३ महिनालाई औषधिको मौज्दात, उत्पादनमा समस्या छैन

A+ A A-

नेपाल औषधि उत्पादक संघले नेपालमा औषधिको अभाव नहुने बताएको छ । कोरोना भाइरस विश्‍वव्यापी बनिरहेका बेला आउन औषधि र औषधिजन्य सामग्रीमा समेत कालोबजारी भइरहकेो अवस्थामा संघले भने कुनै समस्या नहरको बताएको हो ।

अहिले औषधि अभाव हुने हो कि भन्ने अफवाह फैलिएको देखिएको छ , औषधि उत्पादक संघका अध्यक्ष नारायणबहादुर क्षेत्रीले शिलापत्रसँग भने, यसबाट डराउनुपर्ने अवस्था छैन, हामीसँग कम्तीमा ३ महिनालाई पुग्ने औषधि अहिले नै मौज्दात छ।

औषधि उत्पादक संघको तर्फबाट पनि शुक्रबार विज्ञप्ति जारी गर्दै औषधि अभाव नरहेको जनाइएको छ । भूकम्प र नाकाबन्दीका बेला पनि देशमा ‌औषधि अभाव हुन नदिएको स्मरण संघले गराएको छ ।

संघले अहिले औषधि उद्योग आत्मनिर्भर हुने चरणमा रहेको स्मरण पनि गराएको छ । एलोपेथिक औषधिका ६२ वटा उद्योगहरू सञ्‍चालनमा रहेको र अरू ४२ वटा निर्माणाधीन अवस्थामा रहेको भन्दै समस्या नपर्ने जनाएको छ ।

हाल भारतले २६ प्रकारका औषधि र कच्चा पदार्थको निर्यातमा रोक लगाएको अवस्थामा पनि नेपाली उद्योगलाई विश्‍वास गर्नका लागि अध्यक्ष क्षेत्रीले आग्रह गरेका छन् । भारतले आफूलाई समस्या पर्ने भएका कारण केही कच्चा पदार्थ निर्यातमा रोक लगाए पनि हामीले कच्चा पदार्थ खोजेर पनि औषधि उत्पादन गर्छौं, मात्रै सबैको साथ नेपाली उद्योगीलाई चाहिएको हो , क्षेत्रीले भने ।

औषधि उत्पादक संघले जारी गरेको विज्ञप्तिमा नीतिगत रूपमा नेपाललाई औषधिमा आत्मनिर्भर बनाउन खोज्ने सरकारले व्यवहारमा विदेशी कम्पनीलाई अनुनय गरेर स्वदेशी उद्योगीलाई निराश बनाइरहेको गुनासो गरिएको छ ।

नेपाल सरकारको उच्च संयन्त्रलाई आग्रह गर्न चाहन्छौँ, हामी नेपालमा उत्पादन हुने कुनै पनि औषधि अभाव हुन दिने छैनौँ , विज्ञप्तिमा भनिएको छ, सरकारले विदेशी गुहार्नुपर्दैन । नेपाल र नेपालीलाई सहज, सुलभ र गुणस्तरीय औषधि पुर्‍याउन तत्पर र सक्षम पनि छौँ ।

प्रकाशित मिति: शुक्रबार, फागुन २३, २०७६ १५:३३