सरकारी अस्पतालभित्रै ५ रुपैयाँको मास्कलाई सय रुपैयाँ, विभाग भन्छ हो र !

A+ A A-

ग्लोवल कलेजमा एमबीएमा अध्ययनरत रक्षा खनाल सर्जिकल मास्क खोज्दै वानेश्वरको सिभिल अस्पताल परिसरमा पुगिन् । कोरोना भाइरसको त्रासका कारण सेनिटाइजर र सर्जिकल मास्क खोज्न निस्किएकी खनालले अस्पतालभित्रको औषधि पसल पुगेर ५ रुपैयाँ पर्ने मास्कलाई १ सय रुपैयाँमा किनिन् ।

ह्याण्ड वासर र सेनिटाइजर भने वानेश्वरभरका मेडिकल पसल चहार्दा पनि नभेटेपछि उनी रित्तो हात फर्किइन् ।

बजारमा ५ रुपैयाँ खुद्रा मूल्यमा पाउने मास्क धेरैवटा पसल चहार्दा पनि नपाएपछि १ सय रुपैैयाँ तिरेरै भए पनि खरिद गरेको उनी बताउँछिन् ।

‘मास्क यति धेरै महँगो छ । झन् सेनिटाइजर त पाउन नै छोडिसकेछ,’ बुधबार बानेश्वर चोकमा भेटिएकी क्षेत्रमै भेटिएकी खनाल भन्छिन्, कोरोनाको त्रासका नाममा बजारमा मास्कदेखि खाद्यान्नसम्मको कालोबजारी सुरु भइसकेछ ।’

त्रासको नाममा भएको कालोबजारीको सिकार बन्ने खनाल प्रतिनिधि पात्र मात्र हुन्र । अहिले बजारमा सर्जिकल मास्क र सेनिटाइजर जस्ता सामग्री खोज्दै भौँतारिने ग्राहकको संख्या अत्यधिक छ, जसको फाइदा सरकारी र निजी अस्पतालका औषधि पसलले मात्र होइन, उपत्यकाका सबै औषधि पसलले खुलेआम उठाइरहेका छन् ।

तर, बजार अनुगम गर्ने सरकारी संयन्त्र भने मास्कलगायत खाद्य सामग्रीको कालोबजारी चुलिँदासम्म बेखबर छ । उद्योग, वाणिज्य तथा आपूर्ति विभागको अनुगमन शाखाका अधिकृत दीपकराज पोखरेल बजारमा मास्कको कालोबजारी भएको विषयमा जानकारी नभएको बताउँछन् ।

‘बढीमा बेचेको छ र ! हामीलाई यस विषयमा थाहा छैन त !’, उनी भन्छन् ।

सरकारी अस्पताल छेउछाउका औषधि पसलहरूमा पनि ५ रुपैयाँ पर्ने मास्क ५० रुपैयाँभन्दा कममा पाइँदैन । बानेश्वरमै रहेको एभरेष्ट अस्पताल छेवैको औषधि पसलमा ६० रुपैयाँसम्ममा मास्क बिक्री भइरहेको छ ।

५ रुपैयाँ खुद्रा मूल्यको मास्क सिभिल अस्पताल परिसरमा १ सय रुपैयाँ, भक्तपुरको ठिमी क्षेत्रमा ४० रुपैयाँ, बुद्धनगरमा ६० रुपैयाँ, नर्भिक अस्पताल छेउछाउका पसलहरूमा ४० देखि ८० रुपैयाँसम्ममा बिक्री भइरहेको छ ।

रत्नपार्क क्षेत्र, गठ्ठाघर, ललितपुरको चापागाउँ, बालाजु, कलंकी, बानियाँटारलगायतका क्षेत्रमा रहेका औषधि पसलमा भने मास्क नै भेटिन छाडेको छ ।

निजी औषधि पसलभन्दा सरकारी अस्पतालभित्रै सर्जिकल मास्क चरम महँगो भइरहेको छ । वीर अस्पताल, प्रसूति गृह, नर्भिक अस्पताल, सिभिल अस्पताल र एभरेष्ट अस्पताल परिसरभित्रै व्यापारीले मनोमानी रूपमा मूल्य निर्धारण गर्दै मास्क बिक्री गर्दै आइरहेका छन् ।

मूल्य बढाएर बिक्री वितरण हुँदा न अस्पताल प्रशासनले कारबाही गरेको छ न त अनुगमन गर्ने निकायले अनुगमन नै गरेका छन् ।

एकाएक बजारबाट मास्क हराउन र मूल्य बढ्न थालेपछि शिलापत्रले उद्योग, वाणिज्य तथा आपूर्ति विभागका अनुगमन शाखा अधिकृत दीपकराज पोखरेललाई सोध्यो, मास्कको कालोबजारी भइरहेको रहेछ नि केही कारबाही हुँदैन ?’

पोखरेलले जवाफ दिए, ‘यो सरासर झूट हो ।’

पोखरेलले थपे, ‘यो सबै हल्ला मात्र हो । हामी दिनहुँ अनुगमनमा छौँ । मूल्य बढेको छैन । बजारमा पहिलाकै मूल्यमा मास्क पाइन्छ । अभाव पनि छैन ।’

५ रुपैयाँको मास्क १ सय रुपैयाँसम्ममा बिक्री भइरहेको प्रश्नमा उनले भने, ‘हो र ! त्यो त हामीलाई थाहा छैन त !’

उपभोक्ता संरक्षण तथा अधिकारकर्मी मानव तिमिल्सिना भने कालोबजारी भइरहेको बारे विभागमा लिखित जानकारी गराइएको बताउँछन् ।

अधिकारकर्मी तिमल्सिना पटक पटक ध्यानाकर्षण गराउँदा पनि कालोबजारी रोक्न सरकारले कुनै कदम नचालेको बताउँछन् । ‘मौखिक रूपमा पनि हामीले जानकारी गराइसकेका छौँ । मास्क मात्र नभएर अहिले बजारमा सेनिटाइजर, डिटोललगायतका अत्यावश्यक औषधिजन्य वस्तुहरुको अभाव छ तर सरकार बेखबर जस्तो छ ।’

विभागका शाखा अधिकृत पोखरेलले भावी दिनमा हुन सक्ने कालोबजारी र अभावलाई लिएर विभागमा नियामक निकाय र संघसंस्थाहरूसँग बुधबार नै बैठक बसेर कसरी अघि बढ्ने भन्नेबारे ठोस योजना बनाउने बताउँछन् ।

उता, औषधि पसल सञ्चालक भने होलसेलमै बढी मूल्य तिरेर मास्क खरिद गर्नुपरेका कारण बढी मूल्यमा बिक्री गरेको बताउँछन् ।

बुद्धनगरकी एक औषधि व्यवसायी होलसेल पसलले नै बढी मूल्य माग्ने गरेको बताउँछिन् । ‘केही दिनअघि मास्क लिन होलसेल जाँदा थुप्रै मास्क र सेनिटाइजरहरू थिए । भोलिपल्टै कसरी सकिन्छ ? होलसेल व्यापारीहरूले नै लुकाउँछन् अनि हामी पसलेलाई नै महँगोमा बेच्छन् । यसरी ल्याएपछि हामीले बेच्दा ५० देखि ६० रुपैयाँमा नबेचे घाटा लाग्छ ।’

विभागका अनुसार अहिले मुलुकमा ३ वटा मास्क उत्पादन गर्ने उद्योग छन्, जसबाट दैनिक ५ हजार बराबरको मास्क उत्पादन हुन्छ । बाँकी भने भारत, चीन, बंगलादेशलगायतका देशहरूबाट आयात हुँदै आएको छ ।

प्रकाशित मिति: बुधबार, फागुन २१, २०७६ १६:०१