सुदूरपश्चिम प्रदेशभर लागू भयो स्वास्थ्य बीमा कार्यक्रम

A+ A A-

सरकारले सुदूरपश्चिम प्रदेशभर स्वास्थ्य बीमा कार्यक्रम विस्तार गरेको छ । बिहीबार डडेल्धुरा सदरमुकाममा एक कार्यक्रमका विच डडेल्धुरा जिल्लामा बीमा कार्यक्रम शुभारम्भ भएसँगै सुदूरपश्चिमका सबै जिल्लामा उक्त कार्यक्रम कार्यान्वयनमा आएको हो ।

संघीय सरकार स्वास्थ्य तथा जनसंख्या राज्यमन्त्री नवराज रावतले अमरगढी नगरपालिकाका नगरप्रमुख विशेश्वरप्रसाद ओझालाई स्वास्थ्य बीमा परिचयपत्र दिँदै कार्यक्रमको शुभारम्भ गरेका हुन् ।

स्वास्थ्य उपचारमा अनियन्त्रित रूपमा भइरहेको व्यक्तिगत तथा पारिवारिक खर्च घटाउँदै नागरिकलाई गुणस्तरीय स्वास्थ्य सेवाको पहुँचमा पु¥याउने र सेवाको उपयोगमा वृद्धि गर्ने उद्देश्यले स्वास्थ्य बीमा कार्यक्रम सञ्चालनमा ल्याइएको हो ।

५५औँ जिल्लाको रूपमा डडेल्धुरामा स्वास्थ्य बीमा कार्यक्रम लागू गरिएको स्वास्थ्य बीमा बोर्ड सुदूरपश्चिम प्रदेशका प्रदेश संयोजक जनक साउदले जानकारी दिए । यसअघि बुधबार राज्यमन्त्री रावतले डोटीमा स्वास्थ्य बीमा कार्यक्रमको शुभारम्भ गरेका थिए ।

सुदूरपश्चिम प्रदेशका सात जिल्लामा स्वास्थ्य बीमितको संख्या हालसम्म २ लाख ६० हजारभन्दा बढी पुगेको उनको भनाइ छ । विसं २०७२ चैत २५ गतेदेखि कैलालीमा पहिलोपटक स्वास्थ्य बीमा कार्यक्रम सुरुआत भएको थियो ।

डडेल्धुरा र डोटीमा उक्त कार्यक्रम लागू भएसँगै सुदूरपश्चिमका सबै जिल्लामा स्वास्थ्य बीमा कार्यक्रम लागू भएको देशकै पहिलो प्रदेश भएको स्वास्थ्य बीमा बोर्ड टेकु, काठमाडौंका कार्यकारी निर्देशक रमेशकुमार पोखरेलले जानकारी दिए ।

७० वर्षभन्दा माथिका ज्येष्ठ नागरिक, विपन्न, एचआईभी संक्रमित, क वर्गको अपाङ्गता भएका व्यक्ति, एमडीआर टीभी र कुष्ठरोगीको बोर्डले निःशुल्क बीमा गर्ने उनले बताए । महिला स्वास्थ्य स्वयंसेविकाहरूको ५० प्रतिशत अनुदानमा बीमा हुने उनले जानकारी दिए ।

स्वास्थ्य बीमा कार्यक्रमका लागि डडेल्धुरामा रहेका ५२ वडाबाट एक दर्ता सहयोगी छनोट गरी बिहीबारदेखि नै उनीहरूलाई आ–आफ्नो क्षेत्रमा खटाइएको छ ।

देशका ५० जिल्लामा कार्यान्वयनमा आइसकेको स्वास्थ्य बीमा कार्यक्रम चालू आर्थिक वर्ष २०७६÷७७ भित्रमा ७७ वटै जिल्लामा कार्यान्वयन गर्ने सरकारको लक्ष्य छ ।

त्यसैगरी, सन् २०२० मा बीमितको संख्या ५० प्रतिशत र सन् २०३० सम्ममा १०० प्रतिशत पु¥याउने लक्ष्य छ । त्यस्तै, कडा प्रकारका रोग (अर्बुदरोग, मुटुरोग, हेड इन्जुरी, स्पाइनल इन्जुरी, सिकलसेल एनिमिया र अल्जाइमर) मा नदोहिरिने गरी थप १ लाख रुपैयाँबराबरको सेवासुविधा दिने व्यवस्था छ ।

स्वास्थ्यकर्मीले सहज तरिकाले सेवा दिनुपर्छ

राज्यमन्त्री रावतले स्वास्थ्य बीमाका बारेमा चेतना फैलाउनु जरुरी रहेको बताए । उनले यहाँका सबै नागरिकलाई स्वास्थ्य बीमामा अवद्ध गराउन सहयोग गर्न जनप्रतिनिधिहरूलाई आग्रह गरे । उनले बीमा कार्यक्रमअन्तर्गत दिइने सेवाहरू अस्पतालहरूले सहज ढंगले प्रदान गर्नुपर्ने बताए ।

‘सेवाग्राहीलाई दिइने सेवा अत्यन्तै सरल ढंगले दिनुपर्छ । कतिपय ठाउँमा सेवाग्राहीले असहज महसुस गरेको सुन्नमा आएको छ,’ उनले भने, ‘स्वास्थ्यकर्मीले सहज तरिकाले सेवा दिन जरुरी छ । डाक्टरसापहरूले बिरामीलाई जाँच गर्नेबित्तिकै २५ प्रतिशत बिरामी सञ्चो होस् । त्यस्तो खालको व्यवहार हुनुपर्छ, शासकको जस्तो होइन ।’

स्वास्थ्य बीमा कार्यक्रमलाई प्रभावकारी ढंगले अगाडि बढाउनका लागि नेपाल सरकार लागिपरेको समेत उनले बताए ।

प्रकाशित मिति: बिहीबार, फागुन २२, २०७६ १९:११