बलात्कार प्रयासकाे आराेप लागेका प्रदेश सांसदलाई ४ दिन हिरासतमा राख्न अनुमति

बलात्कार प्रयासकाे आराेप लागेका प्रदेश सांसदलाई ४ दिन हिरासतमा राख्न अनुमति

A+ A A-

जबर्जस्ती करणी उद्योगको आरोपमा बुधबार पक्राउ परेका नेपाल कम्युनिस्ट पार्टी नेकपाका प्रदेशसभा सदस्य अक्कलबहादुर रावललाई ४ दिन हिरासतमै राखेर अनुसन्धान गर्न कैलाली जिल्ला अदालतले अनुमति दिएको छ ।

जिल्ला अदालत कैलालीका न्यायाधीश कृष्णप्रसाद नेपालको इजलासमा भएको बहसपछि उनलाई हिरासतमा राख्न अनुमति दिएको जिल्ला अदालत कैलालीका स्रेस्तेदार रैभान कुन्जेडाले बताए ।

कुन्जेडाका अनुसार रावललाई २१ फागुनदेखि लागू हुने गरी ४ दिनसम्म हिरासतमै राखेर अनुसन्धान गर्न अदालतले अनुमति दिएको हो ।

नेकपा सुदूरपश्चिमका सचेतकसमेत रहेका प्रदेशसभा सदस्य रावललाई अदालतले सो अनुमति दिएलगत्तै प्रहरीलाई अनुसन्धान कार्यमा सहज भएको छ ।

जिल्ला प्रहरी कार्यालय कैलालीका प्रहरी नायव उपरीक्षक बस्नेतले रावलमाथि जवर्जस्ती करणी उद्योगमा मुद्दा दर्ता भई अनुसन्धान प्रक्रिया अगाडि बढिसकेको बताए ।

उक्त मुद्दामा आरोप पुष्टि भए ५ वर्षसम्म कैद हुन सक्ने व्यवस्था रहेको उनले जानकारी दिए । यो मुद्रामा साढे ३ वर्षदेखि ५ वर्षसम्म कैद सजायको व्यवस्था छ । रावललाई जिल्ला प्रहरी कार्यालय कैलालीले आज म्याद थपका लागि अदालत उपस्थित गराएको थियो ।

रावलविरुद्ध धनगढी उपमहानगरपालिका– ४ की २५ वर्षीया विवाहित महिलाले बलात्कारको प्रयास गरेको भन्दै उजुरी दिएकी थिइन् । महिलाको उजुरीपछि जिल्ला प्रहरी कार्यालय कैलालीले जिल्ला अदालत कैलालीबाट १५ फागुनमा पक्राउका लागि अनुमति पाएकोमा बुधबार मात्रै पक्राउ गरेको थियो ।

मेयरबाट पराजित भएपछि वाम गठबन्धनको तर्फबाट प्रदेशसभा सदस्यका उम्मेदवार बनेका रावल अछाम क्षेत्र नम्बर २ ‘ख’ बाट निर्वाचित भएका थिए ।

बलात्कार प्रयासको आरोप लगाउने महिलाले भान्जीको नाता लगाएर नेकपा सुदूरपश्चिमका सांसद रावलले बलात्कारको दुष्प्रयास गरेको बताएकी छन् । पीडित महिलाले २१ माघमा कोठामै आएर रावलले जबर्जस्ती करणी गर्न खोजेको आरोप लगाएकी छन् । यता आरोपित रावलले भने आफूलाई फसाउन चलखेल भइरहेको दाबी गर्दै आएका छन् ।

यसअघि नेकपाबाट निवार्चित सांसद तथा सुदूर पश्चिम प्रदेश सरकारका सामाजिक विकास मन्त्री दीर्घ सोडारी महिलासँगको अनैतिक सम्बन्धका कारण बर्खास्तगीमा परिसकेका छन् ।

प्रकाशित मिति: बिहीबार, फागुन २२, २०७६ १९:४२