व्यावसायिक कृषकलाई स्थानीय निकायको बेवास्ताः सरोकारवाला

A+ A A-

देशका विभिन्न स्थानमा व्यावसायिक रूपमा कृषि तथा पशुपालन गरिरहेका कृषकका समस्याप्रति स्थानीय निकायले बेवास्ता गरेको सम्बन्धित सरोकारवालाले बताएका छन् ।

व्यावसायिक रूपमा कृषि तथा पशुपालन गरिरहेका कृषकलाई थुप्रै खाले चुनौती भए पनि जननिर्वाचित प्रतिनिधिले भने व्यावहारिक रूपमा सहयोग नगरेको उनीहरूको तर्क छ ।

राजधानीमा व्यावसायिक रूपमा पशुपालन गरिरहेका कृषकहरूको भेलामा सम्बन्धित सरोकारवाला पक्ष र कृषकले यस्तो धारणा व्यक्त गरेका हुन् ।

कागेश्वरी मनोहरा–७ स्थित चम्पादेवी कृषक समूह र मध्यपुर– ७ स्थित नवनिलबाराही मिश्रित कृषक समूहले आयोजना गरेको व्यावसायिक पशुपालक कृषकहरूको समस्या तथा चुनौती विषयक अन्तर्क्रियामा उनीहरूले यस्तो धारणा राखेका हुन् ।

छलफलमा कृषकहरूले जननिर्वाचित प्रतिनिधि आएपछि कृषि तथा पशुपालन क्षेत्रमा स्थानीय निकायबाट सहयोगको अपेक्षा गरिएको भए पनि नपाएको गुनासो गरे ।

संघीय, प्रदेश र स्थानीय तहका सरकारवाट कृषिक्षेत्रको विकासमा सहयोग अपेक्षाकृत नभएको कृषकहरूको गुनासो छ । छलफलमा सहभागी अधिकांश पशुपालक कृषकले दानापानीको भाउ बढ्दै गए पनि सोअनुरूप दूध तथा दुग्धजन्य वस्तुको मूल्य वृद्धि नहुँदा समस्या भएको बताए ।

कृषि तथा पशुबीमाको समस्या, पशु आयातको समस्या, गुणस्तरीय दाना तथा खाद्यन्नको समस्या रहेको उनीहरूको भनाइ छ । कृषकले यी थुप्रै समस्या झेलिरहँदा पनि स्थानीय सरकारका प्रतिनिधि भने मुकदर्शक भएर बसेको र कृषकका समस्याप्रति गम्भीर नदेखिएको उनीहरूको भनाइ छ ।

छलफलमा काठमाडौं २ का प्रदेश सांसद मणिराम फुयाँल, पशु सेवा विभागमा निमित्त प्रमुख टीकादेश भट्ट, विभागमा प्रवक्ता चन्द्र ढकाल, कृषि ज्ञान केन्द्रका निर्मल गदाल, नयाँ कृषि अभियान कृषि सहकारी संस्थाका अध्यक्ष मीनबहादुर गैरे, सहकारीका प्रबन्ध निर्देशक यादवप्रसाद पोखरेललगायतले व्यावसायिक कृषि तथा पशुपालन र यसका समस्या र चुनौतीका विषयमा विचार व्यक्त गरेका थिए ।

प्रकाशित मिति: सोमबार, फागुन १९, २०७६ १२:२८