प्रचण्ड कामरेड ! तपाईं मात्र हो र जुत्ता खाने ?

A+ A A-

भनिन्छ, नेता ताली र गाली दुवै खान तयार हुनुपर्छ । तर, गाली मात्रै होइन, संसारका केही यस्ता नेता छन्, जसले थप्पडदेखि जुत्ता प्रहारको समेत सामना गर्नुपरेको छ ।

कांग्रेस नेता रामचन्द्र पौडेलमाथि एमालेका सांसद गोल्छे सार्कीले थप्पड हानेका थिए । नेताहरूले पिटाइ खाने र जुत्ता प्रहारको सामना गर्ने क्रम गणतन्त्रसम्म जारी रह्यो ।

काठमाडौंको भृकुटीमण्डपमा आयोजित चियापान समारोहमा प्रचण्डलाई पदम कुँवरले थप्पड प्रहार गरेका थिए ।

त्यसपछि उनले जनताका सामु गरिएका बाचा पूरा नगरे जनआक्रोश झनै बढ्ने प्रतिक्रिया दिएका थिए । सो क्रम आइतबार फेरि दोहोरियो । उनीमाथि आइतबार राष्ट्रिय सभागृहमा भरतमोहन अधिकारीको प्रथम स्मृति दिवसलाई सम्बोधन गरेर मञ्चमा आफ्नो सिटमा फर्किने क्रममा जुत्ता प्रहार भयो ।

प्रचण्डमाथि जुम्लाको सिजा गाउँपालिका–२ का रतन तिरुवाले जुत्ता प्रहार गरेका हुन् । प्रचण्ड १० वर्षसम्म चलेको सशस्त्र द्वन्द्वको नेतृत्व गर्दै शान्ति प्रक्रियामा सामेल भएर एमालेसँग एकता गरी हाल देशकै सबैभन्दा ठूलो कम्युनिस्ट पार्टीको नेतृत्वमा छन् ।

तर जनयुद्धमा व्यक्त गरेका प्रतिवद्धता पूरा नगरेको भन्दै उनीमाथि यस्ता आक्रमण हुने गरेका छन् । आइतबार आक्रमण गर्ने तिरुवाले पनि प्रचण्डले वर्गसंघर्षबारे दिएको अभिव्यक्ति चित्त नबुझेपछि जुत्ता हानेको प्रतिक्रिया दिएका छन् ।

एमालेका नेता झलनाथ खनाललाई सुनसरीमा देवीप्रसाद रेग्मीले चट्कन हानेका थिए ।

२०६४ सालको चुनावमा काठमाडौं– २ मा एमाले नेता माधवकुमार नेपाललाई हराएका झक्कुप्रसाद सुवेदी पनि झापड खाने नेताको सूचीमा पर्छन् भने २०७४ मा भएको निर्वाचन प्रचारका क्रममा कांग्रेस नेता रामशरण महतमाथि बोतल प्रहार भएको थियो ।

यी केही उदाहरण मात्रै हुन् । यी घटनाले नेताप्रतिको आक्रोशको अभिव्यक्तिको प्रतिनिधित्व गर्छन् । तर संसारमा नेताहरूमाथि थप्पड र जुत्ता प्रहार हुने घटना नयाँ भने होइनन् । गत वर्ष दिल्लीका मुख्यमन्त्री अरबिन्द केजरीवालमाथि जुत्ता प्रहार भएको थियो ।

नेतामाथि जुत्ता प्रहार गर्नु राजनीतिक एजेन्डाको विरोध मात्रै नभएर मिडियालाई आफूतिर आकर्षित पार्ने एउटा फन्डाका रूपमा समेत लिने गरेको पाइएको छ । केजरीवाल मात्रै होइन, अमेरिकी पूर्वराष्ट्रपति जर्ज बुसमाथि समेत जुत्ता प्रहार भएको थियो ।

गतवर्ष भारतको नयाँ दिल्लीमा सर्वसाधारणले नभएर एक सांसदले आफ्नै पार्टीका विधायकमाथि जुत्ता हानेका थिए ।

जुत्ता प्रहारको सबैभन्दा चर्चित घटना सन् २००८ मा भएको थियो । त्यति बेला एक पत्रकारले अमेरिकाका तत्कालीन राष्ट्रपति जर्ज डब्लू बुसमाथि जुत्ता प्रहार गरेका थिए । बुसमाथि प्रहार भएको सो जुत्ता तत्कालीन इराकी प्रधानमन्त्री नुरी अल मल्लिकीले रोकेका थिए । बुसमाथि दुईवटा जुत्ता प्रहार गर्ने ती पत्रकारलाई प्रहरीले गिरफ्तार गरेको थियो ।

सन् २०१४ मा अमेरिकाका पूर्वविदेशमन्त्री हिलारी क्लिन्टनमाथि जुत्ता प्रहार भएको थियो । नेभाडाको लस भेगासमा जुत्ता प्रहार हुँदा उनी मुश्किलले जोगिन सफल भएकी थिइन् ।

यसरी जुत्ता प्रहारको सामना गर्ने नेताहरूमा चीनका पूर्वप्रधानमन्त्री बेन जिया बाओदेखि इरानी पूर्वराष्ट्रपति मोहम्मद अहमदिनिजादसम्म छन् ।

भारतमा सन् २००९ मा पत्रकार जरनैल सिंहले यूपीए सरकारका तत्कालीन गृहमन्त्री पी चिदम्बरममाथि जुत्ता प्रहार गरेका थिए ।

उनले चिदम्बरममाथि सन् १९८४ मा भएको शिख दंगालाई लिएर प्रश्न गरेका थिए । त्यसैबेला भारतीय जनता पार्टीका नेता लालकृष्ण आडवाणीमाथि उनकै पार्टीका कार्यकर्ता पावस अग्रवालले चप्पल हानेका थिए ।

भारतका तत्कालीन प्रधानमन्त्री डा.मनमोहन सिंहमाथि पनि अहमदाबादको एक चुनावी र्‍यालीमा जुत्ता प्रहार भएको थियो । त्यसपछि सिंहले प्रहरीलाई जुत्ता प्रहार गर्नेमाथि कारबाही नगर्न आग्रह गरेका थिए । १५ अगस्ट २००९ को स्वतन्त्रता दिवसमा जम्मु काश्मिरका तत्कालीन मुख्यमन्त्री उमर अब्दुल्लामाथि जुत्ता प्रहार भएको थियो ।

२६ अप्रिल, २०११ मा कमनवेल्थ खेल आयोजना समितिका अध्यक्ष सुरेश कलमाडीमाथि अदालत जाने क्रममा चप्पल प्रहार भयो । अक्टोबर २०११ मा लखनउमा आरटीआई कार्यकर्ताले आम आद्मी पार्टीका नेता अरविन्द केजरीवालमाथि जुत्ता प्रहार गरेका थिए ।

२३ जनवरी २०१२ मा देहरादूनमा एक चुनावी सभामा कांग्रेसका नेता राहुल गान्धीमाथि जुत्ता प्रहारको घटना भएको थियो । जनवरी २०१५ मा बिहारका तत्कालीन मुख्यमन्त्री जितेन माझी र सेप्टेम्बर २०१६ मा पञ्जाब विधानसभामा विधायकले प्रदर्शनका क्रममा पञ्जाबका तत्कालीन क्याबिनेटमन्त्री विक्रम सिंह मजिठियामाथि जुत्ता प्रहार गरेका थिए ।

जनवरी २०१७ मा पञ्जाबका तत्कालीन मुख्यमन्त्री प्रकाश सिंह बादलमाथि उनकै चुनाव क्षेत्रमा जुत्ता प्रहार भएको थियो ।

फेब्रुअरी २००९ मा लण्डनमा तत्कालीन चिनियाँ प्रधानमन्त्री बेन जियाबाओमाथि एक जर्मन नागरिकले जुत्ता प्रहार गरेका थिए । डब्लिनमा सेप्टेम्बर २००९ मा बेलायती प्रधानमन्त्री टोनी ब्लेयरमाथि जुत्ता र अण्डा प्रहार भएको थियो । यसका साथै चीन, रुस, ताइवान, क्यानडासहित संसारका धेरै देशका नेताले यस्ता जुत्ता प्रहारको घटना बेहोरेका छन् ।

अगस्ट २००९ मा पाकिस्तानका राष्ट्रपति आसिफ अली जर्दारीमाथि बेलायतको बर्मिङ्घममा जुत्ता प्रहार भएको थियो । फेब्रुअरी २०११ मा पाकिस्तानका पूर्वराष्ट्रपति परवेज मुसर्रफ लण्डनमा एक सभालाई सम्बोधन गरिरहेकाे बेला एक व्यक्तिले जुत्ता हानेका थिए ।

उनीहरूले अमेरिकामा पाकिस्तानी नागरिकको गिरफ्तारीको विरोध गरिरहेका थिए । ११ मार्च २०१७ मा लाहौरमा पाकिस्तानका पूर्वप्रधानमन्त्री नवाज शरीफमाथि जुत्ता प्रहार भयो ।

त्यसको १ वर्षपछि तहरिक–ए–इन्साफ पार्टीका नेता इमरान खानमाथि जुत्ता हानिएको थियो । इमरान खान हाल पाकिस्तानको प्रधानमन्त्री छन् ।

प्रकाशित मिति: सोमबार, फागुन १९, २०७६ १२:२५