पोखरामा हुने अन्तर्राष्ट्रिय स्तरका कराते र तेक्वान्दो प्रतियोगिता स्थगित

पोखरामा हुने अन्तर्राष्ट्रिय स्तरका कराते र तेक्वान्दो प्रतियोगिता स्थगित

A+ A A-

विश्वव्यापी रूपमा फैलिएको कोरोना संक्रमणका कारण पोखरामा हुने दुई खेल प्रभावित भएका छन् । कोरोना भाइरसको प्रकोपको सन्त्रास बढेपछि पोखरामा आयोजना गरिएका मार्सल आर्टका खेलहरू स्थगित गरिएको हो ।

कोरोनाको त्रासका कारण यही २० फागुनदेखि पोखरामा आयोजना हुने भनिएको ‘प्रथम गौतम बुद्ध हिमालयन अन्तर्राष्ट्रिय कराते प्रतियोगिता र आगामी चैतको तेस्रो साताबाट सञ्चालन हुने ‘जी १ तेक्वान्दो’ प्रतियोगिता स्थिगत गरिएको सितेरियो गण्डकी प्रदेशका संयोजक सुरेन्द्र गुरुङले बताए ।

नेपाल सितेरियो कराते संघले ४ महिनाअघिदेखि ‘प्रथम गौतम बुद्ध हिमालयन अन्तर्राष्ट्रिय कराते प्रतियोगिता पोखरामा गर्ने तयारी थाले पनि कोरोनाका कारण स्थगित गर्नुपरेको उनले बताए । ‘प्रतियोगितामा करिब ५५ मुलुकका विभिन्न तौल समूहका १ हजारभन्दा बढी खेलाडी आउने तयारी थियो,’ गुरुङले भने, ‘सबै तयारी अन्तिम चरणमा पुगेको थियो तर, अन्तिम समयमा आएर कोरोनाका कारण स्थगित गर्नुपर्‍यो ।’

संयोजक गुरुङले नेपाल भ्रमण वर्ष २०२० सँगै पोखरालाई खेलकुद पर्यटनको शहरका रूपमा चिनाउने योजना कोरोनाका कारण तुहिएको बताए ।

प्रतियोगिता स्थगित भए पनि सितेरियो कराते संघले सोही समयमा ग्रेडिङको कार्यक्रम सञ्चालन गर्ने जनाएको छ । ६ डानसम्म गरिने ग्रेडिङमा नेपालका सात प्रदेश र ७७ जिल्लाका खेलाडीको सहभागिता रहने उनले बताए ।

तेक्वान्दोसमेत प्रभावित

नेपाल तेक्वान्दो महासंघले यही चैतको तेस्रो सातादेखि आयोजना गर्न लागेको अन्तर्राष्ट्रिय स्तरको ‘जी १ तेक्वान्दो’ प्रतियोगितासमेत कोरोनाका कारण प्रभावित भएको छ ।

नेपाल तेक्वान्दो संघ गण्डकी प्रदेशको आयोजनामा हुन लागेको अन्तर्राष्ट्रिय तेक्वान्दो प्रतियोगिता अन्तिम समयमा आएर स्थगित गर्नुपरेको संघका अध्यक्ष जगन गुरुङले बताए । सो प्रतियोगितामा ४५ देशका करिब १ हजार २ सय खेलाडी पोखरा आउने तय भएको अध्यक्ष गुरुङले बताए ।

‘कोरोना भाइरसको संक्रमणका कारण प्रतियोगिता स्थगित गर्न बाध्य भएका छौँ,’ उनले भने, ‘समय अनुकूल भएपछि विश्व तेक्वान्दो महासंघले नयाँ क्यालेण्डर प्रकाशित गर्छ, त्यसपछि कार्यक्रमको मिति तय हुन्छ ।’

पोखरामा हुन लागेको यस तेक्वान्दो प्रतियोगिता नेपालको अहिलेसम्मकै ठूलो प्रतियोगिता भएको उनले बताए । ‘बिनारोकतोक प्रतियोगिताहरू आयोजना गर्न पाएको भए पोखरामा विभिन्न देशका खेलाडीसहित ३ हजारभन्दा बढीको संख्यामा पर्यटक आउने निश्चित थियो,’ उनले भने ।

प्रकाशित मिति: सोमबार, फागुन १९, २०७६ १७:४५