा बैंक ग्यारेन्टी राखे हुने व्यवस्था मिलाउनको संघको तर्फबाट गरिएको छ ।

संघले यस्तै अवस्था रहदा आफ्ना कर्मचारीलाई बेतलबी विदा दिने निर्णय पनि लिएको छ ।