प्रचण्डको हत्या गर्ने योजना छैनः विप्लव

A+ A A-

सरकारले प्रतिवन्ध लगाएको विप्लव नेतृत्वको नेकपाले सत्तारुढ दल नेकपाका अध्यक्ष पुष्पकमल दाहाल (प्रचण्ड) को हत्या गर्ने आफ्नो कुनै योजना नरहेको प्रष्टीकरण दिएको छ ।

शिलापत्रसंगको सम्पर्कमा आएका विप्लव नेतृत्वको नेकपाका पोलिटव्युरो सदस्य ओम पुनले प्रचण्डले गरेको दाबी झुटो भएको बताए ।

उनले भने ‘प्रचण्ड शान्ति प्रक्रियामा आएपछि आफुलाई साम्राज्यवादीहरुले हत्या गर्न खोजेको भन्थे अब त्यो हत्या गर्ने योजना हामीमाथि थोपर्दै छन् । यो उनको पुरानै बानी हो ।’ आफुहरु जनक्रान्तिको बाटोमा लागेको बताउदै उनले यो वेला कुनै व्यक्ति र संस्थामाथि आक्रमण गर्ने नीति नभएको बताए ।

‘यो बेला हाम्रो कुनै व्यक्तिमाथि हत्या गर्ने योजना छैन, नीति पनि छैन,’ उनले भने । सरकारले आफ्ना नालायकीपन ढाकछोप गर्न नचाहिदो आरोप लगाउन थालेको उनले दावी गरे ।

पोलिटब्युरो सदस्य पुनले सरकारले वार्तामा आए रातो कार्पेट ओछ्याउने आश्वासन दिएर दमन गर्ने योजना बनाएको उनको दावी छ । ‘सरकारले वार्तामा आए रातो कार्पेट ओछ्याउने भनेको हामीमाथि दमन गर्नेे योजना हो, ’ पुनले भने ।

‘सरकार आफैले लगाएको प्रतिबन्धमाथि पनि २४ घण्टा टिक्न नसकेको उनले आरोप लगाए । आफैले प्रतिबन्ध लगाएको पार्टीलाई २४ घण्टामा नै रातो कार्पेट ओछ्याउँछौ आउ भन्नु सरकारको नालायकीपन हो उनी भन्छन् ।

पुनले भने आफ्नो पार्टीका गतिविधिमाथि इन्डो अमेरिकी साम्राज्यवादको डिजाइनमा प्रतिवन्ध लगाएको आरोप लगाए । उनले भने, ‘देश टुक्र्याउने अभियानमा लागेको सिके राउतलाई इन्डो अमेरिकी साम्राज्यवादको डिजाइनमा वार्ता गरेको र आफुहरुमाथि प्रतिवन्ध लगाएको हो ।’

उनले यथाअवस्थामा सरकारले वार्तामा वोलाएपनि नआउने प्रष्ट पारे । वार्ताका लागि सरकारले पहिला बैज्ञानिक समाजबादमा जाने प्रतिबद्धता जनाउनुपर्ने उनको तर्क छ । तर वैज्ञानिक समाजवादवारे व्याख्या गर्न भने उनले चाहेनन् ।