कोरोना सङ्क्रमणबाट जोगिन भीडमा होली नखेल्न चिकित्सकको सुझाव

A+ A A-

चिकित्सकहरूले भीडभाडमा होली नखेल्न सुझाव दिएका छन् । मंगलबार राजधानीमा आयाेजित एक साक्षात्कार कार्यक्रममा चिकित्सकहरूले भीडभाड हुने स्थानमा होली नखेल्न सुझाव दिएका हुन् ।

डा. सुन्दरमणि दीक्षितले चीनबाट फैलिएको कोरोनाको संक्रमण विश्वभरि फैलिएकाले नेपालले पनि सतर्कता अपनाउनुपर्ने सुझाव दिए । राजधानीमा आयोजित एक साक्षात्कारमा उनले भने, ‘यो ज्वरो नापेर मात्रै थाहा हुँदैन । हामी सबैका लागि खतरानक कुरा हो ।’

स्वास्थ्य तथा जनसंख्या मन्त्रालयका प्रवक्ता डा. विकास देवकोटाले कोरोनालाई नेपाल आउन नदिने प्रमुख लक्ष्य रहेको भन्दै सोहीअनुसार तयारी गरिएको बताए ।

उनले विमानस्थलमा हरेक यात्रुलाई चेकजाँच गरिने गरिएको बताए । उनले भने, ‘अहिले १९ जनाको जनशक्तिले काम गरिरहेको छ । ६ वटा थर्ममिटर प्रयोग भएको छ । व्यवस्थापन चुस्तदुरूस्त बनाएका छौँ ।’

सरूवा रोग विशेषज्ञ तथा शुक्रराज ट्रपिकल तथा सरूवा रोग अस्पतालका प्रवक्ता डा. अनुप बाँस्तोलाले टेकु अस्पतालमा कोराेनाका शंकास्पद बिरामीलाई आइलोसेनमा राखेर उपचार गरिएको सुनाए ।

अहिलेसम्म एक जनामा पोजिटिभ देखिए पनि पछि राम्रो भएर बिरामी डिस्चार्ज भइसकेको बाँस्तोलाले सुनाए । उनले भने, ‘२३ जना भर्ना हुनुभएको थियो । त्यसमध्ये एक जनामा पोजिटिभ देखिएको छ । १८ जनामा नेगेटिभ देखियो । बाँकीको रिपोर्ट आउँदै छ ।’

कोरोनाको लक्षण देखिए त्यहीअनुसार उपचार गर्ने गरिएको सुनाउँदै उनले टेकु अस्पतालमा अहिले ४० क्वारेन्टाइन बेड र ५ आइसोलेसन बेड बनाइएको जानकारी दिए ।

उनले नेपालमा यो रोग कम्युनिटीमा स्थापित नभएको स्पष्ट पारे । उनले भने, ‘अहिलेसम्म त्यस्तो परिणाम देखिएको छैन । कोरोना भाइरस लाग्नेबित्तिकै मान्छे मर्दैन ।’ अहिले मौसमी रूघाखोकीको समय भएकाले सजकता अपनाउन पनि उनले आग्रह गरेका छन् । उनले साबुन पानीले नियमित हात धुन, अनावश्यक भीडभाडमा नजान र मास्क लगाउन पनि सुझाएका छन् ।

प्रधानमन्त्रीले नेपालमा नै मिर्गौला प्रत्यारोपण गर्नु सुखद

वरिष्ठ मिर्गौला रोग विशेषज्ञ डा. ऋषिकुमार काफ्लेले प्रधानमन्त्री केपी शर्मा ओलीले नेपालमै मिर्गाैला प्रत्यारोपण गर्ने निर्णय गर्नु अत्यन्तै राम्रो पक्ष भएको बताए ।

उनले भने, ‘प्रधानमन्त्रीले नेपालमा नै मिर्गौला प्रत्यारोपण गर्नुभयो, खुसी लागेको छ । यो हामी नेपाली चिकित्सकहरूले आर्जन गरेको कुरा पनि हो । हामी सेवा दिन सक्छौँ भन्ने पक्ष हो ।’

डा. दीक्षितले पनि प्रधानमन्त्री केपी शर्मा ओलीले आफ्नो मिर्गौलाको पुनः प्रत्यारोपण नेपालमै गर्ने निर्णय गर्नु सुखद पक्ष भएको बताए ।

प्रकाशित मिति: मंगलबार, फागुन २०, २०७६ १७:४६