२०७७ वैशाखदेखि भीमफेदी–कुलेखानी सुरुङमार्ग निर्माण सुरु हुने

A+ A A-

बागमती प्रदेश सरकारले २०७७ वैशाखदेखि भीमफेदी–कुलेखानी सुरुङमार्ग निर्माण सुरु गर्ने भएको छ । निजीक्षेत्रको कम्पनी नेपाल पूर्वाधार विकास कम्पनीले निर्माण गर्ने भनिएको सो काम अब बागमती प्रदेश सरकारले नै गर्ने भएको हो ।

प्रदेश सरकारले ‘पोष्टबहादुर बोगटी भीमफेदी–कुलेखानी सुरुङमार्ग’ नामकरण गरेर २ वर्षअघिबाट निर्माणको तयारी थालेको थियो ।

बागमती प्रदेशका भौतिक पूर्वाधार विकासमन्त्री रामेश्वर फुयाँलले शुक्रबार भीमफेदी गाउँपालिका पुगेर सुरुङमार्ग निर्माणस्थलको निरीक्षण गर्दै वैशाखबाट निर्माण सुरु हुने जानकारी दिए । यो योजनालाई प्रदेश सरकारले गौरवको योजनामा राखेको छ ।

प्राविधिक टोलीसहित निर्माणस्थल पुगेका मन्त्री फुयाँलले भीमफेदी–कुलेखानी सुरुङमार्ग निर्माणको काम २०७७ वैशाखदेखि सुरु हुने जानकारी दिए ।

सुरुङमार्गको प्रवेशद्वार भीमफेदीको कोलडाँडाको फेदीमा पुगेर मन्त्री फुयाँलले प्राविधिक अध्ययन गरिरहेको टोलीसँग कामका बारेमा जानकारी लिए ।

प्राविधिक टोलीका इन्जिनियरिङ भूगर्भशास्त्री ईश्वर दाहालले सुरुङमार्गको डीपीआरबारे भइरहेको प्राविधिक अध्ययनका बारेमा जानकारी गराएका थिए । भूगर्भशास्त्री दाहालले सुरुङमार्गको ५० प्रतिशत प्राविधिक अध्ययन सकिएको जानकारी दिए ।

भीमफेदीदेखि कुलेखानीसम्म ३.२ सय १५ किलोमिटर सुरुङ निर्माण हुनेछ । डेढ महिनाभित्र सुरुङमार्गको डीपीआर तयार हुने दाहालले बताए ।

भूगर्भशास्त्री दाहालका अनुसार टोपोग्राफिक सर्वे, जियोलोजिकल म्यापिङ सर्वे, ड्रोन सर्वे भइरहेको छ । सुरुङमार्गको प्राविधिक अध्ययनका लागि ४५ जना प्राविधिक खटिएका छन् ।

१० जनाले डिजाइनिङ, २० जनाले सोयल इन्भेष्टिगेसन, ५ जनाले टाेपोग्राफिक सर्वे, ५ जनाले जियोफिजिकल सर्वे र ५ जनाले ड्रोन सर्वे गर्ने काममा खटिएको भूगर्भशास्त्री दाहाल जानकारी दिए ।

प्रकाशित मिति: शुक्रबार, फागुन २३, २०७६ १८:०७