विराटनगरमा ‘मास्क’ को कालो बजारी, प्रदेश–१ मा उच्च सतर्कता

A+ A A-

विश्व स्वास्थ्य संगठन (डब्लूएचओ) ले नेपाल कोरोना भाइरसको उच्च जोखिममा रहेको बताएपछि मुलुकभर यतिबेला ‘मास्क’ को अभाव सिर्जना भएको छ ।

कोरोना भाइरस संक्रमणबाट बच्नका लागि सतर्कता अपनाउँदै सबैले ‘मास्क’ को प्रयोग गर्न थालेपछि प्रदेश–१ को राजधानी विराटनगरमा पनि ‘मास्क’ को कालो बजारी सुरू भएको छ ।

औषधि पसल सञ्चालक र मास्क विक्रेताहरूले चर्को मूल्य असुल्न कृतिम अभाव सिर्जना गरेको उपभोक्ता अधिकारकर्मी उत्तम ढुंगेलले बताए । ‘मास्क विक्रेता पसले र फार्मेसीहरूले सर्वसाधारणसँग ३ देखि १० गुणासम्म बढी मूल्य असुलिरहेका छन्,’ उनले भने, ‘यसलाई सम्बन्धित निकालयले तत्काल नियन्त्रण गर्न जरूरी छ ।’

यतिबेला विराटनगरका विभिन्न फार्मेसीहरूले कृत्रिम अभाव सिर्जना गरेर चर्को मूल्य असुल्ने गरेको सर्वसाधारणले गुनासो गरेका छन् । कोरोना भाइरसबाट जोगिन सबैभन्दा सुरक्षित मानिने सर्जिकल मास्क मात्रै नभएर साधारण मास्कसमेत बजारमा चर्को मूल्यमा बिक्रिवितरण भइरहेको पाइएको हो ।

यतिबेला विराटनगरमा सामान्य मास्कको मूल्यसमेत आकासिएको छ । तीनै तहका सरकार र प्रशासनले भाइरसबाट जोगिन उच्च सतर्कता अपनाई अनिवार्य मास्कको प्रयोग गर्न आग्रह गरेपछि व्यापारीहरूले मास्कको मूल्य बढाएका हुन् । यतिबेला सबैले प्रायः मास्क लगाएर हिँड्न थालेका छन् ।

विद्यालयमा पनि मास्क अनिवार्य

यता विभिन्न निजी तथा सामुदायिक विद्यालयहरूले पनि आफ्ना विद्यार्थीहरूलाई अनिवार्य रूपमा विद्यालय आउँदा मास्कको प्रयोग गर्न लगाएका छन् । विराटनगरकी अभिभावक सरिता घतानीले विद्यालयले मास्क लगाएर मात्र आफ्ना नानी विद्यालयमा पठाउन भनेको बताइन् ।

विराटनगरका विभिन्न अस्पतालमा पनि सर्जिकल मास्कको अभाव छ । मास्क अभाव हुन थालेपछि बजारमा केही व्यापारीहरूले कोरोना त्रासको फाइदा उठाउँदै दोब्बर महँगो मूल्यमा मास्क बेच्न थालेका छन् । पाँच रूपैयाँमा पाइने मास्क अहिले २० देखि ५० रूपैयाँसम्ममा बेच्ने गरेको पाइएको छ ।

प्रदेशभर उच्च सतर्कता

कोरोना भाइरस (कोभिड १९) को संक्रमणबाट जोगिनका लागि प्रदेश–१ मा उच्च सर्तकता अपनाइएको छ । प्रदेश सरकारले शंकास्पद व्यक्तिको नमूना संकलन, संक्रमितको उपचारका लागि आइसोलेसन वार्ड, आपत्कालीन स्वास्थ्य व्यवस्थापन केन्द्र, सीमा नाकामा साबुन पानीले हात धुनेदेखि लिएर स्वास्थ्यकर्मी र सुरक्षाकर्मीको संयुक्त टोली परिचालन गर्नेसम्मका लागि काम सुरू भएको छ ।

विश्व स्वास्थ्य संगठनले नेपाललाई कोरोना भाइरसको उच्च जोखिममा समावेश गरेपछि प्रदेश स्तरमा उच्च सतर्कता अपनाउने काम सुरू भएको सामाजिक विकासमन्त्री जीवन घिमिरेले बताए ।

‘नेपाल कोरोना भाइरसको उच्च जोखिममा समावेश भए पनि अहिले त्रासदीपूर्ण अवस्था छैन,’ मन्त्री घिमिरेले भने, ‘उच्च सतर्कता अपनाउन भने आवश्यक छ । त्यसका लागि प्रवेशद्वारबाट नेपाल भित्रिने विदेशी नागरिकको निगरानी र शंका लागेमा आवश्यक स्वास्थ्य परीक्षण गरिने प्रबन्धसमेत मिलाइएको छ ।’

कोरोना भाइरस संक्रमितको उपचारका लागि प्रदेश–१ मा २८ वटा बेड तयारी अवस्थामा राखिएको छ । शंकास्पद व्यक्तिको नमुना संकलनदेखि लिएर संक्रमितको तत्काल उपचारका लागि प्रदेश–१ का ४ वटा अस्पतालका २८ बेडलाई तयारी अवस्थामा राखिएको प्रदेश–१ स्वास्थ्य निर्देशनालयका प्रमुख चन्द्रदेव मेहताले बताए ।

विराट मेडिकल कलेजमा १२, वीपी कोइराला स्वाथ्य विज्ञान प्रतिष्ठान धरानमा १०, कोशी अञ्चल अस्पतालमा ५ बेड र नोबेल मेडिकल कलेजमा आईसीयूसहितको एउटा आइसोलेसन वार्ड तयार गरिएको उनले जानकारी दिए ।

अस्पताल र प्रयोगशालाका चिकित्सकलाई विशेष प्रकारको तालिम दिने व्यवस्थासमेत प्रदेश सरकारले मिलाएको छ । कोशी अस्पतालमा प्रदेशस्तरको आपत्कालीन स्वास्थ्य व्यवस्थापन केन्द्र पनि स्थापना गरिएको छ ।

कोरोना संक्रमणको सावधानीका लागि प्रदेश स्वास्थ्य निर्देशनालयका प्रमुख चन्द्रदेव मेहताको संयोजकत्वमा एक प्राविधिक समिति पनि निर्माण गरिएको छ ।

समितिमा सामाजिक विकास मन्त्रालय जनस्वास्थ्य महाशाखा, कोशी अस्पताल, नोबेल मेडिकल कलेज, विराट मेडिकल कलेजका प्रमुख वा प्रतिनिधि र विश्व स्वास्थ्य संगठनका प्रतिनिधि रहेका छन् ।

नेपालको पूर्वी सीमा नाका काँकडभिट्टा, विराटनगरको रानी र इलामको पशुपतिनगर, झापाको भद्रपुरमा विशेष निगरानीको सुरू गरिएको छ ।

प्रकाशित मिति: शुक्रबार, फागुन २३, २०७६ १३:४४