निर्माण सामग्रीमा आगो लगाइएको घटनाप्रति महासंघको आपत्ति

A+ A A-

निर्माण कार्यका लागि प्रयोगमा रहेका यन्त्र उपकरणमाथि अज्ञात समूहबाट निरन्तर आगजानी गरिएको भन्दै नेपाल निर्माण व्यवसायी महासंघले आपत्ति जनाएको छ । महासंघका महासचिव रोशन दाहालले बिहीबार विज्ञप्ति जारी गर्दै नेपाल सरकार, गृहमन्त्री, सुरक्षा निकायका प्रमुखलगायतलाई बारम्बार लिखित तथा मौखिक रूपमा जानकारी गराउँदासमेत आगजनीका घटनामा कुनै कमी नआएको उल्लेख गरिएको छ ।

यस्ता घटनाले समृद्ध नेपाल: सुखी नेपाली को अवधारणासहित भौतिक पूर्वाधारका विकासमा खटिएको सिंगो मुलुकलाई नै अपूरणीय क्षति हुने एवम् भौतिक पूर्वाधारका कार्यहरू समयमा हुन नसकी राज्यले लिएको लक्ष्यसमेत पूरा हुन नसक्ने महासंघले जनाएको छ ।

महासंघका अनुसार कपिलवस्तुको विजयनगर गाउँपालिकाको लोहोरौलामा बुधबार राती अज्ञात समूहले स्काभेटर, व्यक्होलोडर गरी ४ थान र जीप २ थानमा आगजनी गरेका छन् । हुलाकी राजमार्ग निर्माण गर्ने जिम्मा पाएको महासंघका सल्लाहकार एवम् पूर्वअध्यक्ष रमेश शर्माको मुलुककै प्रतिष्ठित शर्मा एण्ड कम्पनीले उक्त सडकखण्डमा निर्माण कार्य गरिरहेको महासंघले जनाएको छ ।

अज्ञात समूहद्वारा ग्यारेजमा राखिएको अवस्थामा आगजनी गरिएको घटनाबाट महासंघ स्तब्ध सँगसँगै आक्रोशित भएको र आगजनीबाट करिब ५ करोड रुपैयाँ बराबराको क्षति भएको जानकारी सम्बन्धित कम्पनीबाट महासंघलाई प्राप्त भएको विज्ञप्तिमा जनाइएको छ ।

महासंघले घटनामा संलग्नलाई तत्काल पक्राउ गरी कारबाही गर्न माग गर्दै व्यवसायीसहित उनीहरूको उपकरणको सुरक्षाको पूर्ण प्रत्याभूति गर्न माग गरेको छ । साथै पीडित कम्पनीलाई राज्यको तर्फबाट तत्काल उचित क्षतिपूर्तिको व्यवस्था गरिदिन पनि आग्रह गरेको छ ।