कोरोना प्रभाव नदेखिएका देशमा श्रम स्वीकृति नरोकिने

A+ A A-

सरकारले कोरोना प्रभाव नदेखिएका देशमा श्रम स्वीकृति जारी गर्न नरोक्ने भएको छ ।

श्रम, रोजगार तथा सामाजिक सुरक्षा मन्त्रालयले कोरोना प्रभावित देशमा भने श्रम स्वीकृति रोक्न निर्णय भएको जानकारी दिएको छ । मंगलबार श्रम र परराष्ट्रमन्त्रालयबीच बसेको बैठकले कोरोना प्रभाव नदेखिएका देशमा भने तत्काल श्रम स्वीकृति स्थग नगर्ने निर्णय गरेकाे हाे ।

सर्वोच्च अदालतले सोमबार संयुक्त अरब इमिरेट्स, कुवेत, इरान, बहराइन, जापान, दक्षिण कोरिया, इटली, चीनमा जाने नेपाली श्रमिकका हकमा श्रम स्वीकृति बन्द गर्न सरकारलाई आदेश दिएको थियाे ।

सोही अनुसार मन्त्रालयले मंगलबार कोरोना प्रभावित आठ देशका लागि श्रम स्वीकृति रोकेको जनाएको छ । दक्षिण कोरियाले भने कोरियामा कोरोना भाइरसको संक्रमण फैलिएपछि विदेशी श्रमिक गत हप्तादेखि नै रोकेको थियो ।

कोरोना भाइरसको संक्रमण फैलिएका देशमा नेपाली श्रमिकको श्रम स्वीकृतिमा केही देशका लागि भने स्थगन गरिएको श्रम, रोजगार तथा सामाजिक सुरक्षामन्त्री रामेश्वर राय यादवले बताएका छन् । कोरोना अप्रभावित देशमा भने तत्काल श्रम स्वीकृति रोक्ने अवस्था नभएको मन्त्री यादवले जानकारी दिए ।

हाल विश्वमा फैलिएको कोरोना संक्रमणलाई मध्यनजर गदै अति प्रभावित देशका लागि केही श्रम स्वीकृति स्थगन गरिएपनि अन्य देशमा श्रम स्वीकृति जारी हुने उनको भनाइ छ ।

ठूलो सख्यामा नेपाली कार्यरत विभिन्न श्रम गन्तव्य मुलुकमा कोरोनाको संक्रमण देखिएको छ । दक्षिण कोरिया, संयुक्त अरब इमिरेट्स (युएई), कतार, बहराइन र ओमानमा पनि कोरोना संक्रमित फेला परिसकेका छन् ।

कोरियामा झण्डै ४२ हजार हाराहारीमा नेपाली विभिन्न काम तथा पेशामा संलग्न छन्। त्यस्तै मध्यपूर्वी मुलुकमा पनि झण्डै १५ लाख नेपाली कार्यरत रहेकाे सरकारको तथ्याङ्क छ ।

प्रकाशित मिति: मंगलबार, फागुन २०, २०७६ १६:२०