सडक विस्तार रोकियो, उपत्यकामा दैनिक ५०७ गाडी थपिन्छन्

A+ A A-

साँघुरा सडकमा सवारी चापका कारण राजधानी काठमाडौंको जनजीवन समस्याग्रस्त बनेको छ । बढ्दो सहरीकरण र जनसंख्याको दरमा सडक निर्माण र विस्तार हुन नसक्दा दैनिक घन्टौँसम्म सवारी जाम हुने समस्या छ । सडक विस्तार ठप्प भइसक्यो, तर सवारीसाधन थपिने क्रम भने बढेको बढ्यै छ ।

बागमती अञ्चलमा पर्ने उपत्यकाका काठमाडौं, ललितपुर, भक्तपुर तथा आसपासका रसुवा, धादिङ, नुवाकोट, सिन्धुपाल्चोक र काभ्रेपलाञ्चोकमा ०७५ सम्म १२ लाख ५८ हजार दुई सय ५८ सवारीसाधन दर्ता भएका छन् ।

बागमती प्रदेशको भौतिक पूर्वाधार विकास मन्त्रालयअन्तर्गत चालू आर्थिक वर्षमा ९१ हजार तीन सय ३८ वटा गाडी दर्ता भएका छन् । यस आधारमा काठमाडौं उपत्यकासहित बागमती प्रदेशका आठ जिल्लामा मात्रै १३ लाख ४९ हजार ६ सय एक सवारीसाधन दर्ता भएका छन् ।

ट्राफिक प्रहरीको तथ्यांकअनुसार उपत्यकामा मात्रै अहिले १२ लाख गाडी गुड्छन् । उपत्यका भित्रिने र बाहिरिने गाडीको संख्या पनि दैनिक १५ देखि २० हजारसम्म छ । दैनिक एक लाखसम्म यात्रुहरू आवतजावत गर्छन् । तर, उपत्यकामा अहिले सडक विस्तार भने हुन सकेको छैन ।

बागमती प्रदेशको भौतिक पूर्वाधार विकास मन्त्रालयका अनुसार उपत्यकामा कालोपत्रे एक हजार एक सय २४, गाभेल नौ सय १५ र कच्ची तीन सय ९१ सहित दुई हजार चार सय ३० किमि सडक रहेको छ । त्यसमध्ये रणनीतिक सडक चार सय ९८ किमि मात्रै छ ।

काठमाडौं उपत्यकासहितका आठ जिल्लामा दैनिक सरदर पाँच सय सातवटा गाडी थपिन्छन् । चालू आर्थिक वर्ष ०७६/७७ का ६ महिनाको अवधिमा ९१ हजार तीन सय ३७ सवारीसाधन दर्ता भएका छन् ।

यस आधारमा अहिले दैनिक पाँच सय सातवटा गाडी थपिने तथ्यांक छ । यातायात व्यवस्था विभागका अनुसार आव ०६४/६५ मा दैनिक एक सय १७ वटा अर्थात् ४२ हजार आठ सय ८५ सवारी दर्ता भएका थिए । तर, आव ०७०र७१ पछि भने गाडी थपिने दर झन्डै दोब्बरले बढेको छ ।

आव ०७०/७१ मा ६७ हजार चार सय ४९ सवारीसाधन दर्ता भए । त्यतिवेला दैनिक सवारी दर्ता दर एक सय ८४ थियो । तर, त्यसको पाँच वर्षपछि यो संख्या झन्डै दोब्बरले वृद्धि भएर दैनिक तीन सय ५४ पुगेको छ । विभागका निर्देशक तीर्थराज खनालका अनुसार आव ०७४/७५ मा एक लाख २९ हजार पाँच सय ५७ वटा गाडी दर्ता भएका थिए ।

प्रकाशित मिति: बुधबार, फागुन २१, २०७६ ०७:१०