युनिग्लोव कलेजको अन्तर्राष्ट्रिय सम्मेलन सुरु

A+ A A-

युनिग्लोव कलेजको आयोजनामा अन्तराष्ट्रिय सम्मेलन काठमाडौंस्थित नयाँ बानेश्वरमा सुरु भएको छ ।

विद्यार्थीहरुलाई सैद्धान्तिक र व्यवहारिक ज्ञानकासाथै अनुसन्धान र अन्वेषणमूलक शिक्षा प्रदान गर्ने उद्देश्यले सो कार्यक्रमको आयोजना गरिएको हो । कार्यक्रमको उद्घाटन गदै पूर्वअर्थमन्त्री रामशरण महतले अनुसन्धानको महत्व र युनिग्लोव कलेजले शैक्षिक क्षेत्रमा ल्याएको बताए ।

अर्को फरक प्रसंगमा बाेल्दै महतले नेपालको प्राचिनकालदेखि छिमेकी देशसँग व्यापारको सम्बन्ध सुमधुर रहेको र आधुनिक व्यापारमा पनि नेपाल विश्वको दुई ठुला छिमेकी मुलुक भारत र चीनको बिचमा रहेकोले साे आवसरको फाईदा लिन रणनैतिक भुमिका खेल्नु पर्नेमा जोड दिए ।

कार्यक्रममा विश्वविद्यालय अनुदान आयोगका प्रमुख प्राडा. भिमप्रसाद सुवेदीले यस्ता कार्यक्रमहरु निरन्तर आयोजनाले कलेजको प्रतिवद्धतालाई झन प्रगाढ पार्ने बताए ।

स्वदेशमा आयोजना गरिने यस्ता कार्यक्रमले अनुसन्धान र अन्वेषणको माध्यमबाट युवाहरुलाई स्वेदशमै उद्यमशिलता र रोजगारीको क्षेत्रमा आर्कषित गर्न सकिने उनकाे भनाइ थियो ।

सम्मेलन प्रमुख प्राडा. राधेश्याम प्रधानले अनुसन्धानमुलक शिक्षण पद्धतिमा जोड दिदै अर्थशास्त्र, वित्तशास्त्र, बजार व्यवस्थापन र संस्थागत सुशासनमा हुने नयाँ अनुसन्धान र अन्वेषणले शिक्षामा नयाँ आयाम थपिने बताए ।

कार्यक्रममा कलेजका प्रिन्सिपल डा.नरबहादुर विष्टले आगन्तुकहरुलाई स्वागत गर्दै युनिग्लोव कलेजले शैक्षिक क्षेत्रसँगै आर्थिक र सामाजिक क्षेत्रमा परिवर्तनक लागि अनुसन्धानमूलक शिक्षण पद्धतिले महत्वपूर्ण भूमिका खेल्ने बताए ।

निर्देशक अनन्तराज घिमिरेले अन्तराष्ट्रिय सम्मेलनले विद्यार्थीमा अनुसन्धानको ज्ञान तथा बौद्धिक क्षमता अझ मजबुद बन्ने बताए ।

कार्यक्रमको समापनमा बोल्दै सभापति डा.खगेन्द्र ओझाले अन्तर्राष्ट्रिय सम्मेलन नेपालमै शैक्षिक क्षेत्रले गरेको सबैभन्दा ठुलो र ऐतिहासिक भएको बताए ।

कार्यक्रममा विभिन्न देशबाट आएका प्रतिनिधिहरुले भनाई राख्दै यस्ता कार्यक्रमले आपसी सम्बन्धलाई झन गाढा बनाउने विश्वास व्यक्त गरे ।

कार्यक्रममा अमेरिका, मलेसिया, भारत, बङ्लादेशलगायत ५ देशका प्रतिनिधिहरुको सहभागिता छ । कार्यक्रममा १ सय ६० वटा अनुसन्धानमूलक कार्यपत्र प्रस्तुत गरिएको थियो भने ४५ भन्दा बढी विदेशी र ९ सय भन्दाबढी स्वदेशी व्यक्तिले सहभागिता जनाएका छन् ।

प्रकाशित मिति: बुधबार, फागुन २१, २०७६ १७:२६