यस कारण महँगो हुन्छ गोरुको छाला र प्वाँखले बनेको रोल्स रोयस कार

A+ A A-

संसारभर प्रख्यात रोल्स रोयस कार चढ्नेलाई प्रतिष्ठावान् ठानिन्छ ।

सन् १९०४ मा दुई जना बिट्रिस नागरिक हेनरी रोयस र चार्ल्स रोयसले रोल्स रोयस कार कम्पनी स्थापना गरेका थिए । जसको नाम रोल्स रोयस १० एचपी थियो ।

विशिष्ट डिजाइन र लक्जरीका लागि यो कार विश्वभर प्रख्यात छ । अत्यधिक महँगो हुने रोल्स रोयस कार उपभोक्ताको अर्डरअनुसार मात्रै निर्माण गरिन्छ ।

बजारमा राख्न कम्पनीले एकाध मोडल मात्रै बनाएर पठाउने गर्छ । त्यसपछि उसले ग्राहकको मागअनुसार कार बनाउने गर्छ ।

अनौठो इन्जिनियरिङ विशेषताका कारण यो कार पैसावालको मात्रै पहुँचमा छ । यसको टायर क्यापमा आरआर लेखिएको लोगो हुन्छ । अन्य गाडीमा पनि यस्तो लोगो हुन्छ, जुन टायरसँगै घुम्छ ।

तर, रोल्स रोयसको टायरमा रहेको लोगोे भने घुम्दैन । रोल्स रोयस कारको बनाेटमा रोल्स रोयसको लोगो राखिएको हुन्छ ।

सुरुवाती दिनमा यो लोगो कारको बोनटमा स्थायी तरिकाले टाँसिएको हुन्थ्यो । तर, लोगो चोरी हुन थालेपछि यो लोगोलाई गाडी स्टार्ट भएसँगै देखिने र गाडी बन्द भएपछि लुक्ने बनाइयो । यो लोगोलाई ‘स्प्रिट अफ एक्सटेसी’ भनिन्छ ।

कार निर्माणका क्रममा मेसिन वा रोबर्टको प्रयोग गरिँदैन । डिस्कभरीले बनाएको मेगा फ्याक्ट्री डकुमेन्ट्रीका अनुसार यो कार उद्योगमा जम्मा चारवटा रोबर्ट छन् ।

यी ४ रोबर्टमध्ये दुईवटा रोबर्टले कारमा पेन्ट लगाउने काम गर्छन् भने बाँकी दुई रोबर्टले कारका सामग्री उठाउने काम गर्छन् ।

यो विश्वभरमा ह्यान्डमेड कार निर्माण गर्ने एक मात्र कम्पनी हो । ह्यान्डमेड इन्जिनियरिङकै कारण यो कारको आयु अन्य कारको तुलनामा लामो हुन्छ । यो कार अहिलेसम्म उत्पादन गरेका कारमध्ये ६५ प्रतिशत अहिले पनि सडकमा गुड्छन् ।

सुरुवाती दिनमा बेलायत र युरोपमा मात्रै प्रयोग हुने यो कार पछिल्लो समय मध्यपूर्वी एसियाका देशमा पनि अत्यधिक प्रयोग गरिन्छ ।

विमान इन्जिन पनि बनाउने यो कम्पनीका कार निर्माण गर्न जर्मनी र बेलायतमा तीनवटा कारखाना छन् । जर्मनीमा रहेको कारखानामा गाडीको आवरण अर्थात् बडी निर्माण गरिन्छ भने बेलायतमा रहेको कारखानामा गाडी पूर्ण तयार गरिन्छ । एउटा कारको बडी निर्माण गर्न मात्रै रोल्स रोयसले १२० जना मानिस खटाउँछ ।

गाडीका ससाना डिटेलमा ख्याल गरेर बनाइने यो कारको भित्री डिजाइनमा शुद्ध छाला प्रयोग गरिन्छ । गाडीको स्टेरिङ, सिट तथा अन्य भागमा गोरुको छाला प्रयोग गरिन्छ । एउटा कारको इन्टेरियर साजसज्जा गर्न ११ वटा गोरुको छाला प्रयोग गरिन्छ ।

गाडीको सिटमा लगाइने रोल्स रोयसको लोगोका लागि अफ्रिकी चराको प्वाँख प्रयोग गरिन्छ । हरेक रोल्स रोयस कारमा टिप्लन कोटेड एउटा छाता राखिएको हुन्छ ।

विशिष्ट डिजाइनकै कारण यो गाडी १ सय किलोमिटर प्रतिघण्टाको गतिमा गुड्दा पनि बाहिरको आवाज त परै जाओस्, इन्जिनको आवाज पनि गाडीभित्र सुनिँदैन । तीव्र गतिमा गुड्दा पनि यो गाडीभित्र ड्यास बोर्डमा हुने घडीको टिक–टिक आवाज मात्रै सुनिन्छ ।

ब्रिट्रिस इन्जिनियरिङको मिसायल मानिने यो कार कम्पनी सन् १९९८ मा बीएमडब्लूले खरिद गरेको थियो । तर, पनि यो कारको शान अझै घटेको छैन । बीएमडब्लूले खरिद गरे पनि यो कारको माग अझै घटेको छैन ।

आफ्ना हरेक कार प्रयोगकर्तालाई रोल्स रोयसले हरेक वर्ष बेलायती शैलीमा हस्तलिखित पत्र पठाउने गर्छ ।

संसारभर प्रतिष्ठाको विषय मानिने यो कारलाई भारतका एक महाराजाले भने फोहोर उठाउने गाडीमा परिणत गरेका थिए । भारतका महाराजा जय सिंह बेलायत भ्रमणमा थिए । त्यहाँ उनले रोल्स रोयस देखे र किन्न खोजे । तर, रोल्स रोयसले उनलाई कार किन्न दिएन ।

त्यसपछि उनले अर्कै नामबाट सातवटा रोल्स रोयस अर्डर गरे । अर्डरअनुसारका गाडी भारत आइपुगेपछि उनले ती गाडीलाई फोहोर उठाउने गाडी बनाए । गाडीको टायर किनारमा कुचो झुन्ड्याएर सडक सफा गर्ने गाडी बनाए ।

बेलायती इन्जिनियरिङको उदाहरण बनेको कारको बेइज्जत भएपछि बेलायत सरकारले नै महाराजा जयसिंहलाई रोल्स रोयस कारको अपमान नगर्न अनुराध नै गर्नुपर्‍याे ।

रोल्स रोयस कार चलाउन रोल्स रोयसले एउटा तालिम पनि दिने गर्छ । विभिन्न मिडियामा रोल्स रोयस कारको मूल्यसूची आउने गरे पनि यसको मूल्य खरिदकर्ता र रोल्स रोयसलाई मात्र थाहा हुन्छ ।

कारको यही विशिष्ट पहिचानले मोहित भएरै होला, भिक्षु ओशोले करिब १ सय रोल्स रोयस राखेका थिए । भनिन्छ, अहिले पनि रोल्स रोयसका विश्वभर केही नियमित ग्राहक छन् । (एजेन्सीको सहयोगमा)

प्रकाशित मिति: शुक्रबार, फागुन २३, २०७६ २०:१३