४ गुणाले बढ्यो कालो सूचीमा पर्नेको संख्या

A+ A A-

मुलुकभर बैंक तथा वित्तीय क्षेत्रबाट ऋण लिएर समयमा चुक्ता नगर्ने ऋणीहरूको संख्या ४ गुणाले बढ्दै गएको छ । चालू आर्थिक वर्षको माघ महिनासम्ममा ऋण नतिरेर कालो सूचीमा पर्नेको संख्या ११ हजार ६ सय ४३ पुगेको हो ।

यसरी कालो सूचीमा पर्ने ऋणीहरूले एउटा व्यवसायमा मात्र नभएर ४ देखि ५ वटा व्यवसाय देखाएर ऋण लिने र अन्त्यमा नतिर्ने गरेको देखिएको छ । कर्जा सूचना केन्द्रका अनुसार एकै व्यक्तिले ५ वटा उद्योग तथा व्यवसायबाट ५ पटकसम्म ऋण निकाली पाँचै पटक कालो सूचीमा परेको पनि देखिएको छ ।

कर्जा नतिर्नेमा फूलपातीदेवी कलवारले मात्र ४ वटा उद्योग देखाएर ऋण लिएको देखिएको छ । तथ्याङ्कका अनुसार कलवारले मात्र पशुपति दाल उद्योग, पशुपति काष्ठ उद्योग, पशुपति तेल उद्योग र माइती काष्ठ उद्योगबाट ऋण लिएर नतिरेको देखिएको हो ।

त्यस्तै, दामोदर शर्मा पनि आरएन्डडी इन्टरप्राइजेज, आरएन्डडी केमिकल उद्योग, आरएन्डडी स्टेसनरीबाट ऋण लिएर नतिरेकाले कालो सूचीमा परेका हुन् । निरन्जनकुमार सराफको नाममा रहेका ३ वटा उद्योग पनि कालो सूचीमा परेका छन् ।

यी त प्रतिनिधि पात्र मात्र हुन् । कालो सूचीमा पर्ने अधिकांश व्यक्ति एकभन्दा बढी व्यवसायमा संलग्न देखिन्छ ।

यसरी एकै व्यक्तिले एकभन्दा बढी व्यवसाय देखाएर ऋण लिने प्रवृत्ति बढ्दै गएको छ । एकै व्यक्तिको फरक फरक र एकभन्दा बढी व्यवसायबाट कर्जा लिएको कर्जा सूचना केन्द्रको भनाइ छ ।

पछिल्लो समय कर्जा प्रवाह सुस्त भइरहँदा ऋण तिर्न अनकनाउनेहरूबाट ऋण उठाउन पनि हम्मेहम्मे पर्ने गरेको राष्ट्रिय वाणिज्य बैंकका एक अधिकृत बताउँछन् । उनी भन्छन्, ‘छुट्टाछुट्टै व्यवसाय देखाएपछि ऋण दिनु नै पर्छ । अहिले यसरी धेरै व्यवसाय दर्ता गर्ने र ऋण लिने अनि तिर्न अनकनाउने बढी छन् ।’

यसका कारण कर्जा सूचना केन्द्रले जारी गर्ने ऋणीहरूको कालो सूचीमा बर्सेनि ऋण तिर्न अटेर गर्नेहरूको संख्या बढ्दै गएको हो ।

केन्द्रका अनुसार कालो सूचीमा पर्ने खराब ऋणीहरूको संख्या ४ वर्षमा करिब ११ हजारले बढेको हो ।

३ वर्षको तथ्याङ्क हेर्ने हो भने २०७२/०७३ मा ८ सय ३३ जना, २०७३/०७४ मा ८ सय ३४, जना २०७४/०७५ मा १ हजार ३ सय ६५ र २०७५/०७६ मा २ हजार ८ सय ४२ जना र चालू आर्थिक वर्ष २०७६/०७७ सालको १९ फागुनसम्म ४ हजार २ सय ७५ जना खराब ऋणीको सूचीमा परिसकेका छन् ।

केन्द्रका अनुसार यसरी कालो सूचीमा पर्नेहरू अधिकांश ७० प्रतिशत चेक बाउन्स भएकाहरू छन् ।

चालू आर्थिक वर्षमा कर्जा प्रवाह लक्ष्यभन्दा १० प्रतिशतले सुस्त भइरहँदा कर्जा लिएका ऋणीहरू पनि खराब निस्किने क्रम बढिरहेको छ । यसरी कालो सूचीमा पर्नेहरू वार्षिक रूपमा २ गुणाले बढिरहेका छन् ।

कर्जा प्रवाह सुस्त र भएका प्रवाहमा पनि खराब ऋणी निस्किँँदा बैंक तथा वित्तीय क्षेत्रमा थप जोखिम बढ्दै गएको हो ।

२०४६ सालदेखि अहिलेसम्म खराब ऋणीको छवि बनाउँदै कालो सूचीमा पर्नेको संख्या १७ हजार २ सय ३८ छ । त्यसमा अहिलेसम्म ५ हजार ५ सय ९५ जना ऋणी कालो सूचीबाट हटेका छन् । यसरी कालो सूचीबाट हटिसकेपछि पनि वित्तीय कारोबारीबाट पुनः कालो सूचीमा पर्न सक्नेछन् ।

कालो सूचीमा उल्लेखित ऋणीले अन्य कुनै बैंक तथा वित्तीय संस्थाबाट ऋण लिन पाउँदैनन् । यसले गर्दा अन्य नाममा व्यवसाय वा फर्म दर्ता गर्ने र ऋण लिने क्रम बढेको पाइन्छ ।

प्रकाशित मिति: मंगलबार, फागुन २०, २०७६ १७:१८