घरकर्जामा नयाँ व्यवस्थाः २ करोडसम्म कर्जा पाइने, ६० प्रतिशत किस्ता सुविधा

A+ A A-

तपाईं घर बनाउने सोचमा हुनुहुन्छ भने खुसीको खबर छ । राष्ट्रबैंकले घर बनाउन र खरिद गर्न अब कुल लागतको ६० प्रतिशतसम्म कर्जा लिन सकिने व्यवस्था गरेको छ । यस्तो रकम जुनसुकै बैंकबाट पाइनेछ ।

राष्ट्र बैंकको अर्धवार्षिक मौद्रिक समीक्षामा घरकर्जालाई खुकुलो बनाउँदै नयाँ व्यवस्था गरिएको हो । बैंकले अब आम्दानीको ६० प्रतिशतसम्म बैंक किस्ता तिर्न सकिने व्यवस्था गरेको छ । यसअघि यसकाे सीमा ५० प्रतिशत मात्र थियो ।

यो व्यवस्थासँगै अब मासिक १ लाख आम्दानी गर्नेले ६० हजार रुपैयाँसम्म ऋणको किस्ता बुझाउन पाउने छन् । यसअघि १ लाख कमाउनेले ५० हजारसम्म मात्र किस्ता तिर्न पाउने व्यवस्था थियो ।

दोस्रो मौद्रिक समीक्षामा घरकर्जालाई केही खुकुलो बनाउँदै राष्ट्र बैंकले भनेको छ, ‘स्वप्रयोजनका लागि निर्माण/खरिद गरिने पहिलो घरका लागि प्रदान गरिने कर्जामा ऋण भुक्तानी आम्दानी अनुपात (डीटीआई) अधिकतम ६० प्रतिशत कायम गर्नुपर्ने व्यवस्था गरिनेछ ।’

यस्तै, घरकर्जाअन्तर्गत अधिकतम २ करोडसम्म ऋण लिन पाइनेछ । कृषि, पर्यटन एवं साना तथा मझौला पेसा व्यवसायका लागि कर दाखिला कागजातको आधारमा कर्जा प्रदान गर्ने तथा नवीकरण गर्न मिल्ने व्यवस्था गरेको राष्ट्र बैंकले गरेको छ ।

नियमअनुसार दर्ता भएका घरजग्गा व्यवसाय कम्पनीहरूले सञ्चालन गर्ने आयोजनाका लागि प्रदान गरिने कर्जाको ऋण मूल्य अनुपात (एलटीभी रेसियो) पनि परिवर्तन भएको छ । अब यस्तो रेसियो महानगरपालिका, उपमहानगरपालिका र काठमाडौं महानगरपालिकासँग जोडिएका नगरपालिका क्षेत्रमा अधिकतम ५० प्रतिशत र सोबाहेकका क्षेत्रमा ६० प्रतिशत कायम भएको छ ।

घरकर्जामा कडाइ गर्दा मध्यम आय भएका ऋणी समस्यामा थिए । कर्जामा कडाइ गरेसँगै आन्तरिक कर्जा २४ प्रतिशत र निजीक्षेत्रतर्फको कर्जा २१ प्रतिशत पुर्‍याउने लक्ष्य थियो । तर चालू आर्थिक वर्षको पुस मसान्तसम्म पनि यो लक्ष्य पूरा भएन । यो अवधिमा आन्तरिक कर्जा १४.१ र निजीतर्फको कर्जा १४.९ प्रतिशत मात्र प्रवाह भएको छ ।

गभर्नर डा. चिरञ्जीवी नेपालले कार्यकालको अन्तिममा कर्जामा गरिएको कडाइ खुकुलो बनाएका हुन् । कर्जामा कडाइ गरेसँगै बैंकहरूमा ऋण लिन आउनेको संख्या घटेको थियो । बैंक छोडेर ऋणीहरू सहकारीतर्फ आकर्षित भएका थिए ।